وياكم فلان و هاي صوتية اكسترا من بودكاست عراقي، قبل ما نبدأ مشاركاتكم و و قصصكم الي ارسلتولياها احب اوضح شي كلش مهم، اني يسعدني اني اشوف هواي منكم ديدزولي رسائلهم و مشاركاتهم و اهتمامهم بالبودكاست و اقدر جدا انكم تريدون توصلون الرسالة مالتكم للمستمعين و احترم هذا الشي جدا، بس اني حياتي مو متمحورة حولين البودكاست و عندي كلش هواي اشياء اسويها غير البودكاست بحياتي، لذلك اتمنى من ترسلون اي رسالة او مشاركة انكم تعرفون اني قريتها و وصلتني، اني اقرا كل الرسائل و كل التعليقات و اشوف كل اللايكات، بس ما اكدر ارد على كل وحدة و اسولف ويه كل شخص يرسلي و اي واحد منكم بمكاني راح يسوي نفس الشي، يعني اكو ناس يسألوني اذا يكدرون يشاركون و اني اجاوبهم و اكوللهم اكيد طبعا و اكوللهم ارسلولي مشاركاتكم و راح تسمعون الرد بالصوتية و اذا صار عندي مجال اجاوب بالرسائل و مع ذلك اكو ناس تزعل و تظوج و تلح و الي يكلي ليش لابسني و الي تكلي شبيك متجاوب و اكو ناس يمسحون رسائلهم اذا ما اجاوب عليها، و حتى اكو قصة حلوة من شخص و عجبتني و فكرت اني احجيها بس بطلت ما هلكد هذا الشخص كام يلح و يرسل كل شويه و يخابر، فاتمنى تفهمون موقفي و متزعلون اذا مجاوبت او تاخرت عليكم، شكرا الكم عالمتابعة و عالمشاركة، و مثل ما كلت بالصوتية الي قبلها هاي المشاركات الي راح تسمعوها، احتمال انطي رايي بيها اذا عندي راي و احتمال بس اشاركها وياكم حتى توصل الرسالة الي صاحب الرسالة يحب يوصلها، يلا نبدأ.


المشاركة الرابعة: “أخوية متحرش”
صاحبة المشاركة تكول: اني بنية عمري ١٨ سنة و عندي اربع خوات و تلث اخوان، عندي اخت جبيرة ، و بعدين اني و بعدين خواتي الباقيات اصغر مني، و اخوية الجبير عمره ٢٥ سنة و الثاني ٢٣ و الصغير عشر سنوات، بدت قصتي من جنت بصف خامس ابتدائي ، اوي يعني الفترة الي بلغت بيها، اخوية الجبير جان يلمسن باماكن خطأ و بعدين استوعبت انو هو ديتحرش بيه، جنت اكعد من النوم الكيه لازم صدري و انرعب و اتغطى بسرعة، بقه تقريبا سنه يتحارش بيه، لحد ما مرة حاول يغتصبني، بس عيطت حيل و هو خاف لا اهلي يسمعون فعافني، و وره فتره تعبت كلش من هذا الوضع و قررت اكول لاختي الجبيرة، و كلتلها هذا الشي و اكتشفت انه ديتحرش باختي الجبيرة همين، فقررنه نكول لامي و ابويه، و بالفعل كلنالهم، بس العجيب انهم ما حجو وياه اي شي و محاسبوه ابد، رغم انو ابويه كال راح اموته و العب بي لعب، بس امي تنزاح للولد و تكره البنات و تعتبرنا عله عليهم، اخويه عرف انو امي و ابويه يدرون و بطل هاي الشغلة، بس قبل سنة اختي جانت دتسبح و اندارت لكته ديصورها و راح تبجي و تصيح و رادت تروح للشرطة، بس اهلي طبعا مخلوها، و قبل كم  شهر اختي الي عمرها ١٥ سنه تعرضت لنفس الشي و هم محد حاسبه، فاني اختي اخذنه تلفونه و كسرناه، و جان هوه اجه و كسر البيت علينا كدام امي و ابوية، و طبعا هنا امي و ابويه اجوي يحاسبونه و كالو منو بايكة الجهاز مال اخوها، المهم هو لحد هسه عايش ويانه و كانو ماكو شي و اذا حجينه ويه امي لو ابويه بهالموضوع يكرهونا عيشتنا و يعاركونه، اختي راح تتزوج بعد كم يوم و اني خايفه بعد ما تروح اختي الجبيرة يستفرد بينا اكثر و اني و خواتي الصغار، ردت اروح لمركز الشرطة بس عمي ضابط و اذا رحت اكيد راح يتستر عليه و يسكتني، فما ادري شنو اسوي، رغم اني حجيت هواي بس اكو هواي تفاصيل ماذكرتها لان اذا احجي منا لباجر ميخلصن. 

اني مراح اكدر انطي رايي بهاي المشاركة للاسف بس لاحظت هواي مشاركات اجتني عن التحرش بالافراد العائلة مثل عم تحرش ببنت اخوه او اخ يتحرش باخته او حتى تحرش يصير من بياعين المحلات الي يجيهم اطفال يشترون بمصروفهم، هاي المشكله موجوده بشكل كلش جبير بالعراق و بالدول العربية، اتمنى من كل شخص ديسمعني حاليا و اتعرض للتحرش من جان صغير او جانت صغيرة انكم تشاركوني قصصكم و اذا وصلتني رسائل كفاية عن الموضوع، راح اسوي صوتية خاصة عن هذا الموضوع، لان اخر صوتيه حجيت بيها عن هذا الموضوع جانت بالموسم الاول بعنوان بيدوفيليا اتمنى تروحون تسمعوها اذا بعدكم ما سامعيها، 

المشاركة الخامسة: “حب طائفي”
صاحب المشاركة يكول: حبيت وحدة كلش وصرت احبها اكثر من روحي لدرجة وين ما امشي احسها كبالي  و٣ سنوات مجان احد يدري بينه نتعارك و نتراضى وعايشين بالحلوة والمره و بيوم من الايام درت خالتي وامي، خالتي كالت احنا ماننطي للشيعه واهما سمعت و ردت و كالت احنا هم ماننطي للسنة واهلي واقاربي كلولي اذا تاخذها مانعترف بيك. اني و البنية بقينه مصدومين منعرف شنسوي وحتى هي البنية ما ضحت علمودي وسمعت كلام اهلها وكالت ماكو امل او وسيله ننجمع وعافتني و حاليا اني تائه بنفسي و مدا اكدر انطي الحب اللي انطيته الها لوحدة ثانية وبرأي اليحب بصدق هيج حيحس حتى اذا تزوج وكمل حياته حيبقى يذكر كل شي ويبقى الحب بداخله. 

شوف صديقي، موضوع مشكلة اختلاف الاديان او الطوائف بين المحبين جان السبب بتدمير قصص حب جبيره و قصص حب مجان احد متوقع انها تنتهي، ماعرف شنو ممكن يفرق ويه الاهل اذا ابنهم او بتهم يحبون شخص من طائفة او ديانة ثانية، يعني المفروض الانسان يبدأ يفهم ان الحب اهم من هذا الخلاف و سعادة الشخص اهم من هذا الخلاف، يعني اهلك او اهلها، فضلو مصلحتهم الشخصية و رائيهم الشخصي و معتقداتهم الخاصة بيهم على سعادة ابنهم او بتهم، يعني جان اهون عدهم ابنهم يعيش تعيس و مكسور الخاطر على انهم يتقبلون الاختلاف و يتقبلون اختيارات ابنائهم، و للاسف هاي انانيه منهم و استهتار بمشاعر ابنائهم، اتمنى انك متلومها و تسامحها لان ما كدرت تضحي علمودك، و مكدرت تخالف كلام اهلها، يمكن اسهل عليك انك تواجه اهلك و تسوي الي تريده بس المشكل البنية بمجتمعنا محكومه برآي اهلها مهما جان رايهم متخلف او رجعي او غير منطقي و حفاظا على حياتها و على سلامتها جان لازم تسوي هذا الشي خصوصا ان القانون و المجتمع و الاعلام و حتى جيرانكم راح يوكفون ضدها بهذا القرار، اتمنى يجي يوم و يتغير هذا الواقع المؤلم و تتغير هاي العقلية المتحجرة، اني افهم شعورك حاليا و خصوصا انو علاقتكم انتهت مو بسببكم و انما بسبب تخلف المجتمع و تعصبه و انو انتو ما الكم اي ايد بهاي النتيجة، بس اريد منك تدور على الدروس المستفادة من هاي التجربة و على العبرة و اني متاكد راح تلكيها، و نصيحة اخذها مني و جنت اتمنى لو احد ناصحنياها من زمان، لتدور على احد يحبك او احد تحبه و تجرب هنا و هنا بكلي تلكي الحب، الحب راح يجيلك لوحدة و اذا حسيت انك اخيرا لكيت احد تحبه لتحاول تقارن علاقتكم بعلاقتك القديمة ولا تحاول تحب بنفس الطريقة الي جنت تحب بيها، خلي كل تجربة تكون فريدة من نوعها و خلي كل شخص تعيش وياه هاي التجربة يحس بالتفرد و التميز، لتجبر نفسك تكول لاحد احبك و لتجبر الشخص المقابل انو يبادلك هاي المشاعر، اخذ الموضوع على اقل من مهلك، و انته هسه حتسألني شكد راح اطول لحد ما الك احد احبه مثل ما حبيت بهذيج المره و هنا انت دترتكب خطأ هستوني حذرتك منه و هو المقارنه و التوقع لقصة حبك الجاية، عيش حياتك و اتونس و اشتغل و طلع احسن شي عندك و كون مميز كدام نفسك، و لتنتظر الحب بفارغ الصبر او تستعجل الحب، حاول تنطي لنفسك وقت للتعافي من العلاقة السابقة، شكد ما تطول خلي تطول، سنه سنتين خمسة، اخذ وقتك، حتى علاقتك الجايه تكون صحية و جميلة و تعيش بيها احلى اوقاتك، و دير بالك تفوت بعلاقة جديدة بس حتى تنسى العلاقة الي راحت، لان راح تفوت بكارثة اكبر من الي راحت، اخذ وقتك و ركز على نفسك و راح توصل للي تريده بيوم من الايام. 

المشاركة السادسة: “العادة السرية”

صاحب المشاركة يكول: حاب احجيلك عن شي من الاشياء الي مكدرت اغيرها بيه و حاوبت هواي بس ماكو فايدة، و هي العادة السرية، ادمنت العادة السرية و اتأثرت بيها حيل و جنت اعرف اني على خطأ بس مجنت مهتم لهاذا الشي و كثرة العادة السرية سببلي الاكتئاب و فقدت الشغف و صرت اتعب و انهك كل ما اركض و انسى هواي و هذا الشي اثر على دراستي، المهم جنت دا انتظر بداية ٢٠٢٢ حتى اترك العادة السرية و بالفعل من على بداية السنه اتوقفت و ظليت بصراع لمدة ١٢ يوم و بعدين يأست، و كلت راح ارجع احاول على بداية رمضان، و بالفعل اجه رمضان و توقفت و هالمره طولت ٤٥ يوم بودنها و حسيت بفرق جبير بالفترة بس للاسف رديت و هسه اني رجعت مدمن على العادة السري و حالتي النفسية دتسوء. 

مبدأيا، احب اكلك شي مهم، و راح يصدم هواي من المستمعين، العادة السرية مو شي غلط و لازم تحس بالذنب اتجاهه، و لازم الكل يعرف هذا الشي، كل الناس تمارس العادة السرية، اذا جانوا ولد او بنات، كلنا نمارس العادة السرية و هذا الشي طبيعي جدا و خصوصا للناس الي ما عدها شريك، لان كلنا عدنا رغبات جنسية نريد نفرغها بشكل ما، بس استعمالنا لهاي العادة و تكرارنا الها يختلف من شخص للثاني، اكو ناس تسويها مره بالشهر و اكو ناس مره بالاسبوع و اكو ناس مره باليوم و اكو ناس ٣ او ٤ مرات باليوم، هذا الشي يعتمد على طريقة تعاملك ويه هاي العادة، لان تأثير العادة السرية على المخ يشبه تاثير المخدرات بشكل جبير، النشوة الي توصللها بالنهاية راح تحفز عدة هرمونات و اهمها هرمون الدوبامين الي يحسسك بالمتعة، نفس الهرمون هذا ينفرز من تحقق انجاز او احد يجيبلك هديه او اي احساس انت تحس بي بالفرح، و للاسف هذا الاحساس حلو كلنا نحبه، و هذا الشي ممكن تحس بي كل مره انت تمارس بي العادة السرية، بس المشكله من تبدأ تسيئ استخدام هاي الخاصية و تدمن على هذا الاحساس و تريد تحسه كل شويه، و هنا مخك راح يتشبع بهذا الهرمون و يكوم ميكتفي بالكميه القليله الي دتفرزها و يريد بعد و لهاذا انت حتكوم تحاول بعد تمارس العادة السريه على امل تحس بهاي المتعة و هذا الشي ينطبق حرفيا على اي نوع من الادمان، لذلك انت من تترك العادة السرية فجأة مخك راح يفتقد هذا الهرمون و يريد منه و لهاذا راح تلكي نفسك حسيت بالاكتئاب او انعدام الشغف او غيرها من الاحاسيس السلبية، و للاسف مجتمعنا ميباوع على العادة السرية من هذا المنظور و انما يباو عليها على انها شيطان و خطأ و عار و ميصير نحجي بي و تبدأ النصائح تنهال عليكم من الناس بانك تتوقف و انك تراجع نفسك و تلومها و انك دتسوي شي غلط و اكيد طبعا يظيفولها بعض الخرافات مثل انك راح تنعمي او تتخبل او يصير بيح حب شباب او يزيد الشعر بجسمك او يسببلك عقم او او او او، هاي كلها خرافات و معليك بيها، كلام ماله الي اساس من الصحه و كلام يدل على جهل الناس بهذا الشي، لذلك، من وجهة نظري و من رأيي الشخصي و هذا مو رأي طبي او اخصائي اجتماعي و انما رأي مبني على تجربة، لتحاول انك توقف العادة السرية و انما حاول انك تديرها بشكل صحيح، يعني بدل ما تصدم مخك بالتوقف المفاجئ و انعدام الهرمونات الي متعود عليها انها تنفرز، حاول انك تقلل بشكل تدريجي عدد المرات الي انت تمارس بيها العادة السرية، حاول انك بدل ما تسويها كل يوم 3 مرات، سويها كل يوم مره و بعديت خيلها بين يوم و يوم و بعدين قللها و سويها مره اسبوعيا، و اني اكلك، و بنفس الوقت حاول تلكي شي بديل انت تسوي يعوض الهرمونات الي ديفتقدها مخك، يعني انك تلكي هوايه انت تحب تسويها، مثل الرسم او الكتابه او السباحة او اي شي ثاني، حاول انك تلكي نشاطات جديده تسويها، تسوي اشياء تفرحك او تحسسك بالرضا، حتى مخك يتحصل على هاي الهرمونات بشكل ثاني غير العادة السرية. حاول تتعامل ويه مخك و افرازاته بشكل ذكي، بعد فتره راح تلكي نفسك ما تفكر انك تمارس العادة السرية كل مره تكعد بيها لوحدك، لان مخك اتعود على كميه اقل من الدوبامين و لهاذا ما راح يطالبك مخك انك تسوي بعد اشياء حتى تشبع هاي الرغبه عندك. و اتذكر ان العادة السرية الها فوائد هواي بس من تكون بشكل نعقول و مو مبالغ بي، 



هاي جانت بس ٣ مشاركات من مشاركات هواي وصلتني، اتمنى تحطولي آرائكم بالتعليقات و اتمنى ترسلون مشاركتكم على الانستاكرام او الايميل حتى نناقشها اذا صارتلنا فرصة بالمستقبل، و طبعا احب اكول لكل المستمعين، انتظروا الموسم الثالث قريبا جدا.