حكمك يا مستمع، دائما تنتقدني و كلشي ميعجبك أحجي عن اغبى اسباب الزواج و تعترض و تحرم و تحلل و تستلمني بالتعليقات ، حجيت عن الطائفية و هم اكو الناس تعترض، حجيت عن البيدوفيليا و حقوق المرأة و الرجولة و العادة السرية و اسباب السعادة و النبذ المجتمعي و الاخلاق و حقوق الحيوان و النصب و النضافة و كل صوتية تستلمني الانتقادات من بعض الناس، لهاذا اني حاب افهم عن حكم ناس على الي ديتلقوه،،،، ولهاذا هذا اول شي راح نحجي بي يالموسم الثالث، يلا نبدأ
 
-تيد لاسو 

وياكم فلان و هاي اول صوتية من عراقي بودكاست الموسم الثالث، مؤخراً جنت دا اتفرج مسلسل اسمه تيد لاسو، قصة المسلسل عن مدرب مال كرة قدم امريكية انتقل الى انكلترا و كام يدرب فريق انكليزي مال كرة قدم عادية مو امريكيه، المسلسل كلش حلو انصحكم تشوفوه، 
المهم و اني دا اتفرج المسلسل انكالت مقولة من بطل المسلسل خلتني افكر بهاي المقوله طول المسلسل و حسيتها كلش ضربتني، و من رحت دورت عن اصول هاي المقولة، لكيت معظم الناس الي شافت المسلسل انتبهت لهاي المقولة و اثرت بيهم همين، المقولة هي
 “ Be Cearous, not Judgmental”   
و معناها،” كن فضولي، لا مصدر للأحكام” شنو يعني هاي المقولة و ليش هيج الناس تأثرت بيها؟ و شنو ممكن نتعلم منها؟
 
لفترة طويله من حياتي، جنت افكر بطريقة معينه، و هي اصدار الاحكام على الناس، يعني مثلا اشوف شخص ميفهم كلمة معينه اكول عليه شكد جاهل، اشوف شخص ميعرف فن معين اكول شكد متخلف، اشوف شخص ميعرف رياضة معينه او ميعرف يستخدم جهاز معين او تقنية معينه، اكول شبيها الناس متتعلم او استصغر هذا الشخص، او بشكل اوضح، احدد موقفي من هذا الشخص من تصرف معين او من شغلة كالها، و بنفس الوقت جنت كلش اتاثر بحكم الناس عليه، يعني جنت دائما ابين افضل شي عندي كدام الناس و اخفي اي تصرف او رأي عندي ممكن يخلي الشخص الكدامي يحكم عليه او يغير رأيه بيه، يعني باختصار جنت احكم على الناس و اتاثر بحكمهم عليه، اعتقد معظم المستمعين حاليا، عدهم شخص بحياتهم يخافون من حكمه عليهم، مثل زميلك بالشغل او الدراسة، جيرانك، كرايبك، او صديق الك، مرات حتى شخص بالشارع او بياع او او او او، هنا نكدر نلكي اصل الجملة العراقية المشهورة الي تكول، “شتكول علينا الناس” دائما مهتمين بحكم الناس علينا و برأيهم بينا و نخلي هذا الشي يسيطر علينا اكثر و اكثر، اذا جان من ناحية اجتماعية، سياسية او دينية. 

-الامتياز

زين موضوع حكم الناس عليك و حكمك عليهم شلون ممكن نعالجه، شلون ممكن نخلص من هذا الوباء الموجود بالمجتمع، و اني كالك وباء لان هذا الشي عمره مجان شي ايجابي و حتى من تستعمله بطريقة ايجابيه ممكن جدا انه ياخذك لمكان غلط، شلون يعني، يعني انت من تخلي حكم الناس عليك يتحكم بحالتك المزاجية او انجازاتك او حياتك بشكل عام، انت دتنطي امتياز لهاي الناس كلش جبير، مثلا: انت اليوم دخلت اختصاص معين بالجامعة، و ليكن إعلام، و بعدين رحت كعدت ويه صديقك و صديقك من عرف انك دخلت هذا الاختصاص، فرح كلش و شجعك و كلك راح تكون خرافي بي و راح توصل لاعلى المراتب بي و هذا هو الي يناسبك و انت الشخص المناسب لهذا الاختصاص، و انت من سمعت كلامه طرت بالسما بطموحاتك و اتخيلت نفسك اعلامي مخضرم باكبر قناة بالعالم و احسن معد مال برامج و كل هاي الاشياء الي فرحتك كلش و خلتك تحس بقيمتك، و وراها رجعت للبيت و كلت لاهلك اني طبيت اعلام و انت مكيف و فرحان بعد ما صاحبك شحنك بهذا التعزيز و التشجيع الخرافي، لكيت اهلك معاجبهم و معتبرين قرارك غبي و غير مسؤول نزلوك من السما الي انت جنت طاير بيها الى جوه الكاع، و طبعا هذا الشي كلش اثر عليك من ناحية حافزك لهذا الاختصاص او حبك اله او ثقتك بنفسك، و هنا انت وكعت بخطئين، الاول من خليت رأي صديقك باختيارك يأثر عليك بشكل ايجابي زيادة عن اللزوم و الثاني من خليت رأي اهلك يأثر عليك بشكل سلبي زيادة عن اللزوم، لتخلي اي شخص يكون عنده الامتياز بانه يتحكم بسعادتك او بحزنك، لا تخلي احد يصعدك لسابع سما ولا احد ينزلك جوه الكاع و طبعا هذا مو معناه انك متسمع رأي الاخرين او تاخذ بيه، بس لازم تعلم نفسك شي كلش مهم و خصوصاً انك متكدر تغير كل الناس الي حاوليك، هو انك تكون مدير لمشاعرك بشكل صحيح، اي احد يكدر يكول اي شي الك و اي شي عنك و انت تظل ثابت و مسترخي بمكانك، لانك متريد تنطي هذا الامتياز لاي شخص،شخص مثل منو مثل شخص ممكن يخليك فرحان او شخص يخليك زعلان او شخص يخليك تكره نفسك او شخص يخليك تشكك بقراراتك او توجهاتك، لان انت اذا نطيت هذا الامتياز للناس الحواليك، انت هيج تصرفاتك و آراءك راح تكون نتيجة لرأي الناس بيك، و بهالحالة اي احد يكدر يخرب حياتك، لهذا كلش مهم انك لا تتأثر بهذا او هذاك، انت لازم تسمع لكل الناس لان انت ممكن تكون دتسوي شي غلط، بس الاكيد الي ديكولوه ميحدد هويتك. 

-الفضول

زين من نحجي على هويتك كشخص، شنو الشي الي يحدد هويتك، لان كلنا نسمع هواي تسميات سلبية لاشخاص حوالينا و خصوصا بمجتمعنا، هذا زمال، هاي غبية، هذا متعصب، هاي خجولة، و هذا متناقض و هذا الشخص ياكل هواي و هاي كحبة، و ممكن بعض من هاي الاشياء انكالت عليك شخصياً و ممكن تكون انت الشخص الي كلتها على ناس ثانية، بس من تجي تتعمق بالموضوع اكثر تكول لنفسك، شنو الي ينطيني الحق اني احدد هويه او مسمى لهذولة الاشخاص، اني ما اعرف همه بشنو مروا و ما اعرف المشاكل الي مروا بيها بالماضي ولا اعرف الضروف الي ديمرون بيها حاليا، ومن هذا المنطلق شنو رايكم نرجع خطوة ليوره و بدل ما نفكر بالخطأ الي ديسووه، او التصرف الي ديسووه، نبدأ نفكر شنو الي صار وياهم الي وصلهم لهاذا المكان، او ليش ديتصرفون بهاذا الشكل؟ و هذا نسميه فضول، و هذا افضل بديل لحكمك المباشر على الناس، انك تكون فضولي، تريد تعرف اكثر عن هذا الشخص تريد تفهم ليش هيج يسوي و هل الماضي مال هذا الشخص مؤثر على تصرفاته، لان الطب النفسي الحديث اثبت ان الاحداث او الصدمات الي يتعرض الها الشخص و هو طفل ممكن تأثر بشكل جبير على تصرفاته و هو ناضج، حتى لو ميتذكر معظم الي مر بي بالطفولة، و لازم تخلي ببالك شي كلش مهم كالته اوبرا بكتابها “ what happen to you“ ماضيك مو عذر و انما تفسير. لذلك مهم جدا تسئل نفسك شنو الي صار لهاذا الشخص، بدل ما تنتقد هذا الشخص و تصدر احكامك الركيكة، اسئل نفسك، ليش هذا الشخص ميعرف يسوي شغلة معينه، هذا الشخص ليش ميكدر يصعد بالمصعد، هذا الشخص ليش مختار هذا الاتجاه الديني، هذا الشخص ليش ويه هاي الجهه السياسية، هذا الشخص ليش ميعرف يسبح، هذا الشخص، ليش مياكل نفس الاكل الي انت تاكله، ليش هذا الشخص ديبجي، ليش هذا الشخص خايف من شي معين، لان من تبدأ تسئل نفسك هاي الاسئلة، راح تفهم السبب الي خله هذا الشخص يتصرف هذا التصرف، و بنفس الوقت راح تفهم كلش هواي اشياء عن هذا الشخص تخليك مستحيل تصدر عليه حكمك او تسميه بالطريقة الي جنت راح تسميه بيها. و هذا الشي راح ينطيك ثقة بنفسك اكثر من تفهم شلون الناس تصدر احكامها عليك و راح تعرف و بكل سهولة الانسان الي ديحكم عليك بشكل مباشر و بدون فضول، و الانسان الفضولي الي يهمه انه يفهمك و يفهم رأيك و يناقشك بي او على الاقل يتقبله و حتى اذا انتقدك راح تلكي الانتقاد مالته اله قيمة ممكن تضيفلك بالمستقبل او تنبهك لشي انت مجنت منتبه عليه، و لازم تعرف انك من تتحول من شخص مصدر للاحكام الى شخص فضولي، عمرك مراح تكدر ترجع تفكر بنفس الطريقة. 

-ماذا لو؟ 

اني هنا من اكول شخص فضولي ما اقصد بيها الشخص الي يتدخل بحياتك و يبحوش وراك و انما دا احجي عن الفضولي الي شرحته قبل شويه، ديربالك تخلط بينهم، زين خلينا نتخيل لو صارت كل الناس الي حواليك فضوليين، هذا الشي ممكن يغير العالم بشكل جذري، هذا الشي ممكن يخليك تفهم العالم الي حواليك اكثر و تتقبلهم اكثر وطبعا هذا الشي راح يخلي العالم الي حواليك يفهمك اكثر و يتقبلك اكثر، اتخيل عالم مابيه احد يكلك انت اثول او انتي غبيه او نكديه او انت مستهتر، او انت ما عندك غيره او انت جبان او انت متخلف. اتوقع كلنا نريد نعيش بهيج عالم بس اكيد مراح نكدر لان هذا الشي مثالي جدا، بس نكدر نغير نظرتنا احنا للناس الي دنشوفها كل يوم و الناس الي دنتعرف عليهم، و هذا الشي راح ينعكس على صحتنا النفسيه  و على رأينا بالناس الي حوالينا و تأثير رأي الناس بينا، لذلك حاول دائما تتذكر هاي المقوله و تنشرها بالمجتمع الحواليك، “كن فضولي، لا مصدر للاحكام”.