وياكم فلان و هاي الصوتية العاشرة بعد العاشرة يعني العشرين من عراقي بودكاست الموسم الثاني، قبل كم سنه بديت شغل حكومي بدولة ما تحجي عربي و كبداية كل شغل جديد بمكان جديد و بدون خبرة بدأت بأقل منصب و أقل راتب ممكن بهذا المكان، و جان أكو كمية لا بأس بيها من الموضفين الي على نفس درجتي بالشغل و جانت الوظيفة مؤقتة، يعني تشتغلها لمدة ٦ شهور و بعدين تتركها، إلا اذا اتجددلك لفترة أطول أو اذا اتوظفت بشكل دائم بهذا المكان و كبداية انت لازم تثبت نفسك و تراوي شنو تكدر تسوي حتى تكسب ثقة الموجودين بيك، بس قبل هذا كلة لازم تكون واثق من قدراتك و من الي تكدر توصلة…. جنت آني الوحيد العربي بهذا المكان و جان أكو تدرجات هواي مال مناصب بهذا الشغل، جان اكو هواي مدراء و مديرين لهذوله المديرين و مديرين لهذولة المديرين و إلى آخره، مديري المباشر جانت طريقة حجية وياي غريبة و جان دائما يحب ينطيني آصعب الشغلات و أطول ساعات شغل، جنت أشتغل ١٢ ساعة باليوم تقريبا و ٦ ايام بالاسبوع و جنت اذا احتاج اخذ اجازة جنت لازم اطلبها من المدير مالتي و انتظر يوافق عليها و يوقع عليها، و للمعلومة اني شخص اشتغل بدقة و بكفأة عالية، على حسب ما يكولون عني بالشغل و على حسب النتائج الي اوصللها بشغلي، المدير مالتي مجان كلشي يهتم لشغلي و جنت شكد ما اشتغل و اجتهد جان ميباوع على اجتهادي و تعبي، بس جنت اكول مو مشكله الموضوع يحتاج وقت و جهد، و بيوم من الايام مرضت كلش و مجنت اكدر اروح فاتصلت بالمدير و كلتله و اتغيبت يومين عن الشغل، رجت باليوم الثالث و آول ما شافني المدير كال: اريد تقرير مال طبيب يثبت انك جنت مريض، و بدون مبالغة اني جنت ميت من التعب و المرض و حتى من جنت مداوم جان مبين عليه المرض، بس اني رحت بعد يومين لان ادري اذا غبت اكثر من يومين راح اضطر اسوي تقرير الطبيب، المهم، كلت للمدير ليش اجيب تقرير و بقانون الشركة الي احنه بيها، يكول انك تكدر تغيب يومين بدون تقرير، جان يكول اي صحيح و سكت و راح!! ، بس ما عجبه الحجي، اول شي اتعلمته بهذا الشغل اني لازم اعرف حقوقي قبل واجبياتي و اعرف قوانين المكان الي اني بيه كلش زين حتى لحد يستغلها ضدي، مر كم يوم و المدير طلب مني اجي الصبح بالخمسة للشغل لان يريدوني بشغل مهم، و اني كلتله اوكي، و الشغل يبعد ساعه تقريبا عن بيتي، رحت ثاني يوم الصبح بالخمسة و اول ما طبيت على المكان المدير كال هاي شنو شجابك، كلتله انت كلتلي تعال، جان يكول لا مكلتلك، طبعا اني هنا عرفت ان اهذا الشخص ديستهبل مناوي يجيبها على بر و المشكله انو اني جنت مبين لهذا المدير انو اني الشخص المطيع الي كلش ينطلب مني اسويه وبدون نقاش، بس بهذاك اليوم اني عرفت انو هاي الطريقة جانت غلط و جنت دا اقلل من نفسي بهاي الطريقة وحسيت اني استحق معامله احسن، المهم اني يومها اعترضت و اتجادلت هواي وياه و صارت مشكله بيناتنه لان هوه مصر انو ما طلب مني اجي للشغل، يومها ضجت كلش و السخيف بالموضوع ان المدير جانت معاملته مو حلوه و مو محترمه وياي و الاصخم انه نطاني كلش هواي شغل يومها و ضغط عليه بشكل مو حلو بحيث يومها رجعت للبيت هلكان و الدنيا ليل و او ما وصلت للبيت اتصل بيه المدير و طلب مني ارجع للمكتب لان اكو موضوع ضروري، كلتله بس اني هستوني رجعت للبيت و الدنيا ليل، جان يكول لا لازم تجي، ركبت السياره و رجعت للشغل و جان اكو ازدحام رهيب يومها و طولت ساعه ونص طريق و كل شويه يخابرني و يسألني وينك، من وصلت لكيته واكف بره المكتب و كال لاخلص حلينه المشكله!!.. هنا اني اتخبلت، كلتله يعني مو عيب عليك هيج تسوي و انت متحترم الناس الي تشغل وياك، جان يكول اذا معاجبك عوف الشغل، اني هنا رجعت للبيت و طول الطريق افكر شنو لازم اسوي، ولحد ما وصلت للبيت جان الحل الوحيد الي وصلتله اني اقدم شكوى على المدير، و يومها اول ما وصلت للبيت طلعت اللابتوب و بديت اكتب بالايميل شنو الي ديصير و طريقة تعامله وياي و كلشي جان مضوجني و دزيته لأكبر راس بالمؤسسة، و أكبر راس بالمؤسسة جانت الوزيرة، لان جانت مؤسسة حكومية، الحلو ان الوزيرة جاوبتني ثاني يوم الصبح و كالتلي راح اتصرف، مر يومين و فجأة لكيت احد اجاني من المديرين الي فوك المدير مالتي و نقلني لمكان ثاني بالمؤسسة و طلب مني ما اتعامل ويه هذا المدير لان اكو هواي شكاوي عليه من فتره طويلة، اني نسيت هذاك المدير و ركزت بالمهمة مالتي و سويتها على اكمل وجه و اشتغلت بيها بكل تفاني… مر كم شهر، و بدأ مديري الجديد يشوف شغلي و يعجبة و طلب مني اقدم على منصب مال مدير بهذاك المكان و بالفعل قدمت و انقبلت و صرت بنفس مستوى المدير السابق مالتي، و طبعا اثناء هاي الفتره اكتشفت ان المدير السابق مالتي جان ديحاول يسقط بيه و يكول اني ما اشتغل زين و من هالأمور و حتى من سوولي مقابلة المنصب الجديد، هوه راح للناس الي سوولي المقابلة و كاللهم لتوضفوه لان موزين يشتغل، بس همزين ما طلع بإيده شي، لان اني جنت حاجي ويه مديري الحالي بهذاك الوقت و هوه بدوره حجه وياهم و وضحلهم الامور، و لان بدأت سمعة هذا المدير تسوء و بدأت الادارة تنتبه على تصرفاته و خصوصا بعد الايميل التفصيلي الي دزيته عنه و عن تعامله وياي، و طبعا بعد ما اثبتت ان كل الي ديكوله عني غلط، بعد فتره صرت مدير على ١٥ شخص تقريبا و جنت انطيهم مهمات يسووها و جنت اعامل الكل عبالك اخوتي، لادرجة اني اشك انو احد جان يكرهني من هذولة الناس، جان الي يطلب اجازة انطيه اجازة و الي يريد يرجع للبيت من وكت اسمحلة و جنت كلش حباب وياهم و جنت دائما اركز ويه الناس الي تشتغل زين واحد واحد و اكتب عنهم تقارير زينه و اتابع الي ميشتغلون زين و احاول اساعدهم لحد ما يوصلون لمستوى افضل بشغلهم او اغير المهمه الي عدهم و اشوف همه شنو اهتماماتهم و شنو الي يحبون يسووه و ويه منو يحبون يشتغلون و احاول اوفرلهم احسن جو للشغل، حتى جان اكو بنية اجتني وقتها و طلبت مني اجازة لان عدها الم شديد بسبب الدورة الشهرية، فيومها انطيتها الاجازة و رجعتها للبيت بسيارتي لان مجان وياها سيارة، و مرة ولد وكع و انلوت رجلة اخذته للمستشفى و بقيت وياه لحد ما رجع للبيت، فجنت داير بالي عليهم زين، و بمرة جان عدنا اجتماع مال مديرين و اجني تعليق اني اعامل الموضفين بطريقة زينه زيادة عن اللزوم و لازم اضغط عليهم اكثر و جان ردي كالآتي: اني جربت احساس ان يكون عندك مدير سيء و جربت احساس انك من ترجع للبيت تسب على مديرك و عالخلفوه و احساس انك متريد تروح للشغل الصبح حتى لتتعامل ويه هذا المدير و اني عمري ما راح اكون هذا المدير، اطلب مني اي شي بس لتطلب مني اغير طريقتي ويه الموضفين، و خصوصا ان الانتاجيه احسن من قبل و الشغل ماشي تمام، ليش اغيرها؟ جان مديري السابق كاعد ويانه و معاجبه الحجي و جان فاهم ان الحجي عنه، جان يكول، بس هيج راح تخلي باقي الموضفين ميحبون يتعاملون ويه باقي المديرين، كلتله مو مشكلتي! اني اذا اشوف الموضفين يحبون مدير معين بالشغل احاول اتابع هذا المدير و اتعلم منه و اشوف ليش يحبوه حتى احسن من طريقتي ويه موضفيني مو اروح اطلب من هذا المدير انو يعاملهم بطريقة اسوء! الكل جان متفق وياي بهاي النقطة وانسد النقاش، مر شهر تقريبا على هذا الحوار و بيوم اكعد الصبح و الكي جاتني ترقية لمنصب اعلى بالشغل وهذا الشي خلاني المدير على المدير السابق مالتي، و يومها كل الي بالشغل باركولي، ما عدا هذا الشخص، و المفارقة اني جنت اصغر واحد بالمكان من ناحية العمر و هذا جان تحدي لان العيون تصير عليك و الغلطات تصير حسابها جبير و ويه ناس ثكيله بالمؤسسة، استمريت على نهجي بهذا الشغل.. جنه دندور على موضفين مؤقتين و جنه دنسوي مقابلات لناس هواي حتى نوضفهم بنفس اليوم، بيوم التوضيف نشرت منشور على صفحة للجالية العربيه بهالمنطقة الي اني بيها انو عدنا توضيف اليوم للي يحب يقدم وفعلا بهذاك اليوم اجانه ما يقارب ٤٠ شخص من هاي الصفحه و كلهم سوينالهم مقابلات و وضفنا هواي منهم، و هنا اني حطيت نفسي بمكان صعب شويه، لان جنت احس نفسي سفير العرب بهاي المؤسسة لدرجة انهم جانو يسموني رئيس العرب بالشغل ههههههههه و هذا الشي جان مو كلش حلو لان اي مشكله تصير ويه اي واحد عربي بالشغل يجون عليه حتى احلها و عينك متشوف غير النور، و جان اكو هواي ناس تقدم عدنا و مقبلناها لان متعرف تحجي اللغة مال هاي البلد، بس اتذكر شخص عراقي اجه هوه و مرته، جان جايب مرته تترجمله الحجي لان ميعرف يحجي غير العربي فمكدرنا نوظفه، فكلتله زين ليش متخلي زوجتك تقدم على الشغل مدام تعرف تحجي هيه، جان يكول لا طبعا اني مرتي ممنوع تشتغل، كلتله ليش؟ جان ميصير طبعا شيكولون عليه و شنو منظري كدام العالم، كلتله والله اني اشوف منظرك قمة الاحترام اذا ما عندك مشكله بهذا الشي، بس اشوف انه العكس اذا متسمح لمرتك تشتغل و خصوصا انو هيه عدها بكلوريوس و تحجي بطلاقة و عدها كل المقومات، جان يكول لا عيني هاي سوالف الاجانب متمشي علينه، و الصراحه الموضوع جان كلش ينرفز و سخيف و ما اله مبرر، بس كل شخص و ضروفه و للاسف اني شفت تبريراته ابد مو منطقية،  بس اتمنى ان زوجتة اشتغلت او حققت الطموح الي هيه تريدة أو على الاقل ما بقت تحت رحمة قرارات زوجها، و جان اكو شخص ثاني سويت وياه مقابله للتوضيف مجان يكدر يحجي غير العربي و جنت اتمنى اوضفه بس هاي جانت مشكله لان راح يحتاج اللغه كلش هواي بهذا الشغل فمكدرت اقبله بهاي الوضيفة بس المشكله ان هذا الشخص ظل يصر عليه و يتوسل بيه و يكلي اني راح اكون ايدك اليمين بالشغل، اني راح اسوي اي شي تطلبه و تقريبا ظلينا ساعه و نص نحجي بنقطة ان الشغل يتطلب لغة و هوه مديقتنع، و من رجعت للبيت خابرني اكثر من مره و كل يوم يخابرني لدرجة اني تعبت كلش من هذا الموضوع فرحت حجيت ويه الاداره اكثر من مره لحد ما قبلو يوضفوه وطبعا جان الموضوع متعب لان بعد ما وضفناه جان بين كلمه و الثانيه يجيني و يطلب اترجمله و هذا جان ديآخر الشغل، بس لحسن الحظ الموضوع مشى خصوصا بعد ما وضفنا كميه جبيره من العرب بالمكان فصار اسهل يلكي احد يساعده، لحسن الحظ اني جانت فرصتي زينه بهذا الشغل و طبعا جان بيها هواي معوقات و مشاكل بس جان دائما اكو حل و خصوصا من يكون علاقتك زينه ويه زملائك و ويه الناس الي انت دتديرهم، للاسف جان اكو بعض الاشخاص الي وضفناهم من جنسيات عربية مختلفة سوو مشاكل هواي بالشغل و اضطرينا ننهي وجودهم ويانه و الناس الي ازعجوني اكثر همه الناس الي جانت تلعب بساعات العمل مالتهم حتى يندفعلهم اكثر، و جان عبالهم انو محد راح ينتبه عليهم، لدرجة اكو واحد جنت اطلب منه يعيد كتابة الساعات مالته ٣ او اربع مرات لحد ما تصير صحيحة، وللاسف هذا جان انعكاسة مو حلو على باقي العرب الي موجودين و اني منهم، دائما جانو يكولولي الناس مالتك هيج سوو و الناس مالتك هيج عملو، و هذا الشي جان مزعج لان اني ما اريد احد يمثلني ولا امثل احد، كل واحد يمثل نفسه، و هذا جان دائما نقاشي وية الاجانب الي جانوا يكولون الناس مالتك، لان متكدر تلزك تصرف سواه شخص بمجموعة مال ناس كاملة لمجرد انهم جايين من نفس النقطة الجغرافية، المهم بعد فترة خلصت المدة مال الموضفين المؤقتين و هنا بدأ شي اكرهه، فترة الوسايط و حبيبي و صديقي و من هاي الامور،جان عدنا تقريبا ٣٠٠ موضف مؤقت و اني جان عندي قائمة بالناس الي راح تبقى ويانه و جان بيها تقريبا ١٢ واحد بس من هذولة ال٣٠٠ شخص، اسوء شي من الكل جان يعرف انو هاي القائمة وياي و الكل يحاول يعرف هل هوه موجود بيها او لأ، و المشكلة اني جنت اعامل الكل بطريقة كلش حلوة و صداقة و اخوه و من هالامور، اكثر من واحد اجه عليه و طلب مني يعرف اذا راح يبقى أو لا، و اني جنت ارفض اكول، و الي خابروني و الي اجوني للبيت و الي اشترولي غدا و الي يخابرني يكلي تعال نطلع و كلها اتذكرتني بهذيج الفترة، و مره من المرات اجت بنيه اني وياها كلش اصدقاء و طلبت مني تعرف اذا امها راح تبقى ويانه لو لا لان تريد تسافر و متدري تسافر لو لا و من هالامور و ظلت تتوسل هيه و امها، فكلتلها اوكي هسه اشوف، فتحت القائمه و امها مجانت موجودة فكلتلها للاسف ما راح تكمل ويانه، احس روحي بthe voice هههههه 
جان تكول اوكي و شكرا كلش و اني اقدر هذا الشي، فكلتلها بس لتكولين لاحد، لان اذا احد عرف اني راح اوكع بمشكلة، كالت لا طبعا ما اكول، و عينك متشوف الا النور، كل الدنيا عرفت، و كل شويه احد يجي يكلي، شمعنى هذيج كلتلها واني لا و الي يكلي اني لان عربي ما كلتلي بس هيه تكوللها، و طبعا سمعت كلمة انو هيه بنية حلوة فتكوللها بس احنا متكوللنا ههههه عبالك اذا كلتلها راح استفيد شي من جمالها، يومين و الادارة طلبتني و كعدو يسألوني المن حجيت و ليش تطلع معلومات سرية و ليش تسوي كذا و احنا سمعنا انك كلت للكل منو راح يبقى و منو راح يروح، و هيه هاي المشكلة، تبدأ تطلع الاشاعات و الجذب و تزيد كل يوم، المهم، اني شرحتلهم شنو الي صار بالتفصيل و لان عندي ملف زين ويه هذا الشغل و يدرون اني سويت هيج عن حسن نية و صدكوني، كالولي لازم تعرف انك من تلزم اي منصب بالشغل لازم تعرف ان كل معلومه سرية تطلعها اكو الها عواقب و تكون انت دتسوي شي زين ينكلب عليك وتصير بموقف انت متريد تكون بيه، اني هنا اتعلمت الحفاظ على معلومات الشغل بالطريقة الصعبة و اتعلمت درس مراح انسى، و اكتشفت انو اكو هواي شغلات تسويها ممكن انت تشوفها عادية بس ممكن تفرق وياك كلشي، مثلاً، من جنت ساكت على مديري الاول هوه و معاملته السيئة محد اتضرر غيري و خلته يتمادى بتعامله وياي، و من ما سكتت على حقي و اشتكيت على هذا المدير و بعدين اثبتت اني اشتغل زين و تعاملي زين ويه الموجودين، خلاني اقرب للناس الي موجودين و خلاني محل ثقة و كلمتي صارت مسموعة، يعني من الناس الي جنت مدير عليهم و من الناس الي جانوا مديرين عليه، اتعلمت اني اعامل الكل بالشغل نفس الشي اذا كان عربي او غير عربي، لان اكثر ناس ظروني بهاذا الشغل بعد المدير الاولاني همه بعض العرب الي جانو محسوبين عليه و كل تصرف غلط يسووه ينحسب عليه اني، مع اني اتعرفت على ناس بهذا الشغل هم عرب و هم جانو كلش حبابين، مثابرين، جايين يشتغلون بشكل صحيح، ميسوون مشاكل، بس للاسف بمعظم الدول الاجنبية يشوفون كل العرب على انهم كيان واحد، لحد الان اني بهذا الشغل و مرتاح بي و كل فتره تجيني ترقية و اصير اعلى بهذا الشغل، وللعلم ماكو احد عربي بقى بهذا الشغل غيري، أكو هواي كالوا انو الشغل بطلهم لان همه عرب، و طبعا كلامهم غلط و الدليل اني استمريت بهذا الشغل و بالعكس هواي نحجي بالشغل عن الثقافه العربيه و الماكن الحلوه هناك و الاكل و مرات اعزمهم على البيت و اني و امي نسويلهم دولمه تخبل أو برياني و شوربة عدس و من هاي الأمور، و أتذكر شخص ويانه جان حاب يزور الشرق الاوسط و اني نطيته اماكن يروحلها و وصيت على ناس اصدقائي هناك و من رجع كالي هاي من احلى الرحلات الي رحتها بحياتي. 

و أخيرا لازم تعرف شي مهم، انك اذا لزمت منصب بشغلك و صرت مدير على مجموعة من الموضفين، لازم تعرف شلون تخلي عندك الموضف أولوية، لان اذا جان الموضف مرتاح و ببيئة صحية راح ينطيك احسن ما عنده، أبدا لتكون قاسي بالتعامل ويه الناس الي انت مديرهم لأن صدكني محد راح يسوي الي تريدة منه بنفس و محد راح يساعدك تكبر انت هم، لان اذا ادارتك جانت زينه و الموضفين الي جواك مرتاحين، هذا الشي راح يرفعك و راح يقويك أكثر، و ما اتوقع اكو احد يحب ان الشخص الي كدامه يبتسمله  و هوه ديسب عليه بباله و يكرهه، و بأول فرصه انت توكع بيها محد راح يوكف وياك و بالعكس راح يصير ضدك و بنفس الوقت اذا انت جنت موضف لازم تعرف كل حقوقك و واجباتك بشغلك حتى تعرف من مديرك يتخطى حدوده وياك و بنفس الوقت تقدر المدير المحترم الي يقدرك و يقدر مجهودك.