وياكم فلان و هاي صوتية اكسترا من بودكاست عراقي، بنهاية الموسم الثاني طلبت منكم تشاركوني قصصكم و تحدياتكم حتى اشاركها ويه المستمعين، و احب اشكر كل المستمعين الي اتفاعلوا ويه الموضوع و ارسلوا قصصهم و مشاكلهم و المواضيع الي يحبون يسمعوها، و اني اختاريت مجموعه من هاي المشاركات حتى نسمعها و نحجي بيها شويه، بس احب قبل ما نبدأ اذكركم بموضوع مهم جدا و لازم تتذكروه قبل ما ترسلولي اي شي يخصكم او اي سؤال، اني مو دكتور نفسي و لا محلل سياسي و لا اخصائي علاقات واي رأي اكوله بهاي الصوتيه هو رأي شخصي و يحتمل الصواب و يحتمل الخطأ، و لتنتظر مني احلك مشاكلك او اصلح علاقتك العاطفيه او علاقتك ويه اهلك او مشاكل شغلك او اي من هذا القبيل، بس راح اكول رأيي بمشاركتك و هذا طبعا اذا عندي رأي بيها، لان ممكن اشوف قصه مهمه و ارويها الكم بس مو شرط انطي رأيي بالموضوع، و احب طبعا انتظر و اقرأ ردودكم و تفاعلكم ويه هاي المشاركات و اتمنى اشوفها، بس بشرط، انكم تستعملون ردود حظاريه و محترمه و انكم متحكمون على اصحاب هاي المشاركات او يكون اكو اي تنمر اتجاههم، اتمنى منك و منج ان تكتبون التعليق الي تحبون احد يكوللمياه من تكونون باسوء او احسن حالاتكم،و اذا صادفت اي تعليق تنمر او اهانه لاصحاب هاي المشاركات اني راح اضطر للاسف اني اسويلك بلوك او امسح التعليق. شكرا الكم و يلا نبدأ:

المشاركة الاولى: 
آني فلانه عمري ١٧ سنه، حابه احجي عن حادث صار وياي و جان شي اشبه من الموت البطيء، جان عندي موبايل و سيم كارت، مجان يشتغل ماعرف شبي و كلش محتاجه استعمله، فجبت موبايل ابويه و كلت خلي اجرب سيم كارت ابويه على موبايلي لان مديشتغل، فنقلت السيم كارد مال ابويه لموبايلي و اني احاول اسوي هاي العمليه السيم كارد مال ابويه ضاع مني، لان صغير و وكع و كلبت الدنيا عليه و ملكيته، اجه ابويه و كلتله الي صار، و فجأة ابويه كام يصيح و يعيط لدرجة جنت عبالي البيت راح يوكع من الصياح، و طبعا هاي جانت البداية، جمعني اني و اخوتي و كام يضربنا بشكل كارثي، بحيث فوك الخمس ساعات و هو يضرب بينا، مدري اني حسيتها خمس ساعات، بالاخير تعب و مديكدر يضربنا بايده بعد، واج جاب مي و بللنا و كام يضرب بينا بالواير….. هذا اليوم عمري مراح انساه،  ثاني يوم راح للشركة و جان نسخه جديده من السيم كارد. 

شوفي، اني جدا اسف على الي مريتي بيه و الي دتمرين بيه، الصراحة احنه دنعيش بدوله مابيها قانون عنف اسري، يعني انت اذا خلفت و صار عندك جهال، من حقك تظربهم تشغلهم تشوههم و تطلع كل غضبك بيهم، بس همه ما الهم غير السمع و الطاعة، اني اتذكر قبل ما نطلع من الوطن العربي، جان اكو رجال يكول لابويه اذا سافرت هناك اولادك حيجيبولك الشرطة، تدرون ليش هيج يكولون، لان يدرون انو الي ديسووه غلط، و يدرون اذا القانون يحاسبهم نص الاهالي العراقيين راح يطبون للسجن، المشكله انو دائما الحل الوحيد عدنا هو العنف، اني متاكد هوه مضربكم علمود السيم كارد، على الاكثر اكو شي ثاني مظوجه و طلعها بيكم، لان يدري انتو الاضعف بحياته و هو الاضعف بحياة ناس ثانيه او نظرته لنفسه هي انه هو الاضعف، فيقرر يثبت قوته بهالطريقة، ميعرف انه ديخلي كل الناس القريبين منه يكرهوه و يخافون منه، الي همه المفروض الوحيدين بحياته الي ممكن يحبوه بشكل غير مشروط، بس هوه كسر هذا الشي بيهم، اعرف وحده جانت دتحجيلي عن اخوها الي اتوفى و تكلي هذا اقرب اخو الي و اكثر اخو احبه و يخاف عليه كلش بس مشكلته انه جان ايده و الراشدي، كلشي اسويه يضربني و يعاركني لان خطيه يخاف عليه، اني هنا صفنت و استغربت بشكل، يعني شلون واحد الشخص المفضل بالنسبه اله هو الشخص الي يضربه و يأذيه؟ المهم اني احب اكول شي، انت و انتي لازم تعرفون انكم بشر مستقلين و الكم راي والكم مشاعر تزعل و تفرح و تضوج، و مو من حق احد يتعدى عليكم بهالطريقة المهينه، شنو الفكره انك تشوف اولادك ينهانون كدامك، ماعرف اذا ابوج او ابوك يتقبل الحوار بس حاول تفتح حوار وياه مره و ثنين و اكثر و تتقرب من هذا الشخص بطريقه مختلفه، حاولي تخلين هذا الشخص يحترمج او يحترمك و يفكر قبل ما يعني عليك، حاولي انج تعبرين عن الي بداخلج و تكولين لهذا الشخص انج حسيتي بالاهانه، انج متريدين تحسين بالاهانه بحياتج و خصوصا من اهلج، ماعرف اذا هاي الطريقه ممكن تنفع بس تستحق المحاوله. 

المشاركة الثانية: 
القصة الي حاسردها هية قصة صارت وية اهلي بفترة التسعينات بوسط فترة القصف  الامريكي وبداية الحصار ،والدتي و لسبب من الأسباب زعلت من ابوية وراحت لبيت عمتي(اخت ابوية) لكونه اقرب بيت عنهم وجانت وياها اختي واني مجنت مولوده بوكتها . اثناء الليل اجه ابوية علمود يصالحها ويرجعها للبيت لكن هية رفضت و مقبلت تروح وياه لكن اصر ابوية و ايضا عمتي اقنعتها انه ترجع بس الحمدلله انه هية رجعت.....، ابوية جان خال سيارته بكراج بيت عمتي وزوج عمتي گله اخذ سيارتك لان اخاف يصيرلها شي وتتئذه سيارتك، رجعو اهلي للبيت وتقريبا الساعه ٢ بالليل صوت انفجار كلش قوي وقريب من البيت طلع ابوية و شاف بيت اخته وكع عليه صاروخ... البيت الي قبل ساعات جان يمه وجانت امي يمه ديشوفه متدمر.... ٩ راحو بسبب هالصاروخ واغلبهم اطفال ، الحمدلله انه اهلي متأذوا والحمدلله انه امي مبقت هناك. بس الشي الغريب بالقصة باثناء ما الناس مصدومه من الديصير كان اكو ناس تطب للبيت تاخذ الحديد والغراض !! واكو ناس دتموت جوة ، والي اخذ الحديد هوة اخوها الي من امها وابوها ، واكثر الي باكو هم من كرايبهم واهلهم، ابوية يكول اريد احد يساعدني اطلع اختي وعائلتها ماكو ، كل واحد ملتهي ياخذ بالغراض والفلوس ، مادري شنو اعلق بس شنو هاي الانسانية الي تخلي الواحد يشوف بيت متدمر وداخله ناس متوفين وهوة يفكر بالفلوس!!!

الصراحة اني دائما اسمع عن الانفجارات و الصواريخ الي تنزل عالبيوت، بس الصراحه مجنت متوقع ان الناس تنسى الناس الي دتموت و اهلهم الي راحوا و تفكر بالماده، يعني انت شفت الناس اصحاب هاي الماده ماتوا و ما اخذوا شي وياهم، حرفيا انت دتشوف هذا الشي بعينك، ماعرف شلون مجان الموقف صادم بالنسبه الك، اني افهم ان الناس بوقتها جانت دتموت من الجوع و العوز و اكو هواي ناس تأثرت من هذا الشي و طبعا هذا الشي يبين على الناس الي حكمت البلد بعد هذا النظام الدكتاتوري، ناس همها الماده و ميهمها البشر و ميهما احد يعيش بسلام، اهم شي هو ياخذ حصته قبل ما احد ياخذها قبله، و يكلك هيه البلد هيج هيج واكعه و هوسه، بس لازم كلنا نفهم شي واحد، الماده الي انت جمعتها بهاي الطرق، كلها راح يجيها يوم و تختفي، بس شي واحد يبقى، عارك، عارك هو الي حيبقى. 


المشاركة الثالثة: 
آني فلانه، او مثل ما يسموني اهلي، غلطة، لان مجان المفروض اجي للدنيا حسب كلام امي و ابويه، بطفولتي عالطالعه و النازلة جنت اسمع جملة يا ريت منزلتج و خلصانه، و مجنت اعرف معنى هاي الجملة لان جنت طفله، بس من سألت مدرسة الاحياء صف ثاني متوسط افتهمت، بديت الاحظ اني اعيش بوسط كاره و متقزز مني كوني “خطأ” بس خطأ ما مسؤولة عنه، خطأهم الي يشوفوه كدامهم كل يوم، حتى على الرغم نت وجود اطفال ثانيين بس فلانه بقت مو مرغوبه لحد اللحظة، من جنت صغيره بكل عيد راس سنه اظم ايديه و اباوع على السكف و اكول يا رب ماما تحبني، بالعادة يطلبون الاماني باعياد الميلاد، بس الاخطاء محد يحتفل بيها.

اولا لازم تفهمين شي جدا مهم، ديري بالج تقتنعين انج غلط، كلنا موجودين هنا لسبب، و اذا مجان اكو النا سبب احنه لازم نخلق هذا السبب، اني ادري صعب الشخص يعيش ببيئة ما مرتاح بيها وخصوصا اذا جانت ويه اهله، حاولي تلكين طموحج و تشتغلين عليه و تكبرين نفسج بطريقه تخليج متحتاجين تعتمدين عليهم، لان محد راح يفيدج غير نفسج، حبي نفسج و راح تلكي البيئة الي تحبيها، ثانيا و هنا كلامي موجه للاهل، اذا انت او انتي بيوم ارتكبتوا غلط او شي بنظركم غلط، يا اما تصلحون هذا الغلط بالوقت المناسب، يا اما تتعاملون وياه بشكل ناضج، لان بالاخير اي شي راح تكولوه مراح يخليكم تحسون احسن و بنفس الوقت محد بيكم يحب يسمع هذا الشي من اهله، فليش متخيلين ابنائكم راح يحبون يسمعون هذا الشي منكم، حاولوا انكم تفكرون قبل اي كلمه تكولوها اذا تحبون اهلكم يكولوها الكم، و طبعا هذا الشي مو كافي، لازم تقيمون هاي الكلمه قبل لتكولوها حتى لو اهلكم جانو يكولوها، لان الاهل هم يغلطون، مثل ما سويتوا انتو بالضبط. 



هاي جانت بس ٣ مشاركات من مشاركات هواي وصلتني، راح اسوي صوتيات ثانيه احجي بيها باقي المشاركات الي اختاريتها، ادري بيكم اكو هواي حيكولون وين مشاركتي و اني دزيتلك قصتي و احب اكللكم راح تسمعوها بالصوتية الجاية من فلان، و اذا تحب تسمع فلان يحجي قصتك و يناقشها مثل ما سوينا بهاي الصوتيه، اتمنى ترسل مشارك على الانستاكرام او الايميل.