وياكم فلان و هاي الصوتية التلاثة و عشرين من عراقي بودكاست الموسم الثاني، طبعا اني دا اسجل هاي الحلقة و اني مريض حاليا و عندي الفايروس الي مستلمنا من ٢٠٢٠ وهاي المره كل افراد العائلة مصابين و كلنا دنعيش العزله سويه، محد ديروح شغل او دوام بآي مكان و هذا الحال ذكرني بموضوع اللقاح و ذكرني بنظرية سمعتها من عراقيين هنا،  قبل كم سنة و اول ما اجيت على البلد الي اني بي حاليا اتذكر انطلب مني و من اهلي لقاحات معينه و على عدة جرعات، و هاي اللقاحات مال امراض مختلفة مثل السل و الهبتايتس بي و من هاي الامراض، اتذكر بوقتها جنت اعرف عائلة عراقية اكتشفت منها هواي نظريات مؤامرة و خرافات مجنت اعرف عنها، و آول نظرية مؤامرة سمعت بيها من اجيت لهذا البلد، ان هاي البلد يريدون يخلوك ديوث فقرروا ينطوك هاي اللقاحات حتى تآثر على جيناتك و تخليك متحس بالغيرة و متدير بال اذا اختك او امك طلعوا و اشتغلوا و صاروا فاعلين بالمجتمع، و المشكله ان الشخص الي ديكلك هاي النظرية، ديكولها و هو مقتنع بيها و ديشوفها منطقية جدا، و هي بعيدة كل البعد عن المنطق و بوقتها الصراحة مكدرت الزم روحي من الضحك، و هاي بالله نظرية همه اخترعوها او حللوها على طريقتهم و اتوصلوا لهاي النتيجه، بس الاسخف و الي ينرفز اكثر، من تلكي اكو خرافات العراقيين صارلهم سنين مقتنعين بيها و متفقين عليها بشكل غريب و الصراحة الموضوع كلش منتشر و كلش مو مقنع و هذا الشي يولد عندك تساولات عن مدى تصديق الناس للخرافات هاي و عن مدا عدم تصديقهم لحقائق او انجازات علمية، يعني تلكي شخص يومن بكل نظريات المؤامرة بالحياة مثل موضوع الارض المسطحة و موضوع اللقاحات المزيفة و عدم وجود الجاذبية و عدم وجود الاحتباس الحراري و عدم وجود الفضاء و ان الموضوع كله فبركة و انو اكو جهات موجوده دتشتغل ليل و نهار حتى تقنعنا بوجود هاي الاشياء و هو الي اكتشف هاي الاسرار الماسونيه الشيطانيه، و اني هنا مدا اكول انو ماكو مؤامرات دتصير بالعالم و حتظل تصير بس ما اتوقع انها بهاي السذاجه و بهذا الضعف، بس قبل ما نحجي عن نظريات المؤامرة المنتشرة هالايام، خلينا نرجع شويه على الخرافات الي يصدك بيها العراقيين و معظم العرب المحيطين بالعراق و يمكن المو عرب همين ماعرف الصراحة. 

وحدة  من الخرافات الي فاجآتني الصراحة جانت هيه عدم الكنس او التنظيف بالليل و عدم الاستحمام همين، و يكلك يجيب الفكر و يطير النعمه من البيت، و الصراحة اني اعترض و بشدة على هذا الشي، يعني اتخيل انت راجع من الشغل بالليل عركان و تعبان و تريد تاخذ شاور تنظف نفسك بي و تريح جسمك بي و تنام على فراشك نظيف، بس متكدر، ليش؟ والله لان ميصير تنظف بالليل، و من تجي تسآل الشخص الي يكلك هيج، ليش؟ مراح يعرف يجاوبك، اتحداك تسآل اي شخص عنده هذا الادعاء و ينطيك سبب مقنع، و هذا طبعا من جماعة ميصير تعوف النعال مكلوب و يتشاءم من البومة او الغراب او من رقم معين او يوم معين بالاسبوع، غير طبعا الخرزة الزركه و الطلاسم و الاحجار مال السبع عيون و غيرها من امور الحماية من الحسد و كلشي يشبه هاي الامور، اعتقد انو ان الاوان أن نلغي هاي الخرافات من ثقافتنا و من مجتمعنا و نحاربها، لان المفروض وصلنا لنقطة من التاريخ صعب نصدك بيها هيج امور اجدادنا استحدثوها لان وجدو صعوبه بتفسير ظاهرة معينه او بربط الصدف سويه حتى يطلعون بنظرية تحولت بعدين الى قانون لازم كلنا نصدق بي و كلنا نورثه لابنائنا، نصيحة مني اذا انت شخص تؤمن بهذا النوع من الخرافات، روح و دور عن اصل هاي الخرافه و منين اجت و راح تعرف على شنو دا احجي. 

طبعا هاي الخرافات الموجودة بمجتمعنا اصلها قديم و اله تاريخ، بس اكو خرافات جديدة بدت تنتشر و بدينا نسويها تاريخ، يعني احنا قبل كم شهر شفنا انطلاق تيليسكوب جيمس ويب للفضاء و شفنا اول الصور الي صورها و دقتها و جمالها و كل كم يوم دنشوف صور جديدة لمجرات تبعد ملايين السنين الضوئية عنا، هذا التلسكوب يكدر يصورلك مجرات جانت موجوده بالماضي و قبل ملايين السنين، و هواي ناس اتساءلت شلون هذا التيليسكوب يشتغل و شنو اليه عمله و شلون يكدر يصور مجرات من الماضي، و هاي كلها اسئلة منطقية و مهمة و يمكن الاجابه عليها، و راح تلكون اجاباتها بهواي مصادر و هواي ناس مختصين راح يشرحولكم الموضوع بشكل وافي و سهل و هذا اذا انت دتدور صدك عن اجابه و عن تفسير، بس اذا حظرتك متريد تعرف التفسير و تريد تفسر على كيفك فهاي مشكلتك لان مشروع تيليسكوب جيمس ويب الي كاعدين العلماء يشتغلون عليه سنين و مكلف عشر مليارات دولار مراح يتوقف لان حظرتك ما مقتنع بالنتائج و معتبرها مفبركة، الموضوع مو هيج يشتغل و طبعا هذا الشي طبقه على كل الاختراعات او المشاهد الي دتصير بيومنا الحالي، مثال ثاني على هذا الموضوع، قبل سنه تقريبا انتشرت فيديوهات ناس مصورين بيها اعمده جبيره من الستنلس ستييل موجوده قريب من لوس انجيلوس في كاليفورنيا و الناس بوقتها كلها كالت الفاضائيين ديدزولنا رسالة و ربطو الموضوع بالاهرامات و انها اقطاب الارض و من هاي الامور، و بعد فترة قصيرة طلعت شركة تسويق مسوية الموضوع حتى يعلنون عن جهاز العاب منافس للبليستيشن و الاكس بوكس من شركة kfc، اي هيه kfc مال دجاج.
اني عندي صديق عزيز عليه جدا و احبه و احنه اصحاب من عشر سنين تقريبا، اكثر شي يعجبني بي انه دائما يبحث و يتحقق و دائما تلكي اراءة اتغيرت على حسب المعطيات الي لكاها و الاستنتاجات الي وصللها، اتذكر من اول ما اتعرف عليه و احنا النقاشات بيناتنا متخلص، نقاشات دينيه، علميه، فلسفية و تكنولوجيه، و دائما نظل نتناقش بالموضوع لحد ما نوص لواحد من ٣ نتائج، يا اما هو يقتنع، يا اما ناي اقتنع و يا اما محد بينا يقتنع برآي الثاني، و احب هنا اوصل رساله مهمه لكل الناس الي دتسمع هذا البودكاست الي تسمع الصوتيه و تتونس بيها و متنشرها لاصدقاءها، لازم تعرف انك عندك الحق الكامل بتغيير رايك و لازم متخجل من هذا الشي ابدا و متحتاج تبرره لاحد و مو مسموحلك تعاير احد او تستنقص منه بس لان غير رآيه بموضوع معين او اتغير ذوقه بشي معين، يعني انت ممكن اليوم تكون مقتنع بشي و باجر تلكي نفسك ما مقنع بي، او ممكن اليوم انت تحب نوع موسيقى معين او اكل معين و باجر يعجبك غيره و تغير رايك بالاول، الموضوع كله حريتك الشخصيه و قرارتك و انت بشنو مقتنع، و رجوعا الى صديقي الي ذكرته، اني اتذكر احنه بيوم من الايام جان اكو نقطة التقاء قويه بافكارنا و بمعتقداتنا، و بعد ما انقطعنا فتره عن التواصل بحكم بعد المسافه و التوقيت و مشاغل الحياة، من اتواصلنا اني وياه موخرا لاحظت اختلاف كبير جدا بالنظر للامور العلميه او النظريات او المؤامرات و هذا الشي حلو لان احنا اتعرضنا لمجتمعات مختلفه عن بعضها و اتعرضنا لمعلومات مختلفه و كل واحد شافهه بطريقة و بالاخير الاختلاف بالارأي لا يفسد للود قضية، هوه يشوف ان الارض مسطحة و يشوف ان اكو مجلس مسيطر على الكوكب و ان رحلات ناسا للفضاء جانت كلها تمثيل و فبركة و انو الجاذبية و الاحتباس الحراري كذب و انو هاي كلها موامرات و انو زيادة درجة حرارة الارض مو لان اكو احتباس حراري و انما هاي بداية نهاية العالم و طبعا من حق الجميع انه يفكر بهاي الطريقة، بس اتمنى من الناس الي تفكر بهاي الطريقة يفكرون بشكل عقلاني و علمي، و يدورون ابحاث علميه و مقالات موثوقة و ميصدكون كل معلومه تنكال هنا و هناك.

الخرافات و المؤامرات هيه مو محتكرة على بلد معين او شعب معين او ثقافة معينه، بس تختلف بنوعها و مستواها، يعني عندك مثلا ٧ بالمية من الشعب الامريكي يعتقدون ان الحليب بالشوكولاته يجي من البقر الي لونه جوزي، عندك مثلا وحده من الخرافات القديمه و لحد هسه اكو ناس تعتقد بيها هي انو اكو منظمة شيطانيه اسمها ايلوميناتي تحكم العالم و طبعا غير موضوع الانوناكي الي هوه موضوع اعمق، خلي احجيلكم شويه عليه: قبل كم سنه اجه ابن خالتي علينا زيارة و جنه كاعدين بالسياره دنسولف، فدنحجي بالاديان و المعتقدات و هاي الامور، و هو جان يكول تدري كل البشر مضحوك عليهم، و اكو فضائيين همه مسيطرين على الارض من قبل ٥٠٠ الف سنه، اسمهم الانوناكي، و هذوله الانوناكي يريدون ياخذون الذهب الموجود على الارض و بسبب انو عدهم قله ايدي عامله فاخترعوا الانسان البدائي حتى يشتغل عدهم و يطلع الذهب الي بالارض و ينطويهمياه، مسآلت نفسك ليش الذهب هو المعدن الوحيد الي يتحكم بالعالم و الدول تتقاتل عليه، اذا على الندرة فاكو اندر منه و اذا على الصلابه فاكو اصلب منه، فاكيد الذهب دنجمعه حتى نطي للانوناكي، و تكدر تشوف مركباتهم و طياراتهم محفوره على جدران الحظارة السومرية، و همه جان عدهم تعامل مباشر ويه السومريين، و طبعا راح تسآل نفسك ليش ديحفرون هاي القصص بالصخر، و اني اكلك لان اذا سووه عالحديد يصدي و اذا سووه على الورق يتآكل، هذوله الانوناكي صنعوا حظاره بشرية كامله و سوولهم اله، و ظلو البشر عايشين ٤ الاف سنه على هذا الحال لحد ما صارت حرب نوويه بين الفضائيين الي جايين الارض و طبعا هذا غير الي صار على كوكب نيبيرو بين رجال الفضاء و مشاكلهم ويه الفضائيين الي انولدو على الارض، الموضوع كلش معقد و كلش طويل و كلش مو مهم احجي بي الصراحة بس تكدر تقرآ عنه بكتاب اسمه كتاب انكي المفقود و ماعرف شلون مفقود و تكدر تنزلة pdf بس مو مشكله، و بوقتها كلي ابن خالتي انو اخوه شاف واحد من هذوله الانوناكيز بالحقيقة و حجه وياه، ماعرف شنو شارب وقتها جان اخوه بس على العموم، الفكره الي اريد اوصلكياها، انك اذا تريد تصدك بخرافة او مؤامرة مراح يكون صعب عليك تألف عليها قصص و تلكي كتب تدعم كلامك و موروثات تساعدك على تصديق هاي الخرافة و تحاول تقنع الي حوليك بيها، بس الاهم من هذا كله، خليك منطقي و لتتوقع ان كل الناس حتشوف الموضوع من هاي الزاوية الفضائية. 

اني بهاي الصوتية حجيت عن خرافات جديدة و خرافات قديمة، بالاخير كلها خرافات و راح يجي يوم و تنتهي و تطلع غيرها، و الواضح ان الانسان ميكدر يعيش بدون خرافات و بدون  الما ورائيات و بدون مؤمرات، بس لازم هذا الشي ميبعد عيونا عن المؤامرات الحقيقية الي دتصير لنهب البلد مثلا، مثل التسريبات الي انتشرت مؤخرا لنوري المالكي الي بينت انه عنده مخطط يريد يسيطر بي عالعراق و يقضي بي على باقي المنافسين و اشعال حرب اهليه، و اني متاكد ان باقي الاحزاب و المسؤلين عدهم مخططات مماثلة لمصالح شخصية و للسيطرة على البلد، و هنا اذا تفكر بيها راح تلكيها منطقية و الها اسباب، مو مثل مؤامرة الارض المسطحة او الاحتباس الحراري او غيرها من المؤامرات الي ما الها هدف و ما الها اساس و ماكو دليل يثبت صحتها، احنا مو محور الكون، و هذا مو معناه انو احنه مو مهمين و انما احنا اهميتنا تكون موجوده باشياء حقيقية و منطقية