اكو احتمالين، يا اما همه ميعرفون قيمتها فديسوون عليها حدود و قوانين، يا اما همه يعرفون قيمتها فديسوون عليها حدود و قوانين

وياكم فلان و هاي الصوتية الثامنة من عراقي بودكاست الموسم الثالث، طول عمري احب اكون مختلف، احب اسوي الاشياء الي الناس تبتعد عنها كنوع من التجربة و الخبرة، مو نظام خالف تعرف يعني، و المدرسة اكثر فترة الشخص يبدأ بيها يدور عن هويته و عن نفسه و عن هواياته حتى يشعر بكيانه انه مستقل و متفرد و محد يشبهه، بس للاسف احس عدنا المدرسة موجودة حتى تمحي وجودك و تمحي اي شي يميزك او يحسسك انك شخص مستقل و مو واحد من القطيع، المهم بفترة من حياتي جنت احب اجرب حلقات شعر مختلفه و جان صديقي حلاق فجان يساعدني مرات بيهن، المهم و بمرة سويت حلاقة مختلفة شويه و هي عبارة عن شعري كله محلوق على درجه خفيفة تقريا واحد او ثنين مادري و خطوط 2 على اليمين مرسومات بالشفرة مال حلاقة تلتقي ب3 خطوط جاية من اليسار بظهر راسي، فمسويه شكل انسيابي تشكيلي مميز، طبعا اني جنت ادري الحلاقة بهيج شكل ممنوعة بالمدرسة، فقررت البس طاقية او شفقة بوقت المدرسة حتى لحد يشوفها من المدرسين، و اول يوم داومت بي بهاي الحلقة جاني استدعاء للمدير، ليش ؟ عبالك علمود شعري مو؟ لا جان علمود شغلة ثاني احتمال اسولفها بغير صوتية، فخليها ببالك، المهم استدعوني علمود مشكله ما و جان ابويه موجود فالمهم وره ما خلصت المشكله و اني طلعت مالي دخل بيها كلي المدير يلا روح لصفك، المهم انداريت دا اروح جان يصيحلي المدير مرة ثانيه!! انداريت كلتله نعم، جان يكول ليش لابس شفقة كلتله لان حلاقتي خفيفة و ابرد، جان يكول لا انزعها خلي نشوف حلاقتك الحلوة. وفاني نزعتها و هنا كام يصيح و هاي شنو الاستهتار و قلة الحياء و من هاي الامور و شرط على ابويه اني احلق صفر يلا يرجعني للمدرسة، و بالفعل رحت للحلاق بنفس اللحظة و حلقت صفر….. و هاي جانت المره الاولى و الوحيده الي احلق بيها صفر، و كرهت شكلي بوقتها لان كلش مجان عاجبني و بس اريد شعري يطلع مره لخ بس كلش اتاخر ماعرف ليش، او يمكن اني حسيت المده طويلة لان جان فدشي كلش مزعج، زين اني عندي هنا سؤالي؟ تسريحة شعري بشنو تضر؟ لا تضرني، ولا تضر غيري، و مراح تأثر على تحصيلي الدراسي، و مراح تخليني انسان احسن، اكو هواي قوانين بالنظام التعليمي عدنه ماعرف ليش موجودة اكو احتمالين، يا اما همه ميعرفون قيمتها فديسوون عليها حدود و قوانين، يا اما همه يعرفون قيمتها فديسوون عليها حدود و قوانين، هسه انت حتكلي شنو الفرق؟ لا حبيبي الفرق جبير بس قبل ما نفهم الفرق، لازم نفهم شنو قيمتها؟شنو قيمة تسريحة الشعر و شنو قيمة لون الاظافر و طولها، او لبس الشفقة او لبس اكسسوار معين او الحجاب الملون او حتى اللبس على غير اللبس الموحد، و هواي امثله راح تكون اجت ببالكم هسه انكم انحرمتوا منها بالمدرسة. 


التفرد و الاستقلالية و غيرها من هاي الكلمات الي تكون ثكيله على المستمع هيه اساس ابداع الشخص و شغفه و تطلعه للمستقبل و لامكانيات هذا الشخص و طموحاته، انتي هسه حتكلي اوكف اوكف كل هذا من وره تسريحة شعر؟ لحظة خلي افهمك قصدي و لتصير عجول، اتخيل غرفة بيها مجموعة من المراهقين الي كلهم لابسيت قميص ابيض و بنطرون رصاصي، و كلهم حالقين شعرهم نفس الحلقة، هل راح تشوف بيهم اي احد مميز؟ ممكن تحس اكو طاقة طالعة منه و تريدك تنتبه عليها او على الاقل تفهمها، مراح تكدر لان كلهم نفس الشكل و نفس اللبس، بس هذولة الي ما لايكتلهم التسريحة المفروضة همه الي حيتميزون، زين هسه اريدك تعوف هذا التخيل و تتخيل شي ثاني، اتخيل انت واحد من هذول الطلاب الي لابسين قميص ابيض و بنطرون رصاصي و حالقين نفس الحلقة، و انت عندك افكار و طاقة  تريد تبينها بيك و تحس بانك شخص مميز، شلون ممكن تعبر عن هذا الشي؟ اذا كل الناس عليه نفس الشكل، مثل مشهد علي بابا و الاربعين حرامي الي طلع بفلم الحاسه السابعة، راح البطل ديمثل دور بهذا الفيلم و حطوه ويه الاربعين حرامي، كلهم لابسين نفس الشي و نفس المكياج، كام يصيح و يكلهم اكو هواي مني هنا و مقبل يكمل التصوير لان محد راح يتذكره او يميزه. 

طبعا ممكن حظرتك تكون من الاشخاص الي متفرق وياهم يكونون مميزين و يحبون يكونون مرتاحين من هذا الشي و هذا الشي طبعا من حقهم، بس هم من حق الي يريد يحلق شعره بطريقة معينه الي تريد تطول اظافرها الي يريد يلبس لفحة لان تدفيه او لان بيبيته مخيطتلهيا و هو يحبها، ممكن تريد تلبس ساعة او تراجي، و اكو الي يحبون الهدوم الواسعة او الي تحب انها متربط شعرها، او يحب فريق معين فيلبس شفقة عليها شعار هذا الفريق. يمكن بالنسبه الك هاي الاشياء سخيفه بس صدكني هاي الاشياء تفرق، تعرف من يبدأ الشخص يحس بذاته و بتفرده شنو من احساس هذا و شنو من تأثير ممكن يصير على الشخص يخليه يبدع و يبتكر و يحاول يعبر عن نفسه بطريقة افضل،  تدري إن الوعي الذاتي يخلي الشخص يبدأ يمارس التفكير والاستبطان اليومي ينطي لكل واحد منا الفرصة حتى يلكي الي يريده حقا صدك من هاي الحياة الثمينة، احنه كلنا نتأثر بالعوامل الخارجية و التحيز الشخصي، بس مصيبة اذا دنتأثر بيها بدون ميكون عدنه الوعي الذاتي و بدون منكون نعرف منو احنه و شنو نحب و شنفضل.

اني هنا مدا اعلن الحرب على الزي المدرسي او القوانين المدرسية، بس اريد من عدنا نفكر شلون ممكن نخلي المراهقين و الاطفال يندلون طريقهم الي همه يريدوه و نساعدهم يبدعون بي، و بنفس الوقت نفهم قيمة الاحساس بالاستقلالية و التفرد و اهميته بالنسبه لكل واحد بينا.