اكو يوتيوبر سعودي اسمه سحاب، يسوي ردود افعال على اغاني و فيديوهات، فد مره سوه فيديو رد فعل على اغنية عن كلاش، الي ميعرف كلاش هو رابر سعودي كلش مشهور على مستوى الوطن العربي، المهم بعد كم يوم واحد من جمهور كلاش سئل كلاش على الانستاكرام عن هذا اليوتيوبر و جواب كلاش جان كلش غريب و كلش مو متوقع. 

وياكم فلان و هاي الصوتية الخامسة من عراقي بودكاست الموسم الثالث، رد كلاش جان: اني عرفته اللي تتكلم عنه سبحان الله من وجهه يبان انه فيه بلاهة منغوليه، الله يشفيه، و هو برضو مصاب بمتلازمه اسمها متلازمة داون و الى اخره من هذا الرد، 
هنا الدنيا انكلبت على كلاش و كل الناس استنكرت هذا الكلام، بس مو كل الناس! الغريب انو اكو ناس كامت تدافع عن هذا الكلام، المهم بعد فترة كصيرة كلاش قرر يركع الي كاله و المشكله انه سواه اسوء، كال: اني ما اقصد الي عدهم متلازمة داون انما اقصد الي من دولة منغوليا، و حط علم منغوليا، صدك تحجي؟؟!! اولا انت كان قصدك على الي عدهم متلازمه و انت كلت هذا الشي من البدايه و هسه جاي تقنع الناس انك مو هذا قصدك، تعرف شنو المشكله، المشكله انك دتستعمل هاي الكلمه كإهانه، مو مهم اذا كان قصدك الحالة الطبيه او البلد، لانك اذا قصدك على البلد فانت عيب عليك تستعمل جنسية بلد معينه كإهانه، اتخيل واحد يسب على واحد يكله يا سعودي او يا عراقي حتى عود يستنقص من هذا الشخص، و اذا كان قصدك الحالة الطبية فهي اسمها متلازمة داون و هي نقص كروموسوم معين يأدي الى تغير بشكل الطفل و بقدراته العقلية و جان تعبير منغولي زمان يستعملوه على اصحاب هذا الاختلاف لان ملامحهم تصير قريبه من ملامح العرق المنغولي و العرق المنغولي مو بس بدولة منغوليا و انما في شرق اسيا و الجنوب غرب اسيا و المكسيك و سكان امريكا الاصليين، و مع الزمن انتبه الناس ان هذا التشبيه غير موفق، فقرروا انهم يلغون هذا المصطلح و يعتمدون على الاسم الطبي الصحيح لهاي الحالة وهو متلازمة داون، مو بس هيج حتى دولة منغوليا بالستينات قدمت طلب بالغاء هاي التسميه من منظمة الصحة العالمية، و بالفعل الناس بطلت تستخدم هاي الكلمه بكل العالم، بس عدنا الناس مجلبين بيها و تروجلها همين، و اكو رابر ثاني اسمه سلومو اكو بينه و بين كلاش دسات و واحد يرد عالثاني صارلهم سنين، بعد ما شاف كلاش هيج ديكول، نزل سلومو بوست و كال بي انه مراح يكمل بالدسات ويه كلاش لحد ما كلاش يعتذر من كل الي عدهم متلازمة داون و هذا الشي يحترم طبعا، بس احب اذكر ان سلومو الي معاجبه الحجي من يريد يهين كلاش يكول عليه قزم، و طبعا اتمنى من سلومو انه يعتذر من كل الاشخاص الي عدهم تقزم حول العالم قبل ما يطلب هذا الشي من كلاش، المشكلة الاكبر ان الناس الي تحب كلاش اخذت الموضوع لغير مستوى، كامو يطبون على البوستات مال اليوتيوبر و يحطون علم منغوليا بالتعليقات، يعني هذوله شتكوللهم بالله! حتى واحد كتبلهم بالتعليقات ميصير هيج و عيب و من هالسوالف، واحد رد عليه كله شكلك انت هم منغولي فدتدافع عنه! فانت اتخيل لاي حد وصل المستوى و شكد اكو جهل بالمجتمع و شكد اكو ناس تابعه لاشخاص بدون تفكير، يعني اني احب كلاش اذا كلاش كلشي يكوله صحيح مو مهم شنو ديكول، مثل الحمله الي سواها البشير على نشأت اكرم على سالفة شركة برو و على اساس انها صفقة فساد و من هالامور، و بوقتها كل الناس على كل صور نشأت اكرم و كل البوستات الي ينزلها الناس تعلقله بكلمه برو، كنوع من الحرب على الفساد، بس اذا تروح تدور وره الموضوع اكثر، راح تعرف ان الموضوع مفبرك و شركة برو عدها تعاقدات بالخليج و باوروبا و صدك الشركة موجودة و حقيقية و تعاقداتها صحيحة، المهم هذا مو موضوعنا، طبعا هواي منكم هسه ديدور ببالهم سؤال وهو: احنه شعلينا بكل هالحجي و منو كلاش و منو سحاب و احنه ما مهتمين لهاي القصة كلها، و اني وياك عندك حق تفكر بهالطريقة، بس هسه اشرحلك وين اريد اوصل بكل هالسالفة، خليك وياي، 

بمجتمعنا اكو هواي كلمات احنا لازم نعيد النظر باستخدامها، و اكبر مثال هو كلمة منغولي، يعني اني انتبهت على هذا الشي من هواي عراقيين، دائما يذكرون كلمة منغولي و مو بس على الي عدهم متلازمة داون و انما على كل شخص يكون عنده اعاقة جسدية او عقلية، لذلك لازم نبدأ نتخلى عن هاي المصطلحات و نسمي الاشياء بمسمياتها، و اذا انت متعرف شنو الاسم العلمي للحالة الي انت دتشوفها كدامك فالافضل انك متذكر هذا الشي من الاساس، مو لان متعرف شنية الحالة فتكول منغولي، لازم تفتم كلش زين ماكو حالة اسمها منغولي، خلص شيلها من قاموسك. 

طبعا من تتمعن بلهجتنا، راح تلكي هواي كلمات لازم نشيلها من قاموسنا، و هواي كلمات تكون نكولها لبعض للتعبير عن شكل هذا الشخص او أصله، بس بطريقة مهينة او هدفها الاهانة، كلمات مثل شنو؟ 
كلمة زركة او مجولحة، يعني بنيه لون بشرتها مو ابيض، اني بالبدايه مجنت مفتهم من احد يكول زركة او حظ الزركة، بس من افتهمت شنو يقصدون و انها كنوع من تقليل من وحده بس لان لون بشرتها مختلف او شكلها مو عاجبج او عاجبك، اني اريد اسألج او اسئلك، شنو احساسج من تكولين على وحده زركة؟ لا جديات شنو الفكرة؟ هل احد طلب رأيج بشكلها او لون بشرتها حتى تتلفضين بهيج الفاظ؟ لان الصراحة التفسير الوحيد الي ديجي ببالي عن سبب استخدامج لهاي الالفاظ هو عقدة النقص، و من اكول عقدة النقص مو معناه هيه احسن منج، بس انتي شلون شايفه روحج و شلون تشوفين العالم الي حواليج هو الي يحدد شنو نوع النقص الموجود عندج او عندك، 
و طبعا عندك كلمة عبد الي ماعرف ليش بعدها موجوده بحياتنا، هل انت عندك عبد مثلا و دتبيع و تشتري عبيد، هل انت عايش بعصر العبودية و الانتهاك الي جان ديصير بحق البشر بالماضي؟ لان ما افهم ليش اكو ناس بعدها تستعملها، و من تكله ميصير تكول هيج، يكلك لا طبعا مو قصدي على لون بشرته، و انما كلنا عبيد الله و من هالملاعيب، يعني تبرير سخيف و طفولي و مراح يغير الحقيقة و مراح يغير نظرتك الدونيه للاشخاص من اصحاب البشره الي اغمق من بشرتك، و اذا انت صدك متعنيها و تكولها لان اتعلمتها من اهلك او من مجتمعك، فببساطة، لتكولها حاول تتعامل مع الانسان الي كدامك كانسان، اعتبره شفاف انت مدتشوفه، لادتشوف شكله و تكول منغولي ولا دتشوف لونه وتكول عبد او مجولح ولا دتشوف طوله و تكول طنطل او قزم و لا دتشوف جسمه و تكول مدعبل لو معصعص، ولا دتسوف خشمه و تكول افنص ولا ولا ولا ولا، خلي الانسان الكدامك شفاف، انت هس سد عيونك و اريدك تتخيل شخص شفاف، تكدر؟ تكدر تعرف اي شي من مواصفاته الخارجية، متكدر مو، زين اريدك و انت ساد عينك و دتتخيل الشخص الشفاف الي مدتكدر تشوفه، اريدك تتخيل انه ديكتب شي او ديكول شي،  شنو كلك؟ ماريد اعرف، بس هسه انت كمت تعرف هذا الشخص صار عندك فكره عنه، مع انك متعرف شكله فمكدرت تصدر عليه احكامك السطحية، مثل ما انت هسه متعرف شكلي وانت دتسمعني بس تعرف عن افكاري و عن توجهاتي، و على اساسها انت تقبلني او ترفضني، شكلي مجان اله الي تأثير على حكمك عليه، و هذا الشي انت لازم تطبقه على كل شخص انت تشوفه بحياتك، اذا جان شخص راح تقضي وياه وقت هواي او شخص عابر حتشوفه لثواني بحياتك. 

طبعا من تركز اكثر بلهجتنا، راح تلاحظ انو لهجتنا بيها حجي كلش حلو، مثل عيوني و اغاتي و وردة و فدوة لقلبك و من هالحجي الي حلو انك تسمعه و حلو انك تكوله همين، بس عدنا انواع هواي من الحجي الي مينحجي، من الحجي الي يقلل من جمالية كلامنا و التعبيرات الحلوة الي نكولها، اني ذكرت منها هواي بالقسم الاول من هاي الصوتية و ذكرت بعضها بصوتية بالموسم الاول، جان اسمها التشويه العراقي، روحوا سمعوها راح تعجبكم، بس الاريد احجي عنه هسه هي الكلمات الي نوصف بيها شخص نسبة الي منطقة معينه او خلفية معينه كنوع من الاهانه او الاستنقاص، كلمات مثل: شروكي، معيدي، كردي، ناصرية، مصلاوي، محافظات، و الى اخره، 

طبعا اذا هسه احد مو عراقي يسمع الصوتية محيفتهم شنو المهين بانك تصيح لشخص باسم منطقة معينه، و اني راح افهمك، كردي معناها شخص غبي و هي منسوبه للاكراد و طبعا هذا الشي مو صحيح، مصلاوي، معناها شخص بخيل و هي منسوبه لاهل الموصل، و هذا الشي مو صحيح طبعا، ناصرية، معناها شخص خبيث و هي منسوبه لاهل الناصرية بالعراق و طبعا هذا الشي مو صحيح، و محافظات و معناها شخص جاهل لان جاي من محافظة و مو من العاصمة و هذا الشي هم مو صحيح، لتكلي انت عمرك مشايف واحد جاهل من بغداد مثلا او بخيل من البصرة مثلا او خبيث من الانبار مثلا، موقعك الجغرافي ابد ميحدد مستوى ذكائك او ثقافتك او كرمك او طيبتك، الموضوع اعمق من هالسطحية الي انتو تحجون بيها، لذلك اتمنى انكم تعوفوها لسالفة المناطق هاي لان تره كلش مو حلوه و كلش مو صحيحه و كلش تسوي حزازيات و تفرقة بين الناس، ماكو شعب كله بخيل و لا اكو شعب كله كريم و ماكو شعب كله ذكي ولا كله غبي، لا كله جاهل و لا كله مثقف، و بكل الحالات انت لو شفت احد بي اي صفة معاجبتك من الصفات الي انذكرتها، مراح تخسر شي اذا سكتت و مذكرت اسم منطقة بالعراق، بالعكس راح تخسر اذا حجيت. 

طبعا اكو منكم كالو هاي شنو انت ذكرت معيدي و شروكي ببداية هذا الجزء بس مذكرتهن بشي او علقت عالموضوع، شوف صديقي، اني و بحكم بعدي عن العراق فما اعرف المعنى الحقيقي لهالكلمتين، و بسبب هذا الشي، فتت على كوكل و كتبت معنى كلمة شروكي و كلمة معيدي، و طبعا لكيت ٩٠ معنى، كل واحد يكول شكل، الي يكلك شروكي كلمه سومريه و الي يكلك المعدان جانو يمثلون رئة العراق الثقافية و الي يكلك شروكي الي هو من شرق الفرات و الي يكلك المعيدي الي عايش بالاهوار و يربي جاموس و كلش هواي معاني متخلص، و الصراحة معظمها معاني زينه و مابيها اي انتقاص من الانسان، زين شنو الي يخلي الناس تعوف كل هاي المعاني الزينه و تستخدم هاي الكلمات بس للاهانه و الاستنقاص؟ ماعرف الصراحة!! بس متأكد اكو هواي ناس تعرف.