وياكم فلان و هاي الصوتية التاسعة بعد العاشرة من عراقي بودكاست الموسم الثاني، أول ماا طلعت من الوطن العربي و بديت استكشف طريقي و شنو اريد اسوي و شنو اهدافي، اشتغل لو ادرس لو استثمر لو لو لو، و جنت بعدني دا احاول افهم شنو اريد من هالدنيا و وين اريد اوصل، و اذا فجأة اصطدمت بموضوع مهم جدا، وهو الزواج!

من أول ما خلصت جامعة و مباشرة بعد حفل التخرج جانت المباركات تجي على نمط واحد و هو مبروك و عقبال ما نفرح بيك؟ 
تفرحون بيه، زين و الشهادة الي كعدت اشتغل ٤ سنين عليها، ليش متفرحكم؟ ليش فرحتكم مرتبطة بموضوع واحد و هو الزواج، حتى من الواحد يخلف طفل أول شي يكولونه الك هو يوم الي تفرح بيه و تشوفه عريس أو تشوفها عروسة، يا ترى الناس ليش هلكد مدققة على موضوع الزواج؟ و ليش هلكد معتبرين الزواج السبب الرئيسي للفرحة و المؤشر الوحيد لنجاح الشخص، مو مهم اذا خلص دراسات عليها أو فتح مشروع أو شركة آو صعد للفضاء، هذا كله مو مهم اذا انت بعدك ما اتزوجت!  

أول ما وصلنا آني و أهلي للبلد الي اني بي حاليا و تقريبا قبل ٦ سنوات من الآن، و قبل ما الكي شغل و قبل ما اشتري سياره و قبل ما افهم اني راح ابقى بهاي المدينه او لا، قررت و بلحظة رعونة و تسرع اني افكر بالزواج و الاستقرار، على اساس اني شنو ختمت كل المراحل و هاي المرحلة الي باقيتلي، و بالفعل أهلي شجعوا الموضوع كلش و أصلا همه الي اقترحوا الموضوع و زني اعرف ليش جانو يريدوني اتزوج، اولا حتى يفرحون بيه بما انو الزواج هوه السبب الوحيد للفرح للعائلة العراقية، و ثانيا حتى لا انحرف في بلاد الغرب الكافر، و طبعا هذني السببين مجانن ببالي ابدا، و مع ذلك بعد اشهر من وصولي لهاي البلد خطبت بنية ذكية و جميلة و مؤدبة، و هنا لكيت روحي دا اتجه اتجاه غريب و مو وقته و مو مكانه، صارت حياتي بدل ما تكون موجهه على تطوير نفسي و الاستقرار و وايجاد الحلول و الطرق الي حتخليني انجح بهاي البلد، صارت موجهه على شلون اتعامل ويه اهل خطيبتي و شلون اقدم افضل شي الها و شلون ابقيها راضيه و شلون ما ابين لأهل خطيبتي اني مو بخيل و انما ما عندي شغل، و شلون ابين كدامهم اني انسان ملتزم و مؤدب و ما اسوي شي غلط، و نسيت ان ان الهدف من الزواج بعيد كل البعد عن هاي الامور، و نسيت ان الزواج مو مرحلة و واحد يمر بيها و انما حياة كاملة لازم يتأقلم وياها، و بعد فترة من الأحداث الي صارت، الخطوبة ما نجحت و صرت وراها حاير شنو راح اسوي هسه؟ هلي الانفصال جان حل، هل ادور على احد ثاني و هم افكر بالزواج، و خصوصا ان كل اصدقائي بالجامعة اتزوجو و كل ما افتح الفيسبوك الكي احد من اصدقائي ديتزوج و مبروك و الورود البيضه بكل مكان على الفيسبوك و اثواب العرس و البدلات، الموضوع خلى عندي واهس للزواج و شفته شي طبيعي اني اغتنم اي فرصه للزواج و السب الثاني ان اهلي جانوا بس يريدوني اتزوج و يريدون يشوفون جهالي و هيج راح اتاخر عليهم بالاطفال و من هاي الامور الي كلكم سمعتوها من اهلكم، و بالفعل اقدمت على الخطوبه للمرة الثانيه بعد فتره مو كلش طويله من أول مره، تكدرون تسمعون قصة الخطوبة الثانيه بصوتية سابقة بعنوان علاقة و حماقة، و الصراحة بعد هاي العلاقة اني اكتشفت عدة اكتشافات و منها الاسباب الي دير بالك تتزوج بسببهم: 

أول سبب غبي للزواج هو انك تتزوج لمجرد ان اصحابك كلهم اتزوجوا و بديت تحس روحك لوحدك، يعني اني جان عندي شلة و اصدقاء من الجامعة، حرفيا بعد التخرج ٧٠ بالمية منهم اتزوجوا و حاليا كلهم متزوجين، و طبعا مدا اكول انهم سوو شي غلط بالعكس، بس همه لكو طريقهم و جان عدهم الاسباب المناسبه للزواج بالنسبه الهم و لهاذا لتسأل أحد من اصدقائك شنو رأيك اتزوج أو شنو رأيك بالزواج و حتى اذا سألتهم، لتاخذ اجابتهم على انها الحقيقة المطلقة، يعني الي يكلك الزواج احلى شي بالدنيا مو شرط كلامه يكون صحيح، بس كلامه صحيح بالنسبه اله و لظروفه و لحياته و لشريك حياته، والي يكلك الزواج اسوء شي بالدنيا هم مو شرط كلامه يكون صحيح، بس جوابه راح يكون مبني على معطيات و ضروف و قرارات هوه مر بيها أو اخذها ادت بيه الى هذا الاستنتاج، و أكيد اسباب زواج الشخص الاول الي عجبه الزواج مو نفسها اسباب زواج الشخص الثاني الي كره الزواج و شافه تجربه سيئة و اكيد طبعا مو نفس اسبابك انت للزواج أو اسبابي اني. 

ثاني سبب غبي للزواج هو انك ترضي اهلك لمن يكولوك يلا شوكت تتزوج و راح تتأخر، ببساطة لان هذا القرار انت و شريكك أكثر شخصين راح يتأثرون بيه، مو أهلك مو اهلها و مو الجيران و مو المجتمع، لذلك من اهلك يسئلوك شوكت تتزوج و شوكت تفرحنا، لتاخذ هذا السؤال على محمل الجد، خليك عقلاني و فكر بكل العقبات الي حتمر بيها و العواقب الي حتصيرلك بناءا على هذا القرار، غير ان التسرع بهذا القرار ممكن يضر اهلك اكثر منك اذا جان بي ضرر، لان ممكن من تتسرع و تتزوج اي شخص يمر من كدامك او احد يقترحه عليك و انت متعرف اي شي عن شخصية هذا الشخص او طريقة تعامله وياك او ويه اهلك، هذا ممكن يفتوك بحفرة متكدر تطلع منها، منها ان هذا الشخص ما حب اهلك، او انت ما حبيت اهله، او اهل هذا الشخص ما توافقوا ويه اهلك و صارت مشاكل، او ان الشخص الي انت تزوجته يشوف انك ميصير تروح تشوف اهلك او يتضايق من هيج تصرف، او تصير مشاكل بيت امك و مرتك مثلا او بين ابوج او امج و زوجج، و للآسف بمجتمعنا الزواج نباوع عليه انه مو بس بين شخصين و انما بين عائلتين، و طبعا اشوف هذا الشي غلط بس مو هذا موضوعنا، بس بالاخير اهلك حكون هدفهم انهم يفرحون بيك بالبداية و للاسف ينكلب الموضوع و يصير محور حياتهم المشاكل والجدالات ويه هذا الشخص او اهله، و للاسف مراح تكدر ترضي جميع الاطراف بأي شكل من. الاشكال، اذا جان هذا سببك الاول للزواج.

ثالث سبب غبي للزواج هو الاكتئآب و الوحدة، و المشاعر السلبيه الي يدفع الشخص انه يدخل علاقة جديده حتى يرتاح من هاي المشاعر، و هنا انت اتزوجت لسبب اناني و سبب مو مدروس ابدا، لان انت متدري اذا انت اتزوجت هذا الشعور السيئ راح يروح او لا، يمكن يزيد؟ شمدريك، يمكن تجيلك نوعية جديده من المشاعر السلبيه من هذا القرار و منها القلق او الضغط النفسي او عدم التوافق ويه الشريك او تحمل مسؤولية انت بعدك مو جاهز انك تتحملها، فنسبه انك تخلص من هاي المشاعر بالزواج قليلة جدا و اذا جانت راح تروح فراح يتبعها مشاعر جديده ممكن تكون اسوء و اني هنا دا احجي اذا جان هذا سببك الوحيد و هذا مينطبق على كل الاسباب.


 رابع سبب غبي للزواج هو انك تريد تخلف و بس، و طبعا هذا يمكن اغبى سبب بيهم، لانك باختصار دتغير مسار حياتك بالكامل  بدون اي خطه محكمة و بدون التفكير بالمسؤوليه الي راح تنشمر عليك، يمكن شعور الابوه او الامومه هواي ناس تفتقده او تريد تحس بيه او يعجبها، بس هذا مو سبب كافي انك تتزوج، لانك هنا نسيت اهم جزء و هو شريكك و اهدافه من هذا الزواج و هل راح يربي ابنك او بنتك بالطريقة الي انت تشوفها مناسبه، و هل راح يكون متحمل للمسؤولية و هل راح تكون كادر انك تتحمل مسؤولية كائن من أول ما ينولد لحد ما يصير عمره ١٨ سنه و انت تشتغل عنده حرفيا و تخاف عليه و تحميه و يمكن هذا الطفل يحب انك تسويله هذا الشي او لا هم متدري، لازم تتقبل ان الطفل ممكن عندده افكار تختلف عن افكارك مثل انه ممكن يريد يغير دينه مثلا لان ما مقتنع بيه، أو يكون متدين كلش لحد التطرف، أو ممكن يريد يغير جنسه و هذا الشي موجود أكيد، أو انه يريد يذخل اختصاص انت متشوفه مناسب بس هوه ديشوف مستقبله بيه، و هواي تحديات انت راح تواجهه ويه هذا الكائن الي انت راح تدخله حياتك، اذا تريد تسافر انت لازم تفكر وين راح تودي ابنك و اذا اخذته وياك ممكن يكعد يبجي طول الطريق و يطلع رحلة من خشمكم، او انه يوكع و يتعور أو يصير بي شي، لازم طول الوقت انت عينك عليه  لان هذا مسؤوليتك، غير السهر طول الليل و انت عندك شغل الصبح لان ابنك مريض و حرارته مرتفعة، و اهم شي انت لازم تعرفه انك مو من حقك انك تحمل ابنك منيه او تنتظر شي منه بالمقابل بس لان انت سويت كل هاي التضحيات، لان هوه ما طلب انه ينولد و مجان قراره هوه و انما جان قرارك انت، متكدر تكول لابنك اني كبرتك و علمتك و تعبت عليك انت لازم تسمع كلامي لان ببساطة هذا واجبك، لذلك عمرك بحياتك لتكول هيج لابنك و لازم تعرف انك لازم يا تتقبل هذا الشي و ميكون عندك اي توقعات أو امل لشي انت مو بأيدك  يا تعيش ويه خيبة الأمل و بالاخير ابنك حيسوي الي يريده و الي يعتبره حياته الخاصه. 

خامس سبب غبي للزواج انك تريد تهرب من ظروف معينه أو تهرب من بيت أهلك أو اهلج، ببساطة لانك راح تنصدم بتحديات اصعب بهواي من التحديات الي دتواجهها او دتواجهيها ويه الاهل، على الاقل الاهل يعرفون شخصيتك و تصرفاتك و الاشياء الي تحبها و الاشياء الي تكرهها، بس شريك حياتك الجديد الي انت متعرف عن حياته اي شي غير الاشياء الي كالكياها راح يخليك تفوت بمشاكل و امور اسوء و يمكن احسن متدري، بس اعرف انك دتقامر هنا و يا تربح يا تخسر، و الخساره راح تكون جبيره، لان انت هربت من اهلك او ضروفك بالزواج، بعدين شلون راح تهرب من شريكك اذا اكتشفت ان الحياة صارت اصعب، يعني ممكن انتي تشوفين انو اهلج ضاغطين عليج و ميخلوج تطلعين او تدرسين او تشتغلين او تمارسين حياتج بشكل طبيعي و يكونون قاسيين عليج و يعاملوج مثل الشخص الي يخدمهم و بس و حرفيا اذا جان المطبخ مو نضيف او ماكو اكل بالبيت راح يكون اللوم عليج انتي بس مع ان اكو سبعة عايشين بالبيت غيرج، اشمعنى انتي الي تنلامين ببساطة لان انتي بنيه و همه بعقليتهم المتحجرة و المتخلفة شايفين ان فايدتج بالحياة هيه خدمتهم  لحد ما تتزوجين شخص ثاني يعاملج كخدامه همين، و تصيرين بدل ما تخدمين اهلج و اخوتج يتغير شغلج و تصيرين تخدمين الرجال الي حيتزوجج و أطفالكم، و لهاذا انتي ما طلعتي من هاي الدائره و خصوصا ان الشخص الي اتزوجتي بتسرع و بشكل عمياوي، وارد جدا و احتمال كلش جبير يكون من هذا النوع لان المجتمع مليان بهاي النوعيه من الشخصيات، و اذا فكرتي انج تريدين تشتغلين او تدرسين او تطلعين، راح يكلج انتي ببيت اهلج مجنتي تسوين هاي الاشياء فليش متوقعه اني راح اخليج تسوين هاي الاشياء و هنا انتي انحبستي بقفص، من الصعب و اقرب للمستحيل انج تطلعين منه، بس طبعا مو مستحيل، و اكيد هسه حتكولين لنفسج لعد شنو الحل اذا الزواج مو هوه الي حيطلعني من هذا الحال، الحل انج تحاوين تطورين من نفسج و تشتغلين على نفسج و تكونين شخصية قويه و تعرفين تجاوبين و تتناقشين و تدافعين عن حقج و ميحتاج تكونين هجوميه لان اكو اهل ميمشي وياهم هذا الاسلوب و ممكن يعرض سلامتج للخطر، بس حاولي تلكين ثغرة او طريه تكدرين تطلعين بيها من هذا السجن الفكري و النفسي، مثل انج متقبلين تعوفين المدرسه اذا اهلج اقترحوا عليج هذا الشي، مثل انج تتعلمين مهارات جديده و تسوين علاقات ويه ناس خارج مجتمعج او بيتج، و طبعا راح تسألين شلون هذا الشي ممن يفيدني، و طبعا راح يفيدج انج مراح يكون عندج هذا السبب الغبي للزواج وهو انج تطلعين من بيئتج، و بنفس الوقت راح يصير عندج قوه خارقة و هي انج تدافعين عن نفسج و عن احلامج و اهدافج، و غير طبعا انج بهاي الطريقه اذا اتزوجتي راح يكون مستحيل على شريك حياتج المستقبلي انه يكلج انتي ما مسموحلج تسوين هاي الاشياء لان انتي مجنتي تسويها من الاساس، و اني متأكد طريقه اختيار شريك حياتج راح تتغير جذريا عن هذا المتخلف و الرجعي الي جاي يفرض سيطرته عليج. 

الزواج مسؤولية جبيره و مستحيل تنبني على قرار واحد أو احتياج واحد، حاول دائما تلكي اسباب منطقية و مهمه بالنسبه الك و لأهدافك و نفس الشي لشريك حياتك، حاول انك تتأكد ان الشخص الي راح تختاره يكون عنده اهداف مهمه و متوافقه ويه اهدافك او اهدافج للزواج، لان ممكن يكون هدفك بالزواج الخلفة و الاطفال و هدفها الهروب و الصعود للقمه، او يكون هدفك الحب و هدفها المتعة، او يكون هدفك انك ترضي اهلك و يشوفون جهالك و يكون هيه هدفها السفر و التنقل و هذا يتعارض ويه هدفك لان اهلك محيشوفون هذول الجهال، هواي اسباب ممكن تؤدي بيك لزواج ناجح او زواج فاشل او يمكن حتى عدم الزواج أساساً، بس كل واحد حر بقراراته.