أشياء لازم تتركها بالسنة الجديدة. 

وياكم فلان و هاي الصوتية الرابعة من عراقي بودكاست الموسم الثالث، حياتنا عبارة عن فصول، كل فصل نعيش بي بشكل مختلف عن الفصل الي قبله، و طبعا من عنوان الصوتية، حظرتك اتوقعت انو كل سنة بحياتنا هيه فصل، و مو هذا الشي الي اقصده، لان كل فصل اله مده زمنية انت تحددها، ممكن تكون شهر او سنه او سنتين او عشرة او حياتك كلها تكون فصل واحد، انت الي تحدد شوكت تريد تنتقل من فصل الى فصل، انطيك مثال، يعني انت تكون تشتغل بمكان معين لمدة ٣ سنين و بعدين تقرر انك تغير كلشي و تلكي شغل جديد او تبدا مشروع، هنا انت انتقلت من فصل الى فصل، و نفس الشي الارتباط، الصداقة، العائلة، الهوايات، و غيرها، و هاي كلها فصول واضحة ممكن نعرف شوكت بدأت و شوكت انتهت، بس اكو نو ثاني من الفصول و هي الفصول الفكرية، يعني انت تتغير افكارك من فصل الى فصل، يعني انت تكون تفكر بطريقة و فجأة تقرر تغير تفكيرك اتجاه شي معين، او رايك تغيره بموضوع معين، او ايمانك يتغير بشي معين و هاكذا، ولذلك اني اعتبر الفصول الفكرية هيه اهم فصول انت تنتقل بينها بحياتك و هي الي حتساعدك تنتقل بين الفصول الحياتية الي ذكرتها بالبداية مثل الشغل و الدراسة و العائلة و غيرها، و معظم الناس تحاول تلكي تغيير جديد على بداية السنة الجديدة بس هذا مو معناه انك لازم تكون محدد بتوقيت معين حتى تبدأ تسوي هاي الأشياء لان معظم الاشياء المذكورة تحتاج وقت و ممكن سنين لحد ما تحس انك كدرت تغيرها بيك، بس المهم انك تبدي، تكدر تبدأ من بداية الشهر الجاي او الاسبوع الجاي او حتى اليوم الي جاي، بس حتى تبدأ هذا تتخلص من هاي الاشياء و قبل ما تاخذ خطوة للفصل الجديد، لازم تفهم شي كلش مهم، لزم تسد الباب على الاشياء و العادات الي راح تعيقك باتجاه التغيير و تتخلى عنها، لانك مراح تكدر تنتقل للفصل الجديد و انت بعدك مجلب بالفصل الي قبله، و التخلي عن عاداتك او تصرفاتك هو من اصعب و من اقوى التصرفات الي ممكن تتصرفها. لذلك خلي هذا الشي بعين الاعتبار، و خلينا نبدأ ب15 شي لازم تتخلى عنه حتى تكدر تدخل الفصل الجديد من حياتك و تكون سنتك الجديدة افضل، خلينا نبدأ: 

أول شي لازم تغيره هو تفكيرك انك مو مستعد لشي معين او مشروع معين او خطوة جديدة، ماكو احد ممكن يكون مستعد ميه بالميه لكل الفرص الي تجي بطريقه، يعني اني من بدأت هذا البودكاست مجنت مستعد، و من دخلت لهاذا الشغل الي اني بي مجنت مستعد و من سافرت من المكان الي عايش بي طول عمري مجنت مستعد، و لو كل مره اني مجنت مستعد بيها، اتراجعت و كلت من يجي وقتها او من اكون مستعد، عمري ما راح اسوي اي شي من هاي الاشياء، يعني اول بودكاست سويته بحياتي جان قبل ٩ سنين، و اتذكر بوقتها جنت ويه صاحبي بالجامعه و كاعدين بالباص دتسولف بالتلفون ويه احد ثالث و كلنا بنفس المكالمة و بعدين كلنا دقيقة ليش منسوي بودكاست، و يومها اني بنفس اليوم اول ما رجعت للبيت سويت صفحه مال بودكاست و قناة على اليوتيوب و نزل اعلان، و بوقتها صاحبي يكلي انت هيج ورطتنا و احنه كلش ما محظرين و مو مستعدين و  ما عدنا مايكروفون او اي خبره بتسجيل البودكاست و هالامور، و صدك احنه جنه ابد مو مستعدين، بس شنو جبرنا روحنا نسجل الحلقه وننزلها و بوقتها كل الجامعه سمعتها و كلش انعرف، و فكرة البودكاست هيه جانت انو جنه دنحجي مشاكل الجامعه و نسوي مقابلات و يه طلاب و مدرسين و اصدقاء، الشاهد هنا انك عمرك مراح تكون مستعد لشي معين لحد ما تبدأ بي. 
بالمناسبه اني راح اسويلكم فيديو على اليوتيوب شلون تبدأون بودكاستكم الخاص قريبا، فروحوا اشتركوا بقناة اليوتيوب اذا انتوا مهتمين بهاذا الشي.
ثاني شي لازم تغيره هو انك تبطل تكون ساكن بالماضي او قلق من المستقبل، و تركز بالحاظر، اذا انت تريد تتقدم بحياتك لازم تبدأ تفكر بهاي الطريقة، يعني عندك مثلا المنتخب العراقي بسنة ٢٠٠٧ فاز بكأس آسيا و هذا جان اكبر انجاز للكرة العراقية، بوقتها كل الشعب جان متوقع ان المنتخب العراقي راح يظل قوي و راح يظل يتقدم و يصعد كاس العالم و من هاي الامور، شنو الي صار، المنتخب ظل يتراجع و يتراجع و احنه صارلنا ١٦ سنه نغني، تتذكرين لو ناسيه، احنه ابطالج اسيا، اني اشوف انو احنه الي لازم ننسى انا ابطال اسيا بيوم من الايام مو اسيا الي تنسى و نركز شلون نكدر نطور المنتخب و المنظومة الرياضية بالعراق، مو نكعد نبجي كل يوم على كاس آسيا الي فزنا قبل ١٦ سنه، و بنفس الوقت منكون خايفين من المستقبل، الاحسن انه نشتغل بكلشي عدنا حاليا حتى منخاف من المستقبل و بنفس الوقت نعوف الماضي الي مجلبين بي، نفس الشي من معظم العراقيين من يريد يوصف العراق، يكول احنه مهد الحظارات و احنه الي اخترعنا كذا و اخترعنا كذا و احنه الي جنه الدولة الاولى بكذا، و نظل نذكر بأمجاد الناس الي سبقتنا، ليش ما نفكر نبني امجادنا احنه، ليش دائما عايشين بالماضي و منريد نشتغل على البلد اكثر حتى نوصل هاي البلد الى مكانتها الي احنه نشوف انه تستحقها، لان موضوع التاريخ و الماضي حلوه و جميله و على عيني و راسي، بس خذا الشي مراح يغير الواقع الي احنه بي، المفروض نشوف اجدادنا شلون كدروا يتعافون من كل الانتكاسات الي مرت بيها البلد على مر العصور، لازم نباوع على اليابان الي بعد ما انظربت بالنووي و كل العالم كال هذوله بعد ما الهم رجعه، و الي صار انهم رجعوا و صاروا بمقدمة الامم، و مكعدوا يبجون على الاطلال و يفكرون بلدهم شلون جانت عظيمة قبل ما تتدمر، بالعكس صاروا احسن من ما اجنوا بالماضي.
ثالث شي لازم تعوفه هالسنه، هو انك تعيش و انت دتحاول انك ترضي توقعات الناس، يعني باختصار حاول انك تحط لنفسك معايير عاليه و حاول قدر الامكان انك تنفذها، و خلي رأي الناس و توقعاتهم منك اخر همك. لتفكر الناس شتكول عليك من تسوي شي معين، لان بالاخير رأيهم مراح يغير شي، المهم هو رأيك بنفسك من تسوي شي، اذا انت راضي بإلي دتسوي، او لأ، لان اذا انت راضي بهاذا الشي، اذا خليك دتسوي، و اذا انت مو راضي بهاذا الشي فتكدر تغيره، بس اذا غيرك مو راضي او معاجبه فخلي يروح يضرب راسه بالحايط. 
رابع شي لازم تعوفه هالسنه هو انك تبطل تقارن نفسك بغيرك، اني اتوقع انت سامع هاي الجمله من قبل و راح تظل تسمعها: مقارنتك لنفسك و يه الغير هو مضيعة للوقت، الشخص الوحيد الي انت بتحدي وياه بهاي الحياة هو نفسك. لذلك مو مهم غيرك شنو حقق، كل شخص و عاش ضروف مختلفه عن غيره و عنده جينات مختلفه عن غيره، هذا الشي يخلي المقارنه عمرها ما راح تكون عادله بينك و بين اي شخص. 
خامس شي انت لازم تعوفه هالسنه هو التشكي و التذمر، لان اذا اكو شي بحياتك مديشتغل بالطريقة الصحيحة او بالطريقة الي تريدها او اكو مشكله معينه، الاحسن انك تلكي حل الها، مو تكعد تتشكى و تتذمر و تضوج و تزعل، اتوقع حجي عن هذا الشي بصوتيه اسمها ”أولويات الزعل“ روحوا سمعوها راح تعجبكم. 
سادس شي انت لازم تخلص منه هالسنه هو انك تكون ناقد لنفسك بشكل مفرط، يعني انك تنتقد نفسك على كل تصرف تسوي، دائما كول الشي الي انت حاسس بي و الاهم هو انك تكون لطيف مع نفسك، و لتخلي احد يجرك للمكان الي يخليك تنتقد نفسك بشكل لاذع، هذا مو معناها انك ما تعترف باخطائك او تحاسب نفسك، بس لتلوم نفسك على الجبيره و الصغيره و تستصغر نفسك، لان الناس راح تشوفك بنفس الطريقة الي انت دتشوف نفسك بيها. 
سابع شي لازم تتخلص منه عالسنه الجديده هو المماطلة و الصراحه هذا الشي احتاج اطبقة على نفسي، لان لاحظت اني اماطل بهواي اشياء بحياتي و هذا ديمنعني اني انجز كلش هواي مشاريع و اشياء جنت اكدر اسويها بمده اقل او جنت اكدر اني اسويها اصلا، لذلك اذا انت تريد توصل لانجاز او هدف معين، كافي تنتظر و كوم بلش هسه. 
ثامن شي لازم تتخلص منه و هذا الشي كلش مهم هو انك تشيل لكلبك على أحد، لان هذا الشي هو مضيعه للوقت و عائق كدام سعادتك، كل ما جنت اسرع بالمسامحة، كل ما تقدمت اسرع بحياتك، كل ما خلصت اكثر من اي عداوة بحياتك انت ما محتاجها، اعرف ناس اكو بيناتهم عداوة لعشرات السنين، و مشاكل متخلص و حتى اذا ميحجون ويه بعض، يحجون عن بعض او يحفرون لبعض، و من خبرتي بمجتمعنا، اني متأكد اكو احد بحياتك يتصرف بهالطريقة، اذا مجان هذا الاحد هو انت. لذلك حاول تخلص من هاي المشاكل و العداوات و الصراعات باسرع وقت و تسامح و تتجاهل. 
تاسع شي لازم تتخلص منه هالسنه هو انك تحاول تتجنب ارتكاب الاخطاء، الحياة تدور حولين ارتكاب الأخطاء، واغتنام الفرص، و المخاطرة. الخطأ الوحيد الي يمكن يؤذيك صدك هو اختيار انك تتجنب انك تعيش حياتك باخطائها و بتحدياتها و فرصها. اني شخص احاول اتجنب الاخطاء قدر الامكان، ما اكذب عليك، و هذا الشي احاول اغيره، لان هواي فرص فاتتني لان جنت ما اريد اخاطر او اغلط، لذلك، دائما قيم الموقف زين و شوف نسبة المخاطرة، و فوت بيها. 
عاشر شي لازم تعوفه بالسنة الجديده هو انك تشتري الاشياء الي انت متريدها، و هذا الشي كلش مضوجني بيه، لان كلشي يعجبني اشتري، مو مهم اذا جنت احتاجه او راح استفيد منه او لا، يعني لو تشوف شكد عندي اشياء ما احتاجها، و اني متاكد هواي من الي ديسمعون عدهم هاي المشكله، او يعرفون احد عنده هاي المشكله، لذلك لتصرف فلوسك على اشياء انت متحتاجها، خصوصا اذا تشتريها حتى تبهر الناس الي حواليك، لان ما اتوقع حيازتك لاشياء معينه هو مقياس لنجاحك، فلتدوخ نفسك و وفر فلوسك. 
رقم ١١ هو انك تلوم غيرك على اخطائك، انك تلوم غيرك على خطأ انت ارتكبته هو وسيلة انكار، حاول دائما انك تتحمل مسؤولية اخطائك و قراراتك و منو انت. لان حتى اذا انت اقنعت الناي انه مو خطئك، هذا الشي مراح يغير شي من حقيقة انك الغلطان. 
الشي رقم ١٢ الي لازم تتخلص منه عالسنة الجديدة هو انك دائما تكون شخص جدي  بشكل تام، اتوقع الحياة جدية بشكل كافي انك تفكر انك تحطلها بهارات شويه من الونسة و الضحك و تغيير الجو و الحب و المرح، لذلك خليك مرح و اتونس بحياتك و خلي الي حوليك يتونسون بصحبتك و وجودك وياهم، بس لتصير سخيف ههههههه
الشي رقم ١٣ الي لازم تعوفه هو شعورك بالاستحقاق، شنو يعني، يعني انك لازم تفهم شي كلش مهم و هو انو احنه كلنا متساوين، ماكو احد احسن من احد، يعني اذا شفت شخص حصل على جائزة معينه او سافر لبلد معين او تحصل على شغل معين او او او، انت لازم تبطل تفكر انك تستحق هذا الشي اكثر من هذا الشخص، و انو هذا الشي مو عدل، يعني اني بمره من المرات جنت مقدم على شغل معين و اجه واحد قدم على نفس الشغل و هو انقبل و اني ما انقبلت، اني ظليت فتره طويله ادردم عالموضوع و اكول ليش هو اخذ الشغل و اني احسن منه و اني عندي خبره اكثر و اني افهم منه بهاذا الشغل و اني استحق و هو ميستحق، بس بعدين لاحظت اني كلش ركزت وياه و كلش بعدت عن هدفي و هو اني اتحصل على هذا الشغل، فبطلت افكر بي و كمت اركز على نفسي اني اطور من نفسي و استمر بحياتي، لان حقيقة اني استحق او ما استحق هذا الشغل، مراح يغير شي من حقيقة انه هو الي انقبل بي، و انما غيرني اني و خلاني انسان حاقد على هذا الشخص و ما اريده ينجح و ضيعت وقتي و شخصيتي على الفاضي. 
الشي رقم ١٤ هو انك تظم مشاعرك و تكتمها، اذا محد يعرف انت بشنو دتفكر او شنو احساسك اتجاه شي معين، لتتوقع انك تلكي شخص يفهمك او يساعدك، لان انت ما كلت من شنو تشتكي او شنو حاس، اذا انت تحب شخص كول، اذا انت زعلان من شخص كول، اذا انت تحتاج مساعدة او اذا انت خايف من شي او اذا امن عندك رأي او خطة لشي معين او اذا انت اكو شي مضوجك، احجي، كول، لان محد يكدر يسمع الي براسك، بس انت، و لحد ما انت تعبر عن هذا الاحتياج او هذا الشي، محد راح يسمعك او يساعدك.
الشي رقم ١٥ الي لازم تعوفه بهالسنه هو انك متوفي بوعودك. أسرع طريقة لفقدان المصداقيتك هي انك تكسر وعودك. إذا قلت إنك راح تسوي شي، سويه. لا تسوي أي شيء ممكن يكسر مصداقيتك أو يدمر سمعتك التي انت اشتغلت هواي حتى تحققها. لا تبالغ بالوعود ولا تقلل من عطائك لان متريد توعد احد، لذلك حاول من تنطي وعد معين تفكر اذا تكدر تسوي او لا قبل لا تنطي. لان مره على مره كلامك حيصير ما اله قيمه و وعودك محد حيعتمد عليها او ياخذها بعين الاعتبار. 

و اخيرا، احنه لازم يكون عدنا الاستعداد حتى نتخلى عن هاي لاشياء و غيرها و من التصرفات و العادات، حتى تكون عدنا القدرة ان نتقدم للامام و نوصل للحياة الجديدة الي دتنتظرنا، اتمنالكم سنه سعيده و ناجحه و فصل جديد بحياتكم بي فرص اكثر و فرح اكثر و تقدم اكثر، و كل عام و انتوا بالف خير.