الصوتية العاشرة - حيرة

جان اكو مسلسل مصري قديم اسمه نحن لا نزرع الشوك تم انتاجه سنه ١٩٩٨، و قصة هذا المسلسل عن معاناة طفلة  اسمها (سيدة) بعد ما امها ماتت و ابوها اتزوج، و مرت ابوها جانت تعاملها معامله كلش موزينه و بعدين ابوها يموت فياخذها صديق ابوها حتى يريبها و هم مرت صديق ابوها تكوم تأذيها و تعاملها معامله الخدامة و تعذبها و بعدين يكوم يعتدي عليها ابن صديق ابوها. المهم القصة كلش كئيبه و كلش حزينه و تدخلك بمود كلش مزعج، و بوقتها هذا المسلسل جان ترند و كل الناس شايفته و تعرف الاغنيه مالته ولحد هسه اكو ناس تغني هاي الاغنيه من تكون دتنضف بالبيت او من احد يطلب منهم يسوون شي، كنوع من التحشيش على موضوع المعاناة، المهم بهذيج الفترة احنه جنه بدوله عربيه مجاوره للعراق و جان اكو صديقة لأمي جبيرة بالعمر و عايشه لوحدها و على نياتها، عايشه على كدها، بوقتها بدت تنتشر التلفزيونات الملونه و بدت الناس تجيب تلفزيونات و من هالامور، و بيوم من الايام ناس جيران هاي المره جابولها تلفزيون صغير هديه حتى تونس نفسها بي، و اول مسلسل اتفرجته جان مسلسل نحن لا نزرع الشوك الي حجيتلكم عليه، وللاسف هيه جانت مفتهمه ان الي ديصير بالمسلسل هي حياة اشخاص حقيقية و هيه دتتفرج عليها، فجانت كلش متأثرة بالاحداث بشكل كلش عنيف، لدرجة انها وصلت نص المسلسل صار بيها جلطه و راحت للعناية المركزة كم يوم و جانت راح تموت بسبب المسلسل، و لحسن الحظ طلعت منها سلامات، بس بوقتها الناس كعدوا وياها و فهموها انو هذا كله تمثيل و هاي كلها قصة خياليه. 
زين شنو جاب هاي القصة ببالي؟ تعالوا احجيلكم. 
   
وياكم فلان و هاي الصوتية العاشرة من عراقي بودكاست الموسم الثالث، الي جاب هاي القصة ببالي هو اني جنت دا اتفرج مسلسل حيرة العراقي ويه اهلي و جنه دنسولف عن الاحداث و من هالامور فاختي تكلي تدري اكو ناس تفوت تسب على الممثلين بالانستاكرام و يتعاركون وياهم على احداث المسلسل، كلت مستحيل، فطبيت لكيت اكو ناس تكتب اشياء غريبه، يعني مثلا تكتب لوحده من الممثلات ليش متتزوجين الشخصية الفلانيه الي بالمسلسل و ليش هيج سويتي بي و الله ينتقم منج، و الي تكوللها اني كرهتج و بعد ما اتابعج و اكو هواي تعليقات غريبه عجيبه، يا جماعة ترة هذا تمثيل، يعني اذا انت هسه دتسمعني و عبالك هذا مو تمثيل او تعرف احد عباله مو تمثيل  احب اكللكم تره هذا تمثيل، اني ادري اكو ناس حتضحك و تكول معقوله اكو ناس هيج تفكر، و احب اكلك اكثر من هيج همين، اكو ناس مثلا تسب و تشتم بالممثلين الي يطلعون بمسلسل مال خان الذهب الي انعرض برمضان، و يسبون المخرج لان معجبهم منو انتصر باخر القصة، يعني من كل عقلكم تحجون؟ الناس بكل العالم من تتفرج على عمل معين تشوف الجوانب الفنيه بي و تنتقد القصه او الحبكه او تعبر عن اعجابها بيها، تقييم اداء الممثلين، مو تكعد تتعارك وياهم لان معجبتك القصة او كلش اتئثرت بالقصة بشكل يخليك تروح تصدر احكامك عليهم و تضايقهم، همه قدموا عمل، عجبك او معجبك تكدر تعبر عن هذا الشي، بس باسلوب بناء و يخلي صناع الاعمال يطورون من نفسهم، لان انت من تتعامل ويه الممثل على اساس الدور الي ديقدمه، انت هنا دتخلي الناس تخاف تقدم فن و تخاف تتعب على شي، يعني اني اتذكر من جنت بالجامعة جان بيوم من الايام احتفال بيوم المرأة العالمي، و حبيت اسوي فلم قصير نعرضه بالاحتفال، فجانت فكرة الفلم هيه انو وحده شافت بنيه و ولد كاعدين ديسولفون من بعيد فراحت افترت على كل الجامعه و حجت عليهم انو همه يحبون بعض و اكو علاقة، و بعدين بالاخير يطلع الولد و البنيه ديسولفون بموضوع متعلق بالدراسه و من هالامور و جانت الرساله من الفلم انك لتتدخل بالناس و انك انت تكون شايف شي و هو شي ثاني و من هالامور الي كل الناس تعرفها و بديهيه بس تتجاهلها بشكل غريب، المهم من اجيت دا اسوي الفلم، جنت محتاج ولد و بنيتين و ناس من العامه عادي ذوله جبتهم سهله، البنيه الاولى الي تمثل الشخصيه الي دتسولف ويه الولد لكيتها بسرعه لان دور صعب احد ينتقدك بي لان مدتسوي شي، بس ولا بنيه تريد تسوي الدور الرئيسي، ليش، لان يخافون لا الناس الي حتشوف الفلم حيكون عبالهم انو هيه هيج شخصيتها فتانه و نمامه بالحقيقة و يكرهوها و بالبداية الموضوع مو منطقي، بس من تجي تباوع على ردود افعال المجتمع لهواي اعمال موجودة، راح تلكي انو رفضهم جان منطقي للأسف، المهم لكينه بنيه تسوي هذا الدور و سويناه و حطينه الفلم و عجب الناس، بس الغريب انو رد الفعل الي اتوقعناه طلع العكس تماما، الناس تدرون على منو حجت؟ حجت على البنيه الاولانيه و كالو عليها مو خوش بنيه، الي كلنا انها شخصيه مدتسوي شي بالفلم فمحد راح يحكم عليها و انما راح يحكمون على الشخصية ام التصرف السيئ، بس صدك المجتمع مينحزر. 

اني هنا مدا اطلب منك انك ما تنتقد المسلسلات و الافلام و الاعمال الي تشوفها، بالعكس، هذا شي كلش زين حتى تساعد على تطوير مجال الاعلام و السينما بالعراق، اكو هواي ناس حتكول و ليش نطور الاعلام خوب نطور اشياء اهم، و هاي مغالطه هواي ناس توكع بيها، لان تطوير مجال معين بالبلد او بالمجتمع هو يلعب دور بتطوير البلد بشكل كامل، لذلك احنه لازم ندعو لتطوير كل المجالات، الاعلام و الميديا و الطرقات و الكهرباء و الخدمات العامه و التجارة و الزراعة و الموسيقى و الصناعة و الطب و التمريض و الهندسة و النفط و الاتصالات و السياحة و الرياضة و غيرها هواي من المجالات، و كلنا نعرف ان كل مجال اله ناسه الي مهتمين بي و ديطورون بي او الي مستغليه و ديخربون بي او الي مستهلكين اله، لذلك من نطالب بتطوير مجال معين و نحاول نسوي هذا الشي مراح يخلينا نغفل عن المجالات الثانيه الي لازم نحط عيوننا عليها و نشوف شنو مشكلها و نطورها. لذلك من تجي تكلي مجال الاعلام مو مهم نهتم بتطويره فانت غلطان. 
و بالاخير لازم نعرف ان الفن هو مرآة الدول، و الصارحة اني ماحب تكون مرايتي وصخة و شكلها مو حلو، مو حتى اتباها بيها كدام الناس او اكوللهم باعوا مرايتي شكد حلوه، لان ما مهتم لرأي الناس بمرايتي بس لان هاي مرايتي فلازم تكون حلوة و لازم تكون هاي كوالتي. و كذلك الفن.