الصوتية ١١ - قوة الاقتراح

وياكم فلان و هاي الصوتية الاولى بعد العاشرة من عراقي بودكاست الموسم الثالث، 

قبل ١٢ سنة تقريبا، جان اكو عائلة عراقية نعرفها عايشة خارج العراق، و جان عدهم بنيه في بداية العشرينيات من عمرها و تداوم بالجامعة، و جانت هاي البنيه تعيش حياة طبيعيه جدا و تروح تداوم و تدرس و ترجع للبيت و كلشي جان ماشي تمام، المهم بيوم من الايام هاي البنيه كامت تحس بظواهر غريبه تصير، مثلا كامت تحس و هيه بغرفتها انو اكو احد ديحجي وياها بصوت غريب، و جانت مرات تحس انو اكو احد ديمشي وراها من تطلع للدوام او من تمشي لوحدها بالبيت بالليل، المهم جانت دتتجاهل الموضوع بس كامت هاي الامور تصير اكثر و شويه شويه كامت تشوف كوابيس بنومها و مرات تكعد من النوم تلكي الغطى مسحوب من عليها، بوقتها بدت هاي البنيه من يصير وياها شي تتذكر حجي امها جانت تكوله عن السحوره و انو اكو وحده من كرايبها دائما تحاول تسويلهم سحوره و من هاي الامور، و طبعا هذا الشي خلاها تتأكد ان الي ديصير وياها هو عبارة عن سحر موجه الها حتى يخرب حياتها و يؤذيها و يخرب حياة العائلة، المهم هاي البنيه كالت لاهلها على هذا الموضوع، و طبعا ام هاي البنيه استنتجت نفس الاستنتاج لهاي الظواهر، فقرروا يدورون على حل لهاي المشكله؟ و طبعا مثل ما كلنا نعرف انك اذا مسحور راح تحاول تفك السحر الي عليك بأي طريقة، المهم ماعرف شلون وصلوا لشخص عراقي خلي نسمي زياد، لتكلي ليش هيج سميته بس هذا الاسم الي اجه ببالي، زياد هذا شاب يدعي انو عنده قدرات خاصة بالسحر و الماورائيات و هاي الامور ورثها من عائلة ابوه الي جانوا كلهم هيج، و بالفعل استضافوا هذا الشخص للبيت حتى يشوف شنو المشكله، و من كعد ويه العائلة كعد يحجي قصص تدعم ادعائه، مثلا جان يكول انو اول مره استعمل بيها السحر هو انو طلع جيرانهم من بيتهم لان جانوا مزعجين و يكول مره جان واكف على شباك بيتهم و شاف ثنين ديمشون بالشارع سوالهم سحر خالهم يتعاركون من لاشيء، المهم هو جان عنده شخصية مقنعه خلت العائلة تتوقع من هذا الشخص العلاج للمشكله، حط زياد ايده على راس هاي البنيه و كام يكول كلام بصوت ناصي و من هالامور، و كللها سدي عيونج و كوليلي شنو دتشوفين، سدت عينها و بدأت تشوف نفسها داخل بيت، كللها روحي لحمام البيت شوفي، راحت لحمام البيت، كللها باوعي حواليج و شوفي شنو اكو، كالتله دا اشوف عنكبوت جبير كللها سأليه شنو اول حرف من اسمك، كالتله سألت، كاللها شنو كلج، كالتله حرف الكاف، و كل الي كاعدين انصدموا، ليش انصدموا؟ لان جان اول حرف من اسم كرايبهم الي شاكين بيها، المهم كاللها زين طلعي و روحي نزلي درج، نزلت الدرج طلعت للشارع، كاللها شنو دتشوفين، كالتله دا اشوف احصنه بيضا و شايلين نعش جبير و ديمشون بيه بمسيرة، كاللها اكو شي ثاني، كالتله لا، كاللها خلص فتحي عينج، المهم استنتجوا الاستنتاج المهم هنا و هو انو هاي كرايبهم هي الي مسويه سحر، زياد هنا كال جيبولي مي، جابوله مي لزم كلاص المي و كام يقرا عليه شغلات و بعدين كللها شربيه، و كاللنا جيبولي مي ثاني بنجانه، جابوله النجانه مليانه مي، هم قرأ عليها شغلات و كال للعائلة هاي كلكم تسبحون بيها، و تديرون منه بتانكي البيت، و اثناء ما زياد ديحجي البنيه انهارت و كامت تتلوى و بعدين اغمى عليها، المهم البنيه كامت وره شويه، المهم زياد كاللهم لازم اسبوع كامل تستعملون هذا المي بكلشي، و بالفعل سوو هذا الشي، مرت فترة صغيرة و البنيه بدت ترجع تشوف هاي الاشياء و تسمعها و تحلم بيها، و طبعا اكو قصة اطول صارت ويه زياد بس ماكو داعي نحجي بيها لان مو موضوعنا، المهم بالاخير اهل هاي البنيه قرروا ياخذوها للعراق لرجال هناك معروف انه يعالج هاي الحالات و بالفعل وره ما راحتله عالجها و صارت زينه و رجعت للبلد الي جانت عايشة بي و عاشو عيشة سعيدة، زيييين، ليش اني حجيت هاي القصة و شعليها بعنوان الصوتية؟ 

لطالما جانت الصحة النفسية موضوع محظور بالمجتمع العراقي، مثل هواي مواضيع، و دائما الناس تعتبرها وصمة او ببساطة يتم تجاهلها،  لازم نفهم اهمية الصحة النفسية و الرفاهية العقلية و دورها بحياتنا، لان الصحة العقلية تلعب دور جبير بحياتنا و تفكيرنا و شعورنا و تصرفاتنا، حتى تأثر على علاقاتنا و على ادائنا لشغلنا و نوعية حياتنا بشكل عام. 

زين ليش الصحة النفسية مهمه و خصوصا بالمجتمع العراقي، أولا لان اهتمامنا و اعترافنا بقضايا الصحة العقلية يساعدنا على معالجتها او على الاقل معاملتها بشكل افضل، يعني لازم نفهم ان الصحة العقلية متقل اهميه عن الصحة البدنية، معرفه هذا الشي حيخلينا نعيش حياة افضل و نعيش بمجتمع افضل. 

لسوء الحظ معظمنا متردد انه يطلب المساعده او على الاقل يحجي عن التحديات الي دتوجاهه من هاي الناحية، والسبب هو ان يا اما المجتمع الي حوالينا ميتقبل الموضوع بطريقة مناسبه و هواي ناس تخاف تحجي ليكولون عليه مخبل او ضعيف او مسحور او ملبوس او متعمد، يا اما الشخص نفسه يكون عنده قلة معرفه بهاي الامور و دائما يحاول يتجاهلها او يعاملها معامله غلط، فهذا الشي ممكن يخلي الشخص يتلقى المساعدة الغلط لمشكلته، هذا طبعا غير الضغط المجتمعي و الاعراف المجتمعية و غيرها من المؤثرات الي ممكن تخلي الشخص يعاني من مشاكل نفسيه و عقليه بدون توقف و بالعكس ممكن تزيد و ممكن تأثر على حياة الشخص، يعني مثلا اليوم شفت خبر عن شخص يرمي قطة من الطابق التاسع بمجمع بسماية ببغداد و اكو ناس مصورته و من انتشر الفيديو الشرطة المجتمعيه بدت تحقق بالموضوع الشخص هذا هرب، و بعدين من سالوا ابوه، ابوه كال انو ابنه بي حاله نفسيه و ديتصرف تصرفات غريبه و ديظل يشرب مواد مسكره ديطلب انو يعالجوه من هاي الحالة، اذا تفوت للتعليقات على هذا الخبر، راح تلكي مصايب، يعني معظم الناس ممصدكة انو يكون عنده حالة نفسيه و كل واحد كاعد يشخص الحالة بكيفه و كلها دتطالب انو ينسجن، وكأنوا ماكو مختصين يقيمون الحاله و يعرفون شنو السبب، صارت الناس كلها مختصين و كلها قظاة يشخصون و يحكمون همين، فاحنا من هذا المثال البسيط نكدر نستنج ان المجتمع ميكدر يقيم او يتقبل وجود الامراض النفسية، فشلون نكدر نعتمد على تقييمه للماوراءيات مثل الحسد و الجن و التلبس و هاي الامور؟ مهم نعرف انو طلب المساعده من مختصين هو مو علامة ضعف و انما هو علامة على قوة هذا الشخص، زين شلون ممكن نتعامل ويه هذا الموضوع و شنو الحل؟ 

قبل منفكر بالحل، لازم نتعرف على مصطلح كلش مهم بعلم النفس وهو 
the power of suggestion
 او بما معناه بالعربي هو قوة الاقتراح، قوة الاقتراح تعريفا هي لمن يكون عند الشخص فكرة يتم نقلها اله، وتصير هاي الفكرة بدورها حقيقة واقعة،و قوة الاقتراح الها تأثير كلش جبير على الصحة النفسية، بس خليني ابسط الموضوع لان صعب ينفهم من هذا التعريف البسيط، اكبر مثال على قوة الاقتراح هو الاشخاص الي يعتقدون ان الحالة او المرض النفسي الي ديمرون بي هو من كيانات خارقة للطبيعة او بمعنى اخر يعتقدون انو اكو جني او شيطان لابسهم او يعتقدون انو اكو احد مسويلهم سحر مثل ما سمعت بالقصة الي بالبداية، و عادة قوة الاقتراح تجي من مجموعة من العوامل، منها المعتقدات الثقافية أو المجتمعية أو الدينية أو التجارب الشخصية او حتى الضعف النفسي و بمعظم الاحيان تجي من الجهل بناحية معينه او مجموعة نواحي، و طبعا هاي العوامل تعزز هاي المعتقدات و تضخمها، و غالبا تكون هاي القوة تجي من مصادر خارجية مثل المجتمع المحيط، المعتقدات الدينية، افراد العائلة، القصص المتوارثة و غيرها, مو بس هيج، قوة الاقتراح ممكن تكون بامور ثانيه ابسط او اعقد، مثل انو المجتمع يقنع البنية انها متعرف تسوق و كل الناس الي حواليها يكولوها انتي متعرفين تسوقين و اذا تريد توكف السيارة بمكان يكوللها جيبي اوكفلجياها و اذا تريد تروح لمكان بعيد و وياها رجال لازم هو الي يسوق لان هو يعرف هيه متعرف او اذا تريد تسوق مسافه بعيده يكولوها لا متكدرين تسوقين هاي المسافه، هذا الشي راح يخليها تحس انها متعرف تسوق و هذا الشي ممكن يخليها متوثق بنفسها بالسياقه و ممكن تسوي حادث همين، لان متوقعه انو الي ديقترحه المجتمع عليها هو الصحيح، و حاول تطبق هذا الشي على هواي اشياء حوالينا مثل الدراسة و انو الي حواليك يكولك انك فاشل و مراح تنجح او الطبخ انك يكولوك انك متعرف تطبخ فانت بالضرورة يكوم اكلك شلون متسوي يطلع مطيب  و غيرها هواي من الاقتراحات الي المحيط مالتنه يقترحها علينا واحنه نتأثر بقوة هاي الاقتراحات، باوع حواليك و راح تلكي هواي منها. 
قوة الاقتراح ممكن تشكل افكار الشخص و مشاعره و سلوكياته، و هذا الشي ممكن يخلق حالة متوقعه او نبوءة تحقق نفسها، يعني مثلا، اذا اكو شخص ديمر بحالة نفسية معينه وهذا الشخص كل الناس الي حواليه ضلوا طول الوقت يكولوله تره شكله احد مسويلك سحر أو محسود وانو كل الاعراض المؤلمة الي دتمر بيها هيه نتيجة لهذا السحر، هذا الشخص راح يبدأ يفسر افكاره و مشاعره و سلوكياته بهذا الاطار، باختصار لان المجتمع المحيط ظل يقترح هذا التشخيص على هذا الشخص و يعززه بقصص و رويات و تحليلات لحد ما هذا الشخص يصدك انو احد مسويله سحر و يكوم يتصرف على هذا الاساس، و تكون ردود افعاله على هذا الاساس، لذلك تلكي هواي فديوهات لاشخاص ديستخرجون منهم الجني او الشيطان او ديبطلون السحر الي عليه بغض النظر عن اي ديانه دا احجي لان هذا موجود بكل الديانات تقريبا و تلكي هذا الشخص متأثر كلش بهذا الموضوع و تلكي الشخص الي ديجري هذا العمليه هو يا اما شخص دجال ديستغل هاي الحالة و ديستغل قوة الاقتراح لصالحة لاسباب ماديه او غير اسباب، او يكون شخص يمثل ديانة المريض مثل شيخ او قس او كاهن و تكون نيته خير و يريد يساعد هذا الشخص، و ممكن جدا هذوله الاشخاص يساعدوه، بس مو لان همه عدهم قوة خارقة او يعرفون بالماورائيات او همه بركة، وانما لان هذا المريض النفسي مقتنع بعقلة الباطن انو هذا هو الحل و انو هذا الشخص هوه الي حيكدر يعالجني، لذلك تلكي هواي حالات الدكتور النفسي ميكدر يساعد بيها المريض، و غالبا هذا المريض راح يحس روحه صار احسن على ايد الاشخاص الي ذكرتهم، و هذا يفسرك من تسمع قصة شخص و يكلك ودوني على اكثر من دكتور و مكدر يعالجني بس هذا الشيخ او القس كدر يعالجني، اني هنا مدا اكول انو هاي الاشياء مو موجودة و ما اكدر اجزم بهذا الشي طبعا، بس بنفس الوقت ماكدر اثبت انها العكس. 
 


اكو هواي حالات نفسية ممكن الخلط بين اعراضها و بين كونها قوه خارقة للطبيعة من الشخص ينصاب بيها، و راح اذكرلكم بعضها من خلال بحثي البسيط بالموضوع

الفصام Schizophrenia: وهو اضطراب عقلي ممكن يتسبب في بإصابة الشخص بالهلوسة والأوهام والتفكير غير المنظم. و ممكن يبين بعض الأشخاص المصابين بالفصام سلوك غريب أو عنيف، وهذا الشي ممكن يتفسر على ان الشخص ممسوس من جني او شيطان.

اضطراب الهوية الانفصامية Dissociative Identity Disorder (DID): هاي حالة يكون بيها عند الشخص شخصيتان أو أكثر. وممكن يعاني الأشخاص المصابين من فقدان الذاكرة ، والإغماء ، وأعراض ثانيه غير عادية. ممكن أحيانًا الخلط بين هاي الأعراض وبين الاستحواذ او اللبس.

الصرع او Epilepsy: وهو اضطراب عصبي ممكن يسبب نوبات. وهاي النوبات أحيانًا يتصرف بيها الشخص تصرف غريب أو عنيف، هذا مرض مشهور بان الناس تعتقد انه سحر او مس شياطاني او من هاي الامور. 

اضطراب التحويل او Conversion disorder المعروف همين باسم اضطراب الجهاز العصبي الوظيفي: هو اضطراب عقلي يخلي الشخص يعاني من أعراض جسدية ماكو الها سبب طبي أساسي مثل الشلل أو التنميل أو العمى أو الصمم أو النوبات ، مع ان الشخص ماعنده أمراض عصبية أساسية. 

التمارض او Malingering: هي حالة نمعروفه و بعضنا سويناها حتى لنروح للمدرسة من جنت تكول بطني يوجعني و ماكدر اداوم، بس الموضوع اكو ناس تاخذه الي ابعد من سالفه بطني توجعني  و انما يكون يختلق الأعراض أو يضخيمها بهدف الوصول لبعض الفوائد ، مثل التهرب من الشغل او الدراسة أو انهم يطلعون من السجن، فيبين الموضوع و كأنه احد مسويله سحر لو لابسه جني. و هيه ما تعتبر مرض نفسي و انما حالة نفسيه او سلوك نفسي. 

و لازم نلاحظ أن هاي الحالات الي ذكرتها هي عدد قليل من هواي حالات النفسية الي ممكن تتفسر على انها ظاهرة غير طبيعية. 

زين هسه فهمنا موضوع قوة الاقتراح، شنو الحل، شلون ممكن نعالج هاي المشكله؟ 
معالجة قوة الاقتراح داخل اي مجتمع بما فيها العراقي، هي عمليه طويله و مستمره و تحتاج التزام طويل الامد بالتعليم و الحوار و تعزيز الفكر النقدي و الفكر المستقل و تشجيع الافراد على انهم يستجوبون و يقيمون اي معلومه توصلهم مهما كانت ثابته بهذا المجتمع و بهالشكل راح تتطور عقلية المجتمع و تصير اكثر مرونه و اقل عرضة لقوة الاقتراح، والاهم انك دائما لازم تخلي ببالك انك معرض لقوة الاقتراح، فخليك جاهز.