الفرق بين الدولة الدكتاتورية و الدولة الديموقراطية من ناحية حرية التعبير هو شي واحد، بالدكتاتورية لازم الشعب كله عنده صوت واحد و لغة وحدة مو بالمعنى الحرفي و ذوق واحد و أي واحد عنده رأي مخالف او ذوق مختلف راح يتم التبليغ عنه و اعتقاله و الانتقام منه. بالمقابل بالدولة الديموقراطية الشعب عنده اراء متنوعة و اهتمامات متنوعة و التعبير عن الرأي بطرق متنوعة ما دام هذا الشخص مديعتدي على احد، برأيك، منصة بلغ ليا دولة تنتمي من هذول؟ 

وياكم فلان وهاي الصوتية السابعة من عراقي بودكاست الموسم الثالث، الموضوع باختصار انو وزارة الداخلية انشأت منصة الكترونية تفوت عليها حتى تبلغ عن المحتوى الهابط الي يطلعلك بالسوشل ميديا، و اختارت مجموعة من الانفلونسرز العراقيين حتى يكونون الوجه الاعلامي لهاي الحملة، و حتى يكدرون يطبون للناس من خلالهم، و خصوصا انو محتواهم يعتبر هادف و يهدف للاصلاح و يهدف لنشر الثقافة و يهدف لانتقاد الحكومة الي همه هسه ديشتغلون وياها، و طبعا بدأت الحملة قبل كم اسبوع و الناس سمعت الخبر و الدنيا انكلبت و كل الناس كامت تكول هيييي يلا نبلغ عالناس الي محتواها هابط، بس دقيقة! شلون نعرف هذا الشخص محتواه هابط لو لا؟ كالوا بسيطة المحتوى الهابط هو الي يكون بي ابتزاز او تحرش او يخل بالذوق العام و مينسجم ويه الاداب العامة، زين الابتزاز و التحرش افتهمناها و بالاصل هذا الشي موجود بالقانون العراقي و ممكن نستخدم المنصة بهذا الهدف حتى نبلغ عنه تمام، بس شتقصدون بالذوق العام؟ يعني من الي حدد معايير الذوق العام، لان الانسان من جان يعيش بالكهف جان يعرف ان مو كل الناس عدها نفس الذوق، فبهاي الحالة شنو الميزان الي حنوزن بيه هذا المحتوى؟ اكيد طبعا هسه انت رحت للكيبورد تريد تعرفني على الاشياء الي تعتبر تخدش الذوق العام، بس للاسف احب اكلك انت الي راح تكتبه هي الاشياء الي تخدش ذوقك انت شخصيا، و هاي مشكله لان مو شرط كل الناس تتفق وياك بهذا الشي و بهاي الحالة منكدر نسمي ذوق عام، صار ذوق خاص وللاسف ناس هواي تعامل ذوقهم الخاص معاملة الذوق عام و يبدؤون يعاملون الناس من اذواق مختلفه على انهم ناس مو طبيعيين و ناس لازم نربيهم و ناس لازم ننتقم منهم و نحطهم بالسجن و الله ليش؟ لان محتواهم سخيف او محتواهم تافه! من حقك تكون سخيف و من حقك تكون تافه! عمرك شفت بلد عالكوكب كله ماعدها شخصيات تافهه و مشهورة او شخصيات سخيفه و مشهورة، الموضوع جداً عادي بكل العالم، هل وجود هذا المحتوى التافه راح يأثر على الاجيال الجايه و يخربها بكد التأثير الي يسببه النظام التعليمي الي موجود بهاي البلد؟ و اني هنا دا احجي عن المحتوى التافه و السخيف مو محتوى الابتزاز و التحرش بالاطفال و التهديد فلحد يخلط، عبود سكيبه اعتقلوه بس لان يحجي انكليزي غلط بلكنه امريكيه مرتبه و يضحك الناس، و هسه واحد يكلي لا مو عبود سكيبه طلع براءة و طلعوه، و اني احب اكلك انو مو هنا المشكلة، هنا هي اول نقط سودة على هاي المنصة، لان اعتقلوه بدون ميروحون يشوفون محتواه و بدون ما يدققون وبس لان اكو ناس بلغت و هاي هم مشكلة ثانيه لان هنا الناس اعتبرت انو هذا المحتوى تافه بالنسبه الهم ولازم ينسجن، معناها الناس مو فاهمه القانون و مو فاهمه المنصه و مو فاهمه شلون تستخدمها و العتب هنا مو على الناس و انما على الي بدأ هاي الحملة و عرضها على الناس لان معرف يشرح للناس شنو يعني محتوى هابط و على القانون الي مبنية عليه الحملة نفسة الي مابيه نصوص توضح ماهية الذوق العامة و الميزان الحقيقي لهاي المخالفات و بي فجوات كلش جبيرة و من وجهة نظري انو وجود هاي الفجوات مقصود مو لان الحكومة مدتعرف تكتب القانون او تشرحه و انما حتى يتم استعمال هاي الفجوات بالمستقبل. 


الفجوات الي دا احجي عليها هنا هواي، وحدة منهن ان الناس كامت تبلغ على محتوى تم نشره قبل الاعلان عن الحمله و قبل تطبيق هاي القوانين الغريبه، و مع ذلك تم تطبيق هذا القانون على محتوى قديم، و الصراحة اني اشوف انه اغبى شي ممكن تسويه، هواي ناس شافت هذا الشي و اعترضت عليه بس محد داير بال طبعا، مثل انت تاكل كيمر كل يوم الصبح و بيوم من الايام اصدروا قرار بمنع تعاطي الكيمر بالعراق وفقا للمادة الدستورية كذا و اجو اعتقلوك بتهمة تعاطي الكيمر لان قبل شهر من اقرار هذا القانون جيرانكم شافك دتاكل كيمر و بلغ عنك اليوم، شايفين الموضوع شكد غبي، اني اتذكر من جنت بالجامعة باخر سنه الجامعة قررت رفع الرسوم و بالفعل رفعوها، بس على منو؟ على الناس الي تسجل جديد مو عليه اني و اني بقيت ادفع نفس الرسوم. 

و وحدة من الفجوات الموجودة بالقانون هذا مثل ماذكرت بالبداية انه مو واضح و مال اله معالم، قانون مشوه، تكدر تمطه براحتك، يعني ممكن يجي يوم و تكوم الناس تستعمله بشكل كيدي، يعني اني شخص معاجبني و اني عندي ٤٠ الف متابع على الانستاكرام، شسوي؟ اروح اقنع الناس بطريقة ما انو هذا الشخص سيء و اسوي حملة على هذا الشخص و اخلي حوالي عشر الاف متابع يروحون يبلغون عليه لحد ما ينقبض عليه و اكون بهالطريقة خلصت منه، و هنا اكو نقطة كلش مهمه ماعرف اذا الكل انتبه عليها و هي  ان هاي الحملات موجودة حاليا و خصوصا من الوجوه الاعلاميه لهاي المنصة، هاي الحملات راح يسوي مشكلة، لان انت دتعتمد اسلوب السبام، و الي يلعب اونلاين يعرف شنو قصدي، اسلوب السبام انو يكون اكو صندوق بريد معين او احد معين تكوم تدزله نفس الرسالة كلش هواي لدرجة انك تمنع اي رسالة ثانيه من انها تبين و تغطي على كل الرسائل الثانيه، و هذا بالضبط الي ديصير، لان المفروض من يكون عندك هيج منصة، تعامل كل بلاغ بشكل مستقل مو مهم اذا واحد مبلغ او الف واحد مبلغين، يعني وره اسبوع تقريبا طلع سعد معن مكيف يكول اكثر من خمسين الف بلاغ وصلهم على المنصة، يا فرحتي، انت اذا تروح تشوف هذني البلاغات راح تلكي نصهن على شخص واحد و ربعهن على شخص ثاني و الربع الباقي بيهن كم شخص منا منا، هاي الارقام نتيجة للحملات الي ديسووها على الانستاكرام للتبليغ على شخص معين. لذلك هاي سالفة الخمسين الف ابلاغ متعني اي شي الصراحة. 


وحدة من الفجوات الموجودة بهالقانون و بهالمنصة، انها متمشي على كل الناس، باختصار بس للي ماعدهم ظهر، يعني اكو هواي شخصيات محتواهم اسوء من محتوى الناس الي اعتقلوهم، بس طبعا مو كل العراقيين نفس القيمة بالنسبه للحكومة و بالنسبه همين للي ديسوون حملات مال ابلاغات، لان اتحداكم تسوون حملة على شخص بالحكومة او شخص معمم او شخص بالحشد او شخص ينتمي لحزب من الاحزاب الاجرامية، مستحيل تسووها، مستحيل، لان انتو كدرتكم على الناس الفقره، كدرتكم على الشخص الي اجه للدنيا لكه نظام تعليمي فاشل و حكومه عرجه و اهله يعتدون عليه و ماكو قانون يحمي من العنف الاسري او يكون فاقد لاهله اصلا و نزل للشارع ملكه شغل او لكه شغل ينطيه ملاليم على اشغال شاقة، و بالاخير يتوجه للسوشل ميديا لان لكه بيها خبزة بس معرف شنو يقدم و ميعرف شي بالقانون اصلا، و تطلعلة منصة اليوم و تبلغ عليه على شغله سواها بالماضي و تطببه السجن سنتين ويه المجرمين و القتله وتتوقع منه انه يطلع من السجن شخص احسن، هل هذا الاصلاح برأيك؟ هل انت هنا حليت مشكلة؟ لا طبعا و بالمقابل تعال بلغ على شخص من جهه معينه على محتواه الي كله تهديد و ترويع للناس او ابتزاز او تحرش وشوف شراح يسوي بيك هذا الشخص، واذا جانو ميعرفون منو الي ديبلغ فباختصار راح يتجاهلون بلاغك. 

قبل شويه كلتلك وجود هاي الفجوات مقصود مو لان الحكومة مدتعرف تكتب القانون او تشرحه و انما حتى يتم استعمال هاي الفجوات بالمستقبل، شنو يعني، يعني من يمر فتره و الناس تتعود على هاي المنصة و الناس تتعب من انتقاد و استنكار الاعتقالات الغير منطقية مثل ما صار بموضوع عبود سكيبه تصير الحكومة تعتقل بكيفها، و محد حينتبه، لان اني اليوم اتحركت و انتقدت و استنكرت و اتظاهرت لحد ما طلعوا عبود سكيبة، باجر راح يكون اكو شخص ثاني راح يعتقلوه بسبب بلاغ و هم راح نطلع و نستنكر و ننتقد و يطلعوه و واحد لاخ هم يعتقلوه بدون سبب و نطلع و نستنكر و ننتقد لحد ما يطلع و يعتقلون واحد لاخ بهالطريقة و ونطلع ونستنكر…… اني هسه واني دا اعيد السيناريو تعبت، فانت اتخيل من الناس تتعب من انتقاد هاي الاعتقالات المو مفهومه، شراح يصير؟ راح تصير هاي المنصة اداة بايد الحكومة تعتقل بيها اي واحد ينتقدها من داخل العراق، اي واحد رايه مخالف الهم اي واحد همه ميريدوه، و هاي اخطر فجوة بهذا القانون المطاطي. 

طبعاُ اكو هواي ناس انتبهت لهاي الفجوات الي بهذا القانون و حجت و استنكرت و ناس قانونيين و ناس اصحاب محتويات هادفة، وطبعا هنا بدأ الاستخفاف بعقول هاي الناس و بعقول الناس الي مو فاهمه القانون، فكعدوا بيناتهم و كالوا شلون نسكت هاي الناس الي دتبروز هاي الفجوات، و دتطالب بحرية الرأي، خلي نسويلهم مسابقة مال محتوى هادف حتى نرضيهم،و حتى ليزعلون من عدنه، و ماعرف شلون اتوقعوا انو هذا الشي ممكن يعبٌر على ناس فاهمه مخططك الخبيث و دتحاول توعي الناس لهاي المشكله، متوقع انو نكوم نكمز و نكيف و راح نطلب من الناس نسوي حملات لنشر المحتوى الهادف حتى نحصل جوائز ونفرح و نكول واو الحكومة دتدعم المحتوى الهادف و دتشجع على توعية الشعب و تثقيفه و من هاي الامور؟ 
لا طبعا هذا مو هدف الحكومة هنا لان انت دتشجعني اسوي محتوى هادف و بنفس الوقت دتقمع اي محتوى ميعجبك بشكل انتقامي غير مبرر، لذلك اني عن نفسي ما اريد احد يدعمني باسم هاي الحملة و اعرف هواي ناس و صناع محتوى رأيهم من رأيي، و المشكله حتى بموضوع المحتوى الهادف ماكو ذوق عام يحدد المحتوى الهادف، يعني اكو ناس على سبيل المثال لا الحصر، المحتوى الموسيقي، اكو ناس عدهم محتوى موسيقي يخبل، يسوون موسيقى شكاكية بشكل احترافي و تنافس موسيقى عالمية، هل ممكن هذا نعتبره محتوى هادف؟ اني بالنسبه الي اعتبره محتوى هادف، اكو شريحة جبيرة من الناس تعتبر الموسيقى حرام و ممكن تعتبره محتوى هابط، حتى اكو ناس تطلب مني بالتعليقات اني اشيل الموسيقى من مقاطعي لان حوديهم للنار، طبعا مدا احجي على الناس الي معاجبها تسمع الصوتيه بدون موسيقى، لذلك اني كمت انزل على اليوتيوب الصوتيات بنسختين، نسخه بموسيقى و نسخه بدون موسيقى، لان مستحيل تكدر ترضي الكل. 

، اخيرا، حملة دعم المحتوى الهادف لو جانت بريئة و مابيها ابعاد ثانيه و ماكو قانون قمعي بظهرها جان اني اول واحد رحبت بيها، بس للاسف مو هذا الي ديصير، حتى الناس الي دتسوق لهاي الحمله مو مهم عدهم دعم المحتوى الهادف،و تقريبا هواي من صانعين المحتوى العراقيين ميريدون يدعمون احد غير نفسهم أو احد من العصابتهم، و اني من اكول العصابه هنا، اقصد بيها بعض تجمعات صناع المحتوى العراقي الي يتعاملون ويه السوشل ميديا معاملة العصابات الي بالشوارع، نظام انت يا ويايه يا عليه يا تسكت و متجحي، و اني ما الوم صناع المحتوى الي يريدون مصلحتهم و بس، هذا الشي من حقهم تمام، بس خلو الناس تقدم المحتوى الي تريده، الي يريد يسوي محتوى تافه، خليه يسوي محتوى تافه، يريد يكون سخيف خليه يصير سخيف، يريد يسوي محتوى علمي او ثقافي او توعوي، خلي يسوي الي يريده، لان ميصير انت هنا تكون تنتقي الي يعجبك و تحبس الي ميعجبك و تدمر حياته، لازم تعرف تفرق بين الشخص التافه و المجرم الحقيقي، تبلغ عن شخص يتحرش بالاطفال، برافو عليك، تبلغ عن شخص يهدد أو يبتز، برافو عليك، تبلغ عن شخص يشجع على غسل العار او الاخذ بالثار، برافو عليك، هذا هو المحتوى الي لازم نبلغ عليه لان بي اذيه للناس، و طبعا اكو ناس دتردد مقوله و هي انو الحكومه دتحاول تحمي اطفالنا من الضياع بسبب هيج محتوى، لا صديقي مو هيج تحمي الاطفال من الضياع، تحمي الاطفال من تسوي قانون عنف اسري، من تسوي نظام تعليمي بي خير يطلع الطفل منه شخص عقلة واعي و يفتهم، من تجرم عمالة الاطفال و تخلي التعليم هو الاهم بالنسبه للطفل، و خلي موضوع منع الطفل من مشاهدة هيج محتويات على الاهل، ماكو اسهل من انك تمنع هذا الشي من تلفون ابنك، بس الناس متريد تدوخ نفسها، ليش اربي ابني، خلي الحكومة تربيلي ابني، تربي على ثقافة القمع و السكوت و الاعتقالات و عدم تقبل الاخر. و أكو ناس تكول لان هيج محتوى ديخرب صورة العراق على السوشل ميديا، يعني انتو مشايفين محتويات تافهه من غير دول، ليش ما حكمتوا على اهل هاي الدول من خلالهم؟ لان اكو صناع محتوى ممتازين يراوون الجوانب الايجابية بالبلد و لعلمك بآخر فترة صورة العراق بالسوشل ميديا احسن من اي وقت مضى لأن تكدر تشوف يوتيوبرز عرب و اجانب كامو يروحون للعراق واكو تسويق كلش جبير بالسوشل ميديا لزيارة العراق و الاطلاع على ثقافته، ، هذا غير كأس الخليج و تأثيرة على صورة العراق امام المجتمع الدولي و امام الشعوب المجاورة بعد ما حسو بكرم العراقيين و طيبتهم و ثقافتهم، لان اذا هذا اهتمامك فاني احب اكلك عدنا محتوى هادف مثقف و واعي على السوشل ميديا، بس يحتاج جمهور واعي و هاي بايدكم من خلال سن القوانين المناسبة الي تدعم الانسان العراقي و تنطي تعليم مناسب و تنطي فرصة يكون انسان فاعل، بس احنه الي كلش مركزين ويه التفاهة و السخافة و قمع الحريات و هذه كال كذا و البارحة مكدرت انام لان ذوقي العام مخدوش و من هاي الامور، لذلك اتمنى نلكي حل لهاي المنصة باسرع وقت، قبل لا يجي ترند جديد ينسينا هذا الترند مثل ما هذا الترند نسانه موضوع اغتيال طيبة العلي.