إذا انت سعيد بحياتك، هل راح تصرف كل وقتك على مواقع التواصل الاجتماعي حتى تحصل على قبول الاخرين؟ 

وياكم فلان و هاي الصوتية الثالثة من عراقي بودكاست الموسم الثالث، واحد من اهم العناصر الموجودة بحياتنا هو الانترنت، و بالاخص مواقع التواصل الاجتماعي، واحتمال جبير انت وصلت لهذا البودكاست عبر واحد من هاي المواقع، و هاي وحده من فوائدها وهي انك تلكي او تلكين المحتوى الي يعجبك او يعجبج، او تتابع ناس اصدقاء بالحياة الواقعية، او تسوي اصدقاء انت مشايفهم بالحياة الواقعية و مستحيل جنت راح تتعرف عليهم اذا شفتهم بمكان او التقيت بيهم صدفة، او تتابعين شخصية ملهمة الج او تضحكج او تفيدج، بس كلنا نعرف انو اكو جوانب سلبية لهاي المواقع هذا مو حجي جديد و مو اني اكتشفت هذا الحجي، بس معرفتك بهاي المشاكل غير كافي حتى تتجنبها و انما لازم تفهمها و تحللها، او ليش تحللها، اسمحلي اني اساعدك بتحليلها و اذا ما عجبك تحليلي او عندك تفسيرات ثانية راح اكون شاكر اذا تشاركها او تشاركيها بالتعليقات، و الاختلاف بالرأي لا يفسد للود قضية. 
الجانب السلبي الي دا احجي بي بهاي الصوتية هو التصنع على السوشل ميديا، و تأثير هذا التصنع على المتابعين. 
خليني احجيلك قصة وحدة صديقة عن هذا الموضوع حتى نفهم الموضوع اكثر. 

تكول بيوم من الايام صديقة الي دزتلي رسالة دتكلي بيها شكد هيه تحس بالاكتئاب و شكد هي تحسدني على حياتي، و هيه جانت دتعاني من اكتئاب ما بعد الولادة، و اثر بيها انها جانت تشوفني انزل منشورات تقريبا كل يوم، و تكلي اني اعيش احلى حياة، بس الي مجانت تدري بي هو اني جنت دا اعيش اسوء ايام حياتي، بهذا الوقت اني انتقلت لمدينة جديدة حتى اكدر الكي مستقبل افضل و جنت هستوني خلصت جامعة و دا ادور على شغل و كلنا نعرف شكد صعب انك تلكي شغل بعد التخرج، مجان عندي فلوس، و هستوني مخربة علاقة جان الها مستقبل زاهر، و جنت عبئ على اهلي لان جنت دائما اطلب منهم فلوس، تكول جنت اشرب ويه صديقاتي هواي خلال الاسبوع لحد ما اسكر و اتصور وياهم و انزلها حتى يبين اني اعيش حياة حلوة، جنت بحالة نفسية و جسدية سيئة جدا، بس ولا وحدة من منشوراتي جانت تبين هذا الشي، و حتى من بطلت اسكر و و لكيت شغل و كمت العب رياضة و اكل زين، بس شعوري اني اريد الناس تقبلني ابد ما وقف، جنت احاول دائما اني ابقي الصورة الي اريد الناس تشوفني بيها على السوشل ميديا، مجنت ادري اني جنت انزل هاي الصور بس حتى اثبت هذا الشي، بس الاهم اني هسه طلعت من هاي الدائرة الغريبة المفرغة و خصوصا بعد ما كبرت اكثر و صار نضجت و استقريت اكثر نفسيا.حاليا اني نادرا ما انزل شي على السوشل ميديا و بديت اتقبل نفسي اكثر و اكتشفت اني ما رأي احد بيه و مو مهتمة لهاذا الشي، لذلك كمت من انزل صورة او منشور، وهذا الشي نادر، انزل من صدك دا اعيش لحظة سعيدة، حتى بالمستقبل من أباوع عليها اتذكرها، حتى مو علمود الناس تشوفها. 

تعليقي على هاي القصة اعتقد كلنا متفقين عليه، اولا احنه عادة ننشر الاحداث الحلوة الي بحياتنا، يعني مراح تكون دتبجي و عندك مصيبة و تروح تنزل عنها بالسوشيل ميديا، الا اذا جانت حالة وفاة مثلا، و بعدين معظم الناس ميريدون احد يشوف مصايبهم حتى لحد يشمت بيهم مثلا او يستضعفهم، لذلك تلكي المنشورات الشخصية معظمها ايجابية و الناس تتفعل وياها بشكل ايجابي همين، لذلك مو صحيح انك تحكم على حياة شخص من منشوراته، وهنا احنه دنحجي عن منشورات مال اصدقاء و ناس طبيعية، الجانب الاسوء بهذا الموضوع هو المشاهير، و خصوصا المشاهير الي شهرتهم مبنية على مشاركة حياتهم الخاصة، لان هواي ناس تتابع هذا النوع من المشاهير و همه يتمنون يعيشون حياتهم، يشوفوهم يركبون احسن سيارات و عايشين ببيوت فارهه و حياتهم مابيها شغل و مابيها التزامات و كل الالتزامات الي عدهم هيه اعلانات يسووها عالسريع او فيديو مال مقلب باحد ببيتهم او هدايا يشتروها لبعض و تلكيك انت يا عيني لازم التلفون و كاعد تباوع على حياة شخص عايش بهالطريقة و بعدين تباوع على حياتك و تكول اني ليش حياتي مو هيج سهله مثلهم و مابيها مشاكل، ليش همه يضحكون و متونسين طول الوقت و اني هنا حتى الشاشة الي دا اشوفهم بيها مكسورة، و هيج انت تدمن على متابعة حياة هذول الناس حتى على الاقل تعبش التجربة ولو لفترة قصيرة متتعدى الدقيقة يمكن، الاصعب من تلكي هذول الناس دتصعد اكثر و اكثر و انت كل الي دتسوي هو انك دتعلقلهم تعليق او تسويلهم لايك، اريدك تفوت على حساب مال شخص مشهور انت تتابعة هواي و تباوع على منشوراته بطريقة ثانية، من تباوع عليها فكر شكد هذا الشخص كعد يحظر لحد ما سوى هاي الصورة الي مبينه عفوية، فكر ليش هذا الشخص دينشر هذا المنشور اذا مجان علمود يجذب اهتمام الناس، جذب اهتمام الناس مو هاي المشكله لان هذا الشي مهم للمحتوى المتعوب عليه و الي عنده شي يريد يوصله، بس شنو فايدة طلب الاهتمام من شخص ماعنده شي يقدمه، يعني اني استغرب من الناس الي تضوج من تلكيني ناشر اجزاء مقتطعه من الصوتيات الي دتسمعوها حتى اوصلها لناس اكثر و حتى هاي الناس اذا عجبها المحتوى تسويلي فولو او سبسكرايب، او ميعجبها المحتوى و تعوفه، اكو هواي ناس تكتبلي على هاي المقاطع مو افتهمنه نزل شي جديد، و انت تدور متابعين! الله عليك، يعني اني كاعد اكتب و اسجل و امنتج و انزل و اصرف كل هذا الوقت و المجهود و الفلوس علمود شنو؟ مو علمود اوصل هذا المحتوى لاكثر عدد ممكن من الناس و يتابعون هذا المحتوى، المفروض هذا التعليق مال انت تدور متابعين تكوله لغير ناس مو الي، تروح تكوله لشخص ماعنده شي يقدمه، او متدري ليش مشهور، او شخص ديسوي دينزل ليل نهار مقاطع و صور و ولا وحده تلكي بيها ريحة المحتوى و اني من اكول محتوى هنا اني ما اقصد اله يكون محتوى مفيد  و انما محتوى ترفيهي او محتوى غنائي او محتوى تعليمي او محتوى غذائي او غيره او غيره. 

عندك هواي مشاهير جانوا مبينين انهم عايشين احسن حياة و كلشي مديصير بحياتهم من مشاكل و بعدين نكتشف ان الوضع عكس تماما، يعني اقرب مثال يجي ببالي اليوتيوبر ابو جوليا اذا تعرفوه، يوتيوبر مشهور كلش و يسوي محتوى طبخ ناجح جدا و شخصيته المرحه و من يصور احداث حياته تلكيه متونس و يضحك و يصور، حتى جان رايح يحظر كاس العالم و يصور هناك ويه المشجعين و يكمز و يغني و كلشي يسوي، بعدين تكتشف انه جان ديمر بمشروع طلاق صارله ٤ شهور ويه زوجته الي جانو دائما يتغزلون ببعض بفيديوهاته و و يساعدون بعض بهاي الفيديوهات و حتى جانت هيه تصورله كل فيديوهاته تقريبا، وعدهم طفل و كلشي جان مبين انه مثالي كدام الناس، و الفكوه ان، الناس عرفوا من مرته و هوه منزل ولا كلمه عن الموضوع و ما علق ولا نشر اي شي يتعلق بهذا الشي، و عندك موضوع المغنيه شيرين عبد الوهاب و حسام حبيب الي جان مبين للناس انها علاقه مثاليه و غنوا سويه و كل هالامور و فجأة تكلي حياتهم طلعت مكلوبه و الدنيا محتركة بيها. هذا طبعا غير محتوى المشاهير العراقيين الي خارج العراق، تلكي اكثر مشاهير العراق على السوشل ميديا من خارج العراق، ليش؟ لان معظم المتابعين يعجبهم يشوفون هذول الناس شلون عايشين و الي همين ينطي احساس سيء للمشاهد العادي اتجاه هذا المحتوى بس يتابعه، و حتى تلكي ناس تسب و تشتم بهذوله المشاهير بالتعليقات و تلكي هواي تعليقات تسأل شلون اطلع من العراق و تلكي تعليقات تكون دتقارن الي ديشوفوه بالوضع الي همه عايشين بي و كل هذا يخليك تلاحظ الي ديصير هنا، الي ديصير هنا انه هذا المحتوى تأثيره سيء عليك، بس الشغله الزينه ان هذا التأثير السيء جاي من طريقك تفكيرك انت و من نظرتك لهاذا المحتوى و هذا الشي بايدك انك تعالجه، و طبعا السوال الوجيه الي حيجي هسه ببالك، شلون؟ 
اولا لازم تقنع نفسك ان هذا المشهور الي دتتابعه بغض النظر عن اذا جان محتواه مفيد او غير مفيد، مديشاركك حياته الحقيقية، هذا الشي لازم تكون مقتنع بي، ثانيا انت لازم تفهم ان هذا الشخص اذا جان عايش بره العراق فهو مستحيل يكون عايش حياة وردية مثل ما انت متخيل، يعني اني مثلا عشت معظم حياتي خارج العراق و لحد هسه دا اعاني من مشاكل تصريح العمل و الاقامه و الضرايب و العنصريه و غيرها، طبعا هذا غير المشاكل الحياتيه من مشاكل شغل و مشاكل عائليه و مشاكل دراسيه و مشاكل علاقات عاطفيه و مشاكل صحية، كلنا تصير ويانه هيج مشاكل، بس المقصد انك لازم تتذكر انو كل شخص مشهور او مو مشهور، غني او فقير، عنده مشاكله الي مزينه حياته بالحزن او الزعل او النكد او الخوف. 

اكو موقع طلع قبل فتره و جنت متوقع انه مينجح بس نجح و بشكل جبير بهواي دول و دينتشر اكثر و اكثر، الموقع اسمه بي ريل، معناها كن حقيقي، فكرة الموقع من تباوع عليه اول نظرة راح تحسه يشبه الانستاكرام و الفيسبوك و هاي المواقع، بس المختلف هنا هو انك مسموحلك تنشر بوقت معين من اليوم ، و هذا الوقت انت متعرفه لان كل يوم شكل و هوه وقت موحد لكل المستخدمين، و الي مسموحلك تنشره هو فيديو او صوره للي ديصير وياك حاليا بالكامره الاماميه و الخلفيه بنفس الوقت، يعني متكدر ترفعله صوره قديمه، ها و ما بي فلاتر، بس كم فلتر بسيط مال تعديل الوان، بس مابي هاي الفلاتر الفضائية الي بالتطبيقات الثانيه، هذا غير انك متكدر تشوف محتوى اصدقائك اذا انت متنشر صورك انت همين، لذلك البرنامج اسمه كن حقيقي، عسى و لعل هذا التطبيق او انتشار فكرة انك تكون حقيقي يخلي الناس تفهم شويه شلون باقي الناس عايشة و يستفادون من تجاربهم، الموضوع يحتاج شجاعه، شجاعة مشاركة حياتك الواقعيه، التحديات الي دتمر بيها و اوقات الفشل، هيج نوع من المحتوى نفتقده بالسوشل ميديا لان هيج محتوى ممكن يخلينا نتعلم من تجارب غيرنا و نتفادى اخطاء غيرنا، و نفس الشي اوقات النجاح الحقيقية ممكن تلهمنا انه نستمر بهاي الحياة و تخلينا نحاول نوصل للنجاحات الي احنه نريدها. 

شغله ثانيه تندرج تحت هذا الموضوع هو ان معظمنا حاليا ياخذ اخباره من السوشل ميديا، قليلين الي يتفرجون اخبار، يعني ما اتذكر شوكت اخر مره ابويه كعد يتفرج اخبار على التلفزيون، كل اخباره ياخذها من الفيسبوك و اليوتيوب، و مشكله هاي النوعيه من الاخبار هو انك صعب تفرق بين الخبر الصحيح و الجذب، يعني تلكي مرات اخبار كاذبه و مدعومه بصور فوتوشوب او من غير وقت زمني، او تلكي فيديو متعدل عليه بحيث تلكي فيديو للرئيس الامريكي مثلا يحجي عن موضوع كلش خطر او كلش تافه و هو الفيديو كله مزيف، كلشي صار سهل يتزيف، عندك مثلا اليون ماسك من اشترى تويتر خلى العلامه الزركة مال توثيق ب8 دولارات بالشهر، ادفع و تاخذها، فتلكيها فقدت قيمتها، لان الي صار كام كل واحد يسوي حساب وهمي و يوثقه بفلوس و هاي هيه، صار مصدر موثوق، و النتيجه شنو، شركات جبيره اتاثرت من هذا الشي و قرارات سياسيه اتاثرت من هذا الشي لان صار اكو هواي حسابات مزيفه و موثقه على التويتر، حتى وحده من الشركات انهارت بسوق البورصه لان اكو حساب موثق باسمها كتب شغلات عنصريه على تويتر، و بالاخير طلع حساب مزيف بس بعد ما فات الاوان، حروب ممكن تقوم بسبب هذا الشي، لذلك هسه تويتر ديخسر قيمته السوقيه و دينهار. طبعا هذا غير المعلومات الطبيه الي ممكن تكون غلط و ممكن تاثر على حياتك، و نصائح التغذيه و الرياضة الي تكون غلط و المنتجات الي تشتريها لان هذا الشخص المشهور كال عليها زينه و هو نفسه هذا الشخص مستحيل يستعملها بحياته لان جودتها سيئة، و اكثر شي يغثني الصفحات الي تنشر معلومات علميه غلط او مفبركة حتى يدعم ايديولجيه معينه او فكرة براسه او يكون ناقلها بدون ما يتحقق منها، الموضوع تاثيره جبير على الناس، واني اتمنى انو احنه نكون واعين على هذا الشي و دايرين بالنه منه و اي معلومه انت تحسها مو بمحلها روح دور بيها ولو خمس دقايق، مو علمود شي بس علمود لتكون اداة يتحكمون بيها مشاهير السوشل ميديا او السياسيين او اصحاب التوجهات الدينيه المختلفة او حتى الي يصنعون المنتجات الي ما تسوى تشتريها او الناس الي متهمها صحتك و انما تهمها شلون تستفيد منك اذا كانت فائدة مادية او زيادة تفاعل، و بنفس الوقت حتى لتتأثر حالتك النفسية و تخليك تحس بالاحباط اتجاه حياتك ،و اتذكر كافي تقارن نفسك باي احد، لان انت بالضبط بالمكان الي انت جان لازم تكون بي حالياً.