وياكم فلان و هاي الصوتية السابعة بعد العاشرة من عراقي بودكاست الموسم الثاني، قبل فترة نزلت صوتية بعنوان بغداد مدنية و جنت دا احجي بيها عن قرار الغاء حفلة محمد رمضان في بغداد، و اعترضت بوتها على الغاء الحفل لان سببب الغاء الحفل مو مقنع مع اني مو من محبين محمد رمضان و اصلا ميعجبني تصرفاته خارج اطار الغناء و التمثيل، بس جان اعتراضي على المنع لان يكولون محمد رمضان ينزع هدومه و يخدش الحياء العام، و شرحت شنو اسبابي، انصحكم تروحون تسمعون الصوتية راح تعجبكم، و اني نفسي الي رفضت الغاء هذا النوع من الحفلات الي تقام في السندباد لاند، راح اعترض على حفل سعد لمجرد و اطالب بإلغائه مثل مجموعة جبيرة من العراقيين الواعيين الي رفضوا وجود هذا في الشخص بالعراق، طبعا هواي ناس راح تكول شتقصد و شنو هالتناقض، بعدين وياك؟ هسه نرفض لو نأيد هاي الحفلات؟ والله خبلتنا! 

 خليني افهمك شنو اقصد، اكو فرق بين انك تطلب ان يلغى هذا الحفل بس لان حفل غنائي. الناس دتتونس بيه، و بين انك تطلب ان يلغى هذا الحفل لشخص المغني الي هوه سعد لمجرد، خليني شويه احجيلكم عن سعد لمجرد يمكن تفهمون قصدي، و اني ادري اكو هواي ناس تعرف هذا الحجي و من زمان، ولهاذا السبب حبيت اضيف فقرة جديدة لهاي الصوتية بعنوان 

قضايا سعد لمجرد

القضية الأولى: سنة ٢٠١٠ اتهمت فتاة أمريكية سعد لمجرد بالاعتداء عليها بالضرب والاغتصاب،  و تم القاء القبض على المتهم أول مرة في نيويورك و طلع بكفالة قبل النطق بالحكم عليه و هرب من الولايات المتحدة و ما رجع لهناك لحد الآن.

القضية الثانية: عام ٢٠١٦ اتهمت فتاة فرنسية سعد لمجرد بالضرب و الاغتصاب بأحد الفنادق قبل ايام من حفلته في باريسبعد ما جان تحت تأثير الكحول و المخدرات، و القضية لحد الان بالمحاكم و سعد لمجرد كعد تقريبا ٦ شهور و تم اطلاق سراحه سنة ٢٠١٧ شهر ابريل مع ارغامة على وضع الاسورة الكترونية حتى تتم مراقبته. 

القضية الثالثة: بنفس الشهر الي طلع بيه من السجن أكو بنية فرنسية مغربية رفعت عليه قضية اغتصاب و ضرب و كالت ان الحادثة صارت بسنة ٢٠١٥ بالدار البيضاء في المغرب، و بعد فترة و لأسباب غامضة انسحبت المدعية من القضية و قرر القضاء رد الدعوى. 

أكمل بعد؟ اوكي خلي أكمل، 

القضية الرابعة: سنة ٢٠١٨ بنية جديدة رفعت قضية على سعد لمجرد بتهمة الاغتصاب و الاعتداء في مدينة سان تروبيه جنوب شرق فرنسا، 

و بهيج سعد لمجرد متهم ب٤ قضايا اغتصاب و عنف ضد المرأة. 


سنة ٢٠٢٠ مسرح مصري اسمه كايرو شو قرروا يحتفلون بالسنة الثانيه على افتتاحهم و قرروا يجيبون منو يحي الحفل؟ المغتصب سعد لمجرد، و بمصر الدنيا انكلبت، طلعو هاشتاك (مش عايزين لمجرد في مصر) و بالفعل بعد ضغوطات هواي على السوشل ميديا، قررت كايرو شو انها تلغي الحفل، و على كولتهم احنا عدنا مغتصبين كفايه ليش تستوردون مغتصبين من بره و تريدون نحتفل بيهم؟ و الصراحة اني هنا اوجه تحية لكل المصريين الي وكفوا بوجه هذا الحفل و جان عدهم موقف يحترم، 

بالمقابل ادارة سندباد لاند قررت تدعو سعد لمجرد حتى يحيي حفلة الاسبوع الجاي للمغتصب سعد لمجرد و على غير المتوقع انطلقت حملة لرفض هذا الحفل من ناشطات عراقيات و هواي ناس شاركت بيها و اني من هذا المكان ادعم هاي الحملة قلبا و قالبا بس للاسف اكو هواي ناس سوت حملة ضد هاي الحملة بالعراق، والناس انقسمت قسمين، القسم الاول الي يرحب بالمغتصب و القسم الثاني الي ديرفض هذا المغتصب. 
 
و انك ترفض شخص مغتصب انه يسوي حفلة ببلدك هوه حق عليك و احتراما لكل بنية تم اغتصابها من سعد او من غيره، احتراما لضحايا قضايا الاغتصاب و الاعتداء الجنسي بالعراق و بكل مكان بالعالم، دقيقة احتراما شنو؟ شلون تريدنا نحترم بنية تم اغتصابها و احنه عدنا المادة ٣٩٨ من قانون العقوبات الي يعفي المغتصب من العقوبة القانونية في حال الزواج من الضحية؟ احنا حتى القانون الي عدنا ما محترم ضحايا الاغتصاب، تريد احنا نحترمهم؟ بس اتخيل انت تم اغتصابك يا عزيزي المستمع او تم اغتصابج او اغتصاب احد انتي تعرفيه او اغتصاب احد قريب عليك مثل امك أبوك او اختك أو اخوك او جيرانك، و هذا المغتصب راح سوة حفلة و كل الناس راحت لهاي الحفلة و دفعت فلوس و و صورت و ركصت ويه هذا المغتصب، شنو راح يكون احساسك؟ هل راح تكول هاي حياته الشخصية ؟ مثل ما بعض الناس هسه دتكول، لازم يكون عندك موقف انساني لان انت اليوم راح تسمعني و بعدين تنساني و الضحية راح تكول ان كل المجتمع جان ضدي و نساني، و المغتصب طبيعي راح يتزوج الضحية. 


النبذ المجتمعي هوه اهم الثقافات الي لازم نتعلمها بمجتمعنا و نعلمها لاولادنا و نمارسها بشكل مباشر على هذا النوع من المشاهير، بس دقيقة شنو يعني النبذ المجتمعي؟ اشرحلك لو انطيك مثال؟ راح انطيج مثال: 

فريق مانشستر يونايتد الانكليزي قبل سنه تقريبا جان عنده لاعب شاب اسمه ميسون جريينوود مهاري جدا و اله مستقبل كلش جبير و كل الانديه جانت حاطه عينها عليه و تريد تشتريه، جان راتبه الاسبوعي ١٠٠ الف جنيه استرليني و جان عقده لحد ٢٠٢٥ و هوه جان عمره ١٩ سنه بس، اتخيل انت تكون واصل هيج مرحلة بحياتك و انت بعدك عمرك ١٩ سنه، و بيوم من الايام صديقة جريينوود نشرت صور وفيديوهات الها دتنضرب منه و ديعتدي عليها، برأيك الناس شنو سووت و النادي الي هوه ابنه شنو سوو، منعو من حظور التدريبات و استبعدوه من التشكيلة و شالو التيشرت الي عليه اسمه من موقعم و متجرهم و طلبت من الناس الي عدها تيشرت لجريينوود ترجعه للمتجر و راح يرجعولهم فلوسه او ينطوهم تيشرت مال لاعب ثاني، اتخيل كل هذا صار باقل من اسبوع، و بعدين تم القاء القبض عليه و ديتحاكم، و طبعا احتمال يكون بريء و احتمال يكون مذنب، بس هذا مثال على النبذ المجتمعي، الي لازم احنا نتعلمه لان هاي احسن طريقة نجرد بيها المجرم من شهرته، و بهيج اي احد ثاني راح يحسبها ١٠٠ مرة قبل لا يعتدي على احد لان راح يتوقع انه لازم يواجه المجتمع و راح يخسر هاي المواجهه، بس للاسف بدل ما نجرد سعد لمجرد من امتيازاته و شهرته، سعد لمجرد هوه الي جردنا من انسانيتنا و مبادئنا. 

و عندك قضية الأميرة هيا و حاكم دبي الشيخ محمد بن راشد الي هربت منه الاميرة هيا الى بريطانيا لان جانت تخاف منه و جان يعامل العائلة بقسوة و طلبت حظانة اطفالها، و خصوصا ان محمد بن راشد خطف ثنين من بناته قبل هيج الشيخة لطيفة و الشيخة شمسة و رجعهم دبي و بوقتها القاضي كال ان الشيخ محمد اضهر بشكل مستمر سلوك متجبر و متسلط بالتعامل مع اسرته اذا تصرفو عكس رغبته و انه جان يمارس العنف ضد الاميره هيا. و خسر القضيه بوقتها و خسر حظانة الطفلين و دفع كفالة. 

ولذلك نفسنا الي وكفنا ضد المتطرفين الي يمنعون حفلات السندباد، راح نوكف اليوم ضد السندباد لأنها جابت مغتصب، بس ما اتوقع ينلغي الحفل، تدرون ليش؟ لان الناس الي دتعترض على الحفل هالمره همه ناس حقوقيين و ناشطين و ناس من عامة الشعب، مابيهم واحد ينكاله سيد لو شيخ ولا بيهم واحد عنده سلطة فوق القانون او يعتبر نفسه هوه القانون، بس مع ذلك اني سعيد بهاي الحركة و بهذا الوعي الي موجود عند الناس، اتمنى نشوف تأثير هذا الوعي على الشارع العراقي بأسرع وقت. 

وللعلم اذا انت مارست النبذ المجتمعي على شخص مو معناها انه ما يكدر يرجع لمكانته، بس خلي يثبت برائته من التهم الي موجهه اله و اني اول واحد اروح للحفلة مالته، لان اكيد مو من العدل انك تنبذ شخص بريء، و مثال على ذلك قضية جوني ديب و امبر هيرد الي اول ما طلعت امبر و كالت ان جوني ديب جان ديضربها و يعتدي عليها، كل الناس وكفت وياها، دقيقة انت شكلك متعرف قصة جوني ديب و امبر هيرد، تريد احجيلكياها؟ راح احجيلكياها بس انت اذا تعرف القصة او ما مهتم الها تكدر توكف هنا: 

زين شنو هاي القضيه وليش كل الناس دتحجي عليها؟ 

جوني ديب ممثل معروف جدا و عنده افلام هواي مشهوره و اتوقع معظمكم على الاقل شايفله فيلم لو فيلمين اله، وبالخصوص فيلم قراصنة الكاريبي او  Pirates of the Caribbean، سنة ٢٠١١ سوة فيلم اسمه ذا رم دايري ويه ممثله اسمها آمبر هيرد و بعد هذا الفيلم حبو بعض و بقو على علاقه سريه فتره طويله و بعدين وره فتره  اعلنو زواجهم سنة ٢٠١٥، و بعدين وره سنه بس اتطلكوا، بعد فترة من طلاكهم كلشي جان ديمشي تمام و فجأة امبر هيرد طلعت و رفعت على جوني ديب قضية اتهمته بيها بالاعتداء عليها و ضربها اثناء فترة علاقتهم، و اختارت توقيت كلش سخيف انها ترفع عليه القضيه و هو بعد ٣ ايام من وفاة والدة جوني ديب، يعني امه ماتت و انرفع عليه قضيه اعتداء و كامت تطلع صور الها مضروبه و عليها كدمات و من هاي الامور، فبوقتها كل العالم اتضامن وياها و طلع هاشتاك مي تو الي صار ترند بكل مكان الي يدعو الى نبذ العنف و الو طبعا هذا الهاشتاك يراويك شكد الانترنت اله قوة و نككدر نستعمله بشكل ايجابي، مثل هاشتاك حفل سعد مرفوض بالعراق، و هذا النوع من الهاشتاكات يخلي الناس الي تم الاعتداء عليهم يطلعون و يحجون قصصهم و ياخذون حقهم من المعتدي، و بوقتها هذا الهاشتاك فضح كلش هواي مشاهير و منتجين و ممثلين و ناس مخضرمين بالسينما و اكو هواي انسجنوا و انحكم عليهم بسبب انتشار هذا الهاشتاك، و هنا نكدر نكول النبذ المجتمعي جان تأثيره قوي جدا، و بوقتها تم نبذ جوني ديب من السينما و من كل الاعمال و جان عنده عقد ويه نتفلكس انلغى و جان عنده عقد مال تكملة سلسلة قراصنة الكاريبي و انلغى و خسر كلشي حرفيا و فوكاها خسر القضية و دفع ٧ مليون دولار لآمبر هيرد كتعويض، و طبعا وراها امبر هيرد صارت نجمة اكبر و كامت تطلع بهواي افلام و برامج و كالت ان ال٧ مليون راح تتبرع بيهم للجمعيات الخيريه لان هدفها جان معاقبة جوني ديب على الاعتداء و توصيل رسالة للمجتمع و ما همها الفلوس و انقفل الموضوع بوقتها، بعد فترة رجعت تحجي على جوني ديب و عن العنف و هاي الامور و فجأة لكينا جوني ديب رفع قضية تشويه سمعة و طالب ب٥٠ مليون دولار، جان امبر شسوت؟ رفعت هيه هم قضيه عليه وطالبت ب١٠٠ مليون، مو انت تريد ٥٠ اني اريد ١٠٠، و بدأت هنا قضية العام، بكل مكان تلكيها على السوشل ميديا و اليوتيوب و كل الناس متابعه القضية وتطوراتها، حسيتها مثل محاكمة صدام حسين الي جانت كل الناس دتتفرج عليها، نفس الشي بس هاي بين ٢ ممثلين مشهورين و واحد ديتهم الثاني، هنا طلعت دلائل جديده و امبر هيرد بين انها جانت دتجذب هواي بموضوع القضية الي كسبتها قبل فتره و الناس بدأت تتعاطف مع جوني ديب و خصوصا ان من الواضح ان هيه الي الجانت دتعنف جوني ديب و كطعتله اصبعه و ضربته و همين طلعولها تسجيل تكوله “روح كول للعالم اني جوني ديب رجل ابيض و ضحية عنف اسري و خل نشوف منو حيصدكك” و هنا لازم نفهم ان النبذ المجتمعي و قضايا العنف الاسري و لفترة طويه جان يتطبق على الرجال الي يعتدون على النساء او الاطفال، بس مجان احد يصدك من واحد يكول اني اتعرض للعنف من زوجتي و دائما جان الحق ويه البنية اذا اشتكت، و من وجهة نظر هواي ناس ان هاي القضيه راح تثبت ان اي احد ممكن يتعرض للعنف الاسري اذا جان رجل او مرأة، أهم الدلائل الي جانت بهاي القضيه لحد الآن جان تسجيلات صويته لها و من ظمنها التسجيل الصوتي الي حجيت عنه قبل شويه، غير طبعا ادعاءاتها انو ضربها و شوهها بتواريخ معينه و طلعولها مقابلات و صور بهاي التواريخ تثبت انو كلشي مابيها و شلكها طبيعي جدا، و من واجهوها بهاي الدلائل كالت انها جانت تستعمل منتج معين من شركة معينه مخصص لازالة اثار الضرب، و هنا الشركة الي تصنع هذا المنتج كالت انها اصدرت المنتج سنة ٢٠١٧ يعني بعد ما انفصلوا عن بعض بسنة، و وره فترة طلعت تسريبات انها جانت تخون جوني ديب ويه ايلون ماسك و الفنان جيمس فرانكو و اكو تسريبات ثاني تاكد انو امبر هيرد جانت على علاقة ثلاثية ويه ايلون ماسك و وحده ثانيه في بيت جوني ديب، و هم طلعت كالت انو هوه كسر خشمها و هم طلعو صور الها بنفس التاريخ الي هيه ذكرته و جان خشمها ما بي شي، غير طبعا مرة من المرات جوني ديب كاللها احنا ما اتصور نكدر نكمل سويه و علاقتنا سامة و من هاي الامور، و من رجع للبيت لكه على فراشة فضلات بشرية و من سألها هاي شنو؟ جان تكول هذا الجلب مالك، و طبعا واضح انو هيهالي جانت مسويتها، ويمكن من اهم الامور الي انذكرت بالقضية و الي تقوي موقف جوني ديب، هو انها جابت سيرة كيت موس الي جان جوني ديب متزوجها و متهم انو دفعها من عالدرج الي بالتسعينات و كالتله اني ماريد مصيري يكون مثل مصير كيت موس، و بوقتها جابو كيت موس و طلبو شهادتها و كالت انو جوني ديب ما دفعها عالدرج و بالعكس هوه الي جابلها الاسعاف و شالها و دار باله عليها، المهم القضية بعدها حاليا بالمحكمة و كل يوم يطلعون لايف على اليوتيوب المحاكمة و الناس كلها متابعه و مندري شراح يصير بالاخير بس الصراحة المحامية و المحامي مال جوني ديب مشتغلين شغل كلش قوي بهاي القضية و ديعرفون شنو ديسوون و الواضح ان موقف امبر هيرد موزين بالقضية، حتى السبعة مليون دولار الي كالت راح تتبرع بيها للجمعيات الخيرية هيه ما اتبرعت بيها، واليوم المحامي مال امبر طلع فيديو كال شوفو الوحش جوني شنو جان يسوي ، وطلعو تصوير اله ديكسر بالكابينات مال المطبخ و شارب و جانت امبر دتصوره بالخفيه و اتعارك وياها لان دتصوره و هو بهاي الحالة، و جوني ديب كال همين انه ماكو احد مثالي و ماكو احد بينا مثالي و كلنا نسوي اخطاء بس اني عمري ما اذيت احد جسديا او اي من هاي القصص الغريبة الي تتهمني بيها، وهيه بالمقابل تكول اني تعبت و انهانيت و اتهددت و تم الاعتداء عليه و كل يوم دا اجي بي لهاي المحكمه اكو ناس دتسبني و تهددني و تهيني، و لهاذا بس اريدك تعرف، ان النبذ المجتمعي الي صار على جوني ديب هوه هوه ممكن يصير على امبر هيرد، لان الموضوع مو موضوع ذكر و انثى و انما منو الغلطان و منو المظلوم، ويمكن ثنينهم غلطانين مندري، يمكن قبل جان الموضوع يتطبق على الرجال بس بحكم نظرة المجتمع الهم انهم همه الي يبادرون بالعنف دائما و الي من المتوقع ان الموضوع يتغير خصوصا بعد هاي القضية، و طبعا هذا مو كلشي عن القضية بس هاي اهم النقاط باختصار عن هاي القضية و اليوم راح يكون اخر يوم للنظر بهاي القضيه و الصراحة ماعرف اذا هيئة المحلفين أو القاضي راح ينطق بالحكم او لا بس عود نشوف، و اني ادري ان اكو قضايا اهم بهواي بمجتمعاتنا و بمنطقتنا بس حبيت احجي عن هاي القضيه بالذات لان بيها النبذ المجتمعي اتطبق على الطرفين و النبذ المجتمعي متغير على حسب تغير المعطيات، لذلك لتتردد انك تمارس هذا الشي على اي شخص مشهور آو اله مكانة بالمجتمع، لان اتذكر من جنت صغير جنت استغرب من ينحبس شخص مشهور او يتحاكم و جنت عبالي المشاهير محد يكدر يحاكمهم لان مشهورين و اكو هواي ناس تحبهم، شلون عادل امام من يكول “هو في رأيس بيموت يا باشا” نفس الفكرة،  بس بعدين اكتشفت انو العكس، كل ما زادت الناس الي تحبك كل ما لازم يزيد عدد الناس الي تنبذك اذا ارتكبت جريمة بحق غيرك او بحق المجتمع و مو مهم منو انت، اذا جنت الممثل جوني ديب أو جنت الشيخ محمد بن راشد أو المغتصب سعد لمجرد.