وياكم فلان و هاي الصوتيه ال٢٦ من بودكاست عراقي الموسم الثاني، تخيلي صديقتي المستمعه انتي عندج دوام و كل يوم تحتاجين تركبين مواصلات عامه من و الى هذا الدوام، و تكعدين الصبح و تتريكين عالسريع لان ما عندج وقت و عالسريع تبدلين و تنزلين حتى تبدين يومج المليان امل و حماس و تنزلين تمشين لراس الشارع حتى تنتظرين الباص و الجو جميل و بي برودة الصبح و صوت العصافير تزقزق و يكوفلج الباص و تركبين بي و تكعدين يم الشباك و يتحرك الباص و انتي دتتفرجين على الناس الي بالشارع الي رايح لشغله و الي رايح للمدرسه و الي ديوصل اولاده للمدرسه و الي ديبيع بالشارع و الي دينتظر تكسي و بعدين تديرين راسج و تباوعين على الناس الي موجوده بالباص و فجأة! تلكين كدامج قضيب، مال ذكر وهذا الذكر كاعد ديلوح بي كدامج و ديباوعلج، هنا انتي ارتبكتي و متدرين شتسوين، راح تفكرين شنو تسوين؟ و راح تلكين كدامج ٤ خيارات، الخيار الاول هوه انج تسكتين و هذا الشي طبعا راح يخلي هذا المتحرش عباله انو هذا الشي عاجبج او ما فارق وياج و راح يستمر بهذا الشي و من تروحين راح يلكي وحده ثانيه يسويها كدامها، و غير طبعا انتي هنا يومج خرب و حيظل هذا المنظر ببالج لمده كلش طويله و اذا حجيته لاحد ممكن يحط اللوم عليج او ميصدكج اصلا، اما خيارج الثاني هوه انج تتعاركين وياه و هنا انتي دتعرضين نفسج للخطر لان ممكن يكون هذا الشخص عنده سلطه او ممكن يكول عليج جذابه و طبعا شعبنا ميصدك البنات و هذا الشي معروف و ممكن هذا الشخص يكول انتي دتتبلين عليه و هذا الشي مصار و مراح تعرفين تاخذين حقج، غير انو اصلا احتمال متكون عندج الجرآة لمواجهة هذا الشخص، وخصوصا انو المجتمع مربيج انو ميصير يكون اكو تواصل بينج و بين الجنس الاخر بس لاهداف محدوده و هي انو يا اما يكون احد من عائلتج او بياع دتشترين منه، غير هيج التواصل لازم يكون جنسي لا غير، المهم، الخيار الثالث هوه انج تنزلين من الباص و هنا انتي غيرتي مسار يومج و انهزمتي و عبالك انتي الي مسويه شي غلط بسبب شخص معجب باعضاءة التناسليه فاني اشوف هذا الخيار غلط، بقى عندج خيار واحد و هو انج تفضحيه، شلون؟ تطلعين تلفونج و تشغلين الكامره و تحطين التلفون على اذانج كانج دتتصلين او تلزمين التلفون بشكل جانبي بحيث ميبين انج دتصورين، و تنزلين هذا الفيديو على مواقع التواصل الاجتماعي و ترسليه لصفحات مؤثره و بكل مكان و عوفي الانترنت ياخذلج حقج من هذا الشخص، بس دقيقه، لتفرحين كلش لان مثل ما الانترنت راح يفضح هذا الشخص و يخرب حياته حتى يكون عبره لكل المتحرشين، راح يبينلج نظرة بعض الناس لهاذا المتحرش الي الصراحه مجنت متوقع انها بهالقذارة و مجنت متوقع انها بهاي السطحية و العنصرية ضد المرأة، راح اشارك وياكم بعض ردود الافعال على السوشل ميديا و على التلفزيون الي ماعرف ليش بعده موجود حتى نشوف مجتمعنا شلون يباوع على هيج حالة، بس قبل هذا الشي احب اكول لأي بنيه تفضح متحرش برافو عليج و استمري و دوري عليهم و صوريهم همين، حتى نكدر نسيطر على جزء من هاي الظاهرة، و طبعا اكول جزء لان اكو هواي اجزاء بالمجتمع و بالعائله و بالمدرسة و بالقانون لازم نتصرف بخصوصها. واحد من اهم الاجزاء الي لازم نتصرف بخصوصه هو الاعلام، الي المفروض يكون مرآة المجتمع و يوصل الوعي للمشاهد و يطرح قضايا مهمة و يناقشها و طبعا من نزل الفيديو الي صورتيه لهذا المتحرش و صار ترند، بدينا نشوف رد فعل الاعلامي حسان البهادلي الي لازم كلنا نبهذله على هذا الكلام السخيف، والصراحه ماريد اسمي اعلامي بس خلينا نسمع شكال: صوت حسام البهادلي والله انت الي المفروض تسكت، و اني مراح اسوي مثل ما انت سويت و اتهمك انك خبرة بالاستمناء بالامكان العامة و تريد تاخذ راحتك بهذا الشي،و يكلك الرجال تستحي من نشر هذا الفعل الفاضح، حبيبي الي يستحي من نشر هيج فعل مو الرجال وانما المتحرشين و المؤيدين لهاذا الفعل، و اني هنا باسم الرجال اكلك لا حبيبي منستحي ننشر هاي الجريمه و نشارك بفضح هذا الشخص، انت من كل عقلك دتحجي؟ يعني انت مقتنع بالكلام الي دتكوله؟ لان مصيبه اذا انت مقتنع بهذا الكلام، انت هنا تريد البنيه تسكت من تشوف واحد كاعد يستمني كدامها و هو ديباوع عليها آو تنهزم منه او تكول شي بس اذا لزمت الموبايل و قررت تفضح هذا الشخص فهيه خبرة، و ادري بيك مو قصدك خبره بالتصوير و عيب عليك و عيب على القناة الي مطلعتك انك تتهم بنية دتدافع عن نفسها و دتسوي خدمه لهذا المجتمع بفضح هذا المتحرش، تدري هيه لو مشتكيه عليه للشرطة بشكل مباشر و بدون ترند، راح يكون سهل عليه يطلع منها خصوصا انه طلع منتسب بالشرطة. و تدري شنو الاسخف، ان القانون العراقي يعاقب المتحرش بمده لا تزيد عن ٣ شهور و غرامه مالية، او وحده من هذني الاثنين، يعني تريدها تسكت او تنهزم او تشتكي و بال٣ حالات هيه ضيعت حقها، لا و مستغرب و لفت انتباهك بشكل جبير اهتمام النساء بنشر هذا الفيديو الفاضح، و ماعرف شلون مفتهمت ليش البنات دتنشر هذا الفيديو، اني افهمك ليش، و اتمنى تكون دتسمعني، البنات دتنشر الفيديو لان همه ملوا من التحرش الي ديتعرضوله كل يوم بالشوارع بالمواصلات و بالشغل و يريدون اي طريقه يخلصون من هاي الظاهرة المقرفه و اعتقد لكو امل بهذا الفيديو بانه يقلل من هذا الشي لان من ينتشر هيج فيديو و يصير ترند و ينتفضح المتحرش، المتحرش الي بعده ما اتحرش راح يفكر الف مره قبل ما يتحرش هذا اولا، و ثانيا انتو متصدكون البنات من تكول احد يتحرش بيه و اكو تحرش و تشككون بيها، انت عندك هذا الفيديو متصور و دتشكك بالبنيه، انوب البنيه تكول هيج بدون دليل، انت، و امثالك مستحيل تصدك. اتمنى انو القناة تاخذ قرار بحقك ولو استبعد هذا الشي لانك زدتلهم مشاهداتهم. عبالكم بس هذا الي صار بهذا البرنامج، لا طبعا، اسمعو الضيفة سحر الهاشمي الي استضافها المذيع شنو تكول: صوت الضيفة: يعني حظرتج تعتبرين البنية الي عدها اخلاق هي الي جانت تستحي تكول احد اتحرش بيه، وماعرف انتي شلون تكولين هيج، اني مصدوم الصراحة، لان البنيه الي تستحي تكول اتحرشوا بيه دتشجع على التحرش و تساعد المتحرش انه ياخذ حريته اكثر بالتحرش و هذا الي يخلي المتحرش يشوف هذا الشي طبيعي،وانما من تصوره و تفضحه هذا الشي ابد ميشجع عالتحرش و خصوصا بعد ما تصيرله فضيحه و ينقبض عليه و كل الناس الي تعرفه تعرف انه متحرش و هذا الشي راح يخسره شغله و سمعته و مكانته فمستحيل تصوير المتحرش يشجع عالتحرش، انتي شدتكولين! و اني من جنت دا اسمع كلامج جنت اتمنى متكولين انو البنيه راضيه و لهاذا دتصور و للاسف كلتي هذا الشي. زين بالله هذوله الاعلام العراقي و احنه متعودين على فشلهم، شنو رأي الناس على السوشل ميديا؟ أول تعليق على الفيسبوك شد انتباهي جان لبنيه تكول بي: لاحول ولا قوة الا بالله العلي العضيم، وين صرنا البنات تشهر بالرجال انتي راضيه بهالشي من دتثورين، عيب خجلوا شويه وين الاخلاق وين المستحى، و الصراحة اني الي استحيت من تعليقج! يعني بدل ما تشجعين على محاربة التحرش و هاي الظاهرة، تلومين البنيه و تتهميها انها ماعدها اخلاق و انها راضيه بس لان دتصور و دتشهر بالرجال، والي لفت انتباهي بتعليقج انج مكلتي ولا كلمه توصفين بيها اخلاق المتحرش او تلوميه على اي شي و انما طلعتي كل الحق على البنيه الي صورت المتحرش، و الصراحة هذا الشي جدا خطير من تكونين انتي بنيه و تشوفين البنات يتحرشون بيهم كل يوم بالشوارع و بالاخير تنصرين المتحرش. التعليق الثاني هو من شخص يكول> انا اتوقع استغل وضيفته ،وهي لبسها فاضح و سوت حركة اغرائية الع و لاخ ما قصر و اكثر شي هي مدفوعه من قبل اجنده تشويه سمعة للبلد و الامن، طبعا عندي سؤال لهذا الشخص، انت وين شفت البنيه الي صورت؟ و شلون حكمت انها اغرته و بعدين حتى لو البنيه ملابسه بالطريقة الي ترضيك، هل هذا مبرر يعني انه يسوي هيج، من كل عقلك يعني، الموضوع ما محتاج اجنده مدفوعه و من هالتفاهة، لان التحرش موجود بالعراق و افراد الشعب الي مثلك دتشجع على هذا الشي بالقاء اللوم عالضحية و التبرير للمتحرش، الموضوع ابد ما محتاج اجندة لان الاجنده موجودة بعقولكم و بتصرفاتكم و ردود افعالكم، طبعا هواي اكو تعليقات تشيب الراس الصراحة، مثل هيه لو شريفة جان تركت الولد بحالة و اكو الي تكول شي اكيد هيه لو ما ادب سز و بت شوارع متقبل تصور هيج شي، قمة الانحطاط والسقوط وللاسف هذا مو رأي فردي لان تلكي هواي بالردود على هذا التعليق يكولون رحمالله والديج و هذا الكلام الصحيح و هذا الي مستغرب من هذا البلد العجيب و يكون يعني البنيه تسترونها و الولد تفضحونه شبيكم، و هذا تعرف شنو معناه، انه ما عنده مشكلة تفضحون البنية، مدام ماكو ولد متأثر بالقصة، هذا التعليق يبينلك قذارة هذا التفكير و من شنو ديعانون البنات بمجتمعنا، يعني انتي بكل الحالات غلطانه و تستاهلين تنفضحين و من يغلط الولد لازم نستر عليه. الواحد كام يستحي من انه ينتمي لنفس البلد هوه و هيج نوعيه من الناس، و طبعا هواي تعليقات تكول بشكل مباشر انه هو مابي صوج و هذا صوج هاي البربوك و يجوز شاف البنيه مستعرضة جسمها و لابسه مغري، حبي شوكت تفتهمون انو اللبس ما اله دخل بالتحرش، اكثر دولة بالعالم بيها تحرش هيه افغانستان و الي بيها البنات متغطين من فوك ليجوه، وارجع و اكول هذا الشي مينطي الحق الاحد يتحرش، اذا كان لبس او غيره، و اكثر التعليقات الي غاثتني الصراحة هو شلون كدرت تصور كل هذا الفيديو و بهذا الوضوح، ماعرف انتو وين عايشين بالتسعينات مثلا و لازم تجيب كادر مال تصوير و تشيل كامره وزنها عشر كيلوات واحد وراها لازملها الواير مثل مصورين الاعراس زمان، الموضوع جدا بسيط و سهل، لان اكو شي اسمه تلفون بي كامره مثل الي حظرتج و حظرتك شايليه بايديكم و انتو دتكتبون هاي التعليقات السخيفة، اذا من ناحية الوضوح فتلفونها كامرته زينه عادي و اذا من ناحية زاوية التصوير فتكون لازمة التلفون بايدها بشكل مبيبن انها دتصور، مو لازم ترفع التلفون فوك راسها و تصور. وهنا احب اكول لكل البنات انهم يدربون روحهم على التصوير بطريقة مخفية حتى من توكع بهيج موقف تعرف شلون تصوره. الصراحة التعليقات هواي و متخلص و الموضع كلش مقرف و سخيف و يراويك شكد اكو ناس عايشين حوالينا عدهم فكر عنصري و فكر متحرش و فكر هجومي و متربين على ان البنيه ممنوع تسوي شي بالحياة غير انها تسمع الكلام و اذا احد اعتدى عليها لازم تستحي و تسكت عن حقها و اذا حجت هيه الغلطانة، هذا الشي لازم نلكيله حل و لازم نحاول نقلله و نوعي الناس للتحرش و اسبابه و عواقبه و تاثيره على الشخص المتحرش بيه. اني من حسب نظرتي للمجتمع لاحظت من و اني صغير ان المجتمع يشجع عالتحرش اذا جان بشكل مباشر او غير مباشر، يعني مجتمع الولد و من همه صغار ماعرف ليش مقتنعين انو البنات تتونس من احد يتحرش بيها و طبعا هذا الشي الاطفال تاخذه من اهلهم و من مدرسينهم و من الرجال الي حواليهم و احب اصدمك بشغله وهي انو مجتمع الذكور ببلدنا كلشي ميعرفون عن الاناث، و كل معلوماتهم عن الجنس الاخر هو استنتاجات اتوصلولها او ورثوها من الذكور الي اكبر منهم، يعني انت اتخيل من اول صف بالمدرسه لحد اخر صف انت مشايف اي بنيه بالمدرسه او بحياتك و بالنسبه الك البنات عباره عن كائن غامض و غريب و جسمه حلو، لا تعرف شلون تتعامل وياه ولا تعرف شي عن مشاعرهم او عن طريقه تعاملهم ويه الامور و كل معلوماتك دتاخذها من اصدقائك الي بالمدرسة الي هم كلشي ميعرفون مثلك عن البنات، اني اتذكر بالمدرسه سمعت معلومات غريبه عجيبه عن البنات ايام المدرسه من الولد الي حواليه و اكتشفت انها كلها كلام فارغ و اكتشفت انو الي دينطوني هاي المعلومات ميعرفون شي عن مجتمع البنات. و خصوصا بعدين من تخلص مدرسه و تروح للجامعه او الشغل و تنصدم بانك متعرف تتعامل ويه الجنس الاخر و الجنس الاخر ميعرف يتعامل وياك همين، راح تلكي روحك اته ته و كلامك مو مترابط و متعرف شنو الي يصير تكوله و شنو الي ميصير تكوله للبنات و وهذا طبعا يوضحلك العلاقات الفاشله الي تدخلها اول ما تدخل الجامعه لان انتو الاثنين كلشي متعرفون عن الجنس الاخر و انما معلوماتكم كلها مبنيه على معلومات استنتاجية، و نفس الشي من تتزوجين او تتزوج و انتو بعدكم بالمدرسة او هستوكم مخلصين، راح تشوف فرق الخبره و فرق المعرفه و التعامل ويه الجنس الاخر، اني اتذكر استاذ كاللنا انو البنات يحبون احد يتحرش بيهم و هذا الشي يحسسهم بانوثتهم، و انصدمت انو اكو بنات صدك فكر بهاي الطريقة، و طبعا هذا الشي مو لان هذا هو الصحيح و انما المجتمع وصل للبنيه انو هذا هو الي راح يحسسج بانوثتج، المجتمع نفسه الي يدافع عن المتحرش و يلوم الضحية، و لازم نفهم ان المعلومات الي ناخذها من هذا المجتمع مو كلها صحيح و بالعكس معظمها يحتاج اعادة نظر و خصوصا المعلومات الي جايتنا من الجيل الي قبلنا، و طبعا هذا مو معناه انو الجيل القبلنا سيء، بالعكس اكو هواي اشياء نكدر نستفيد بيها من الاجيال السابقة، بس همه عدهم معلومات و استنتاجات مغلوطة و مو شرط يكونون همه الي مستحدثيها بالعكس ممكن تكون جايتهم من الجيل الي قبلهم، فلازم يكون اكو شخصيه خاصة بجيلنا، و حتى نوصل لهاي الشخصيه الخاصه بينا، لازم نقيم كل التصرفات و الاستنتاجات الي جايتنا من اجدادنا و اجدادهم لاجدادنا، و حتى توصلك الفكره اكثر، شركة ابل من تنزل ايفون بسنه معينه، بالسنه الوراها تشوف شنو المشاكل بالايفون القبله و تاحول تصلحها و تسويلها ابديت ، و نفس الشي ويه المجتمع، كل جيل يجي لازم يتعلم من اخطاء الجيل القبله و يحاول يصلحها و يجددها و يسوي ابديت، حتى نكدر نوصل للمجتمع الي نكدر كلنا نعيش بي بسلام و رضا و محد بينا يحس بالخوف او الظلم او الاضطهاد. اني اذا ظليت احجي عن التحرش منا لباجر مراح اخلص و اني من زمان اريد احجي عن هذا الموضوع و دا اكول بعدين لان الموضوع جبير و يحتاج شغل هواي و بحث و غيره و اني مجان عندي وقت باخر فتره و لاحظتوا هذا الشي من انقطاعي فتره بسس الانشغال، بس راح احجي عن التحرش اكثر بصوتيه اخرى بالموسم الثالث، اي لان هاي اخر صوتيه من هذا الموسم الي جان طويل مقارنة بالموسم الاول، و راح اتوقف تقريبا من شهر الى شهرين بس راح تكون رجعه قويه بتصميم جديد و احتمال تشوفون بي فلان و احتمال لأ خلينا نشوف شلون راح يكون، بس طبعا خلال هاي المده اني مراح اعوفكم هيج و تنسوني، لذلك راح اسويلكم سلسله صوتيه مو من ظمن الموسم راح تكون عباره عن صوتيات بيها ردود على رسائلكم و استفساراتكم و قصصكم و مشاكلكم، فاتمنى من كل شخص عنده موضوع او قصه او سؤال يحب يطرحه بالبودكاست، يكتب هذا الشي بالتعليقات مال يوتيوب او الانستكرام و اذا الموضوع خاص ياريت ترسلون هذا الشي بالخاص مال انستاجرام او الايميل الي راح يكون بوصف هاي الصوتيه، و الى ذلك الحين، اتمنالكم حياة جميله و قرارت صائبه بحياتكم و اتمنى تشاركوني قصصكم و اسئلتكم.