وياكم فلان و هاي الصوتية الثانية بعد العاشرة من عراقي بودكاست، أيام الجامعة جان عندي شلة من الاصدقاء الي جنت كلش أحبهم و احترمهم، و اعتقد همه هم جانوا يحترموني، جنه نقضي معظم الوقت سويه و جنه نحضر محاضرات سوية و نروح للمختبر مال الجامعه سويه، و نرجع للبيت بنفس الباص و جنه نساعد بعض بالامتحانات و بالدروس، مرة من المرات جنه بالمختبر و دنسوي تجربة كيميائية و بهاي التجربة احترك طرف اصبع السبابة عندي، و الكل يعرف من يحترك اصبع من اصابعك تكوم تعرف قيمته لان كلشي تلزمه يكوم اصبعك يأذيك، وره ما احترك اصبعي كمت اتفادى الزم الشغلات بهذا الاصبع حتى ليأذيني و هواي مرات من جنت الزم الشغله واني ما منتبه ايدي لوحدها تسوي رد فعل لان الاصبع المحروك ديتعرض لشي خارجي، المهم انو اني مجنت دا اشتكي من الموضوع بس جنت اتفادى الزم الاشياد بهذا الاصبع مثل اي بشر عنده خلايا عصبيه باطراف اصابعه نرسل اشارات عصبيه للدماغ من تتعرض للاذى، و مره من المرات جان اكو بنية ويانه بالشلة طلبت مني الزم شغلة و لزمتها بايدي بدون ما انتبه على الحرك و ايدي صار بيها رد فعل و بسرعة لزمت الشغلة بايدي الثانيه، فالبنيه باوعت علية وكالت: هاي شبيك صير رجال!  اني هنا باوعتلها بنظرة و كلتلها و هو الرجال يعني ما عنده خلايا عصبيه مثلا او ماعنده احساس ؟ جان تكول اي بس يتحمل، اني هنا كلش ضجت و عفتها و رحت ومقبلت احجي وياها، هيه ما اهتمت وشافت انو الي كالته جان صحيح، وانو معنى الرجولة من وجهة نظرها السطحية هيه انك تكون انسان بدون احساس و بدون شعور، اني وقتها من رجعت للبيت ظليت افكر شنو يعني صير رجال و شنو معنى الرجولة، هل احنا نكول هاي الكلمه لاي واحد ماعنده احساس و ماعنده مشاعر و صوته خشن لو الها معنى اعمق احنا ما فاهمينه، و من ملاحظتي للذكور لمجتمعنا الي يتعبرون نفسهم رجال، لاحظت ان الذكر ينفرض عليه لقب الرجل من اول ما يجي للدنيا و هو لازم يدافع عن هذا اللقب طول حياته، و للاسف هذا سوى ضغط على الذكور بالمجتمع خلاهم يسيؤون فهم معنى هذا المصطلح و يسيؤون التصرف حتى ينكال عليهم رياجيل او عدهم رجولة، لذلك تلكي واحد اول ما صوته بدئ يخشن و شواربه بدت تخط، بدأ يتصرف بهمجيه باتجاه اهل بيته و الناس الي حوله حتى يثبت رجولته، مع ان خشونة الصوت هيه ما الها علاقه بالرجوله و انما الطفل  تكون حنجرته صغيرة كلش و الاحبال الصوتيه صغيرة بالحجم و رقيقة ولذلك يكون صوت الطفل اعلى من صوت الشخص البالغ و انعم، و مع مرور الوقت و الانسان ينمو، تصير حنجرته اكبر و تطول الاوتار الصوتية و تثخن و لذلك لصوت يصير اعمق و اخشن، يعني ماله علاقه بالرجولة، وبالنسبه للشعر على وجه و جسم الذكر فهو لان الذمور عدهم نسب اعلى من الاندروجين من الاناث لذلك يزيد من نمو الشعر على الوجه و غير اماكن و هادة يكون فوق الشفه والذقن و طبعا هرمون التستوستيرون يحفز نمو هذا الشعر اكثر و نمو العضلات اكثر و بهيج الجينات الي ورثتها تحدد الى اي درجة يكون الشعر عندك كثيف و داكن و نمو عضلاتك اكثر و اكبر، يعني الموضوع ميخليك احسن من غيرك، لا الصوت ولا الشعر ولا العضلات، لذلك اذا انت تتفاخر انك عندك عضلات اكبر او شعر اكثر او صوتك خشن فهذا الشي ابد ما الك يد بيه والموضوع كله صدفة، و اعتقد انو من الحماقة انك تتفاخر بشغلات ما الك ايد بيها، زين لعد احد حيكلي شنو الي يخليني رجل؟ شلون ننقيم الرجولة، و الصراحة الموضوع صعب يتعرف و صعب يكون اله تعريف واحد لان الرجولة مو شي ملموس او هرمون ممكن نقيسه و ماعدنه مقياس للرجولة، يعني اتخيل انت تشتري جهاز الرجالوميتر و تشوف نسبة رجولتك شكد، هذا الشي مو موجود و مو منطقي، بس نكدر نعرف شنو هيه المفاهيم الغلط عن الرجولة و المفاهيم الصح عن الرجولة.
بس اريدك تسئل نفسك هل انت رجل و عندك كل صفات الرجولة؟ و اريدج تسألين نفسج، هل ابوج او اخوج او زوجج او حبيبج او اي ذكر بحياتج رجل؟ 

معظمكم راح يجاوب على هذا السؤال بطبعا، بس قبل ما تجاوب او تجاوبين على هذا السؤال، خليني اكلج او اكلك ان صفات الرجولة بمجتمعنا هواي بس اني احب اصنفها ل٣ اصناف، و هي صفات رجولية و صفات ما الها علاقة بالرجولة و صفات تقلل من رجولة الذكر، و خليني ابدأ بآخر صفات و هيه الصفات الي تقلل من رجولتك: 

اهم الصفات الي مجتمعنا يشوفها رجولية و اني اشوفها صفات تقلل من رجولتك هيه كالآتي، لاحظت ان الصوت العالي و الصياح بالبيت و عالناس و العصبية يعتبرها البعض هيه من صفات الرجولة و الصراحة اني اشوفها العكس تماما، لان اذا انت شخص متكدر تسيطر على اعصابك و متكدر تتمالك نفسك ويه اهل بيتك او شغلك او بالشارع يخليك شخص اما عندك مرض نفسي يسببلك هاي العصبيه و اني اقترح عليك تزور طبيب نفسي يساعدك على حل هاي المشكله او انك مفسر هذا التصرف انك ممعتبر هاي الصفه من صفات الرجولة وللاسف عذا الشي بعيد جدا عن الرجولة و بالعكس انت شخص تحتاج تعيد حساباتك، لان محد يحب يقضي وقت ويه شخص عصبي و بس يتعارك على اتفه الامور، و ما اعتقد اكو انثى تحب تعيش ويه الشخص العصبي، و اني شفت بعض الاناث يشوفوها كصفه حلوة، بس صدكيني من تعيشين ويه الضخص العصبي راح تكرهين عيشتج و تكرهين نفسج و تكرهين هذا الشخص بسبب العصبية، لان ماكو شي ينحل بالعصبية، و كلنا نعرف ان الي صوته عالي هوه شخص ضعيف من الداخل و ديحاول يبين العكس بصوته العالي و بعصبيته، و بنفس الوقت الشخص الي ميعرف شنو يجاوب او ميعرف يناقش هم راح يوصل بيه الحال للصوت العالي و العصبيه حتى يخلي الشخص الي كدامه يخاف منه و يسكت و ميناقشة، لذلك صدكني العصبيه و الصوت العالي راح تبين ضعفك مو قوتك، ثانيا الضرب و استعمال العنف الغير مبرر، و الصراحه اني اشوفها اوصخ صفة ممكن تربطها بالرجولة، و اغبى شخص الي يستعمل ايده قبل عقله، لان انت مراح تفرق عن الثور او الغوريلا او اي حيوان ميعرف يستخدم عقلة و المنطق بالحوار او بالمواقف الصعبة، انك تعرف شلون تتعامل ويه شخص قلل من شأنك او اهانك او كلك كلمة موزينه بدون ما تستعمل ايدك او رجلك او راسك الناشف، هنا انت صرت رجل، و طبعا اني مدا اكلك لتدافع عن نفسك او تضرب الشخص الي اعتدى عليك بس من تكون انت الشخص الي يضرب بس لان معرف ترد بالمنطق او معرفت شلون تتصرف فانت هنا باضعف حالاتك، مثل ما سوى ويل سميث بحفلة توزيع جوائز الاوسكر من. ضرب كريس روك بس لان حجى نكته تتعلق بمرته، مع انو كريس روك حجه نكت على كل الكاعدين، و محد اعترض و اكل ضحك، و اذا ويل سميث فكر شويه قبل ما يتصرف هالتصرف الغبي، جان عرف شلون يتصرف و يرد عليه بدون العنف، جان ممكن ينتقده بعدين بالاخبار و الصحافه و جان ممكن يرفع عليه قضيه و جان ممكن يروح عليه بنص ما هوه جان ديحجي و ياخذ منه المايكرفون و يرد عليه كدام الناس و يحرجة، بس هوه خسر كل هاي الردود و خسر حقه بعد ما جان الحق وياه بهذا التصرف، حتى زوجته من سوو مقابله وياها كالت اني مطلبت منه يكوم يضربه و هيه مجانت قابله على هذا التصرف، فلتتوقع انك اذا كمت ضرب شخص كدام بنيه، هاي البنيه راح تنعجب بيك و تشوفك بطل، الا اذا جان تفكيرها سطحي مثلك، و هذا الحجي طبعا على الشخص الي ستخدم العنف على الناس الي بره بيته، اما بالنسبه للشخص الي يتعدى بالضرب على اهل بيته اذا كان اولاده او بناته او زوجته او خواته، فهم شخص حثاله و لا يرتقي حتى انو يكون انسان مو رجل، لان انك تستغل ان عندك هرمونات نطتك عضلات اكبر من زوجتك او اختك او انك تستغل انك عندك سلطة على اولادك او بناتك، فهذا اسمه وحشيه و غباء بكل ما تحمله الكلمه من معنى، فاذا انت شخص دتسمعني هسه و دتحس ان هذا الكلام دينطبق عليك، فاعرف انك شخص تحتاج تراجع نفسكك بتصرفاتك ويه اهل بيتك و الناس الي حولك، و لازم تعرف انك هيج دتثبت انك انسان متعرف تناقش و عقلك فارغ من شي اسمه منطق و رجولة، و اتمنى منك تحترم اهلك و اطفالك لان هذا الشي الوحيد الي حيخليهم يحترموك و يسمعون منك، لان الضرب و العنف بشكل عام سهل على الشخص الي عقله فارغ، و ازيدك من الشعر بيت، ماكو اي مبرر للعنف مهما كان و مهما اتصرف هذا الشخص و مهما اخطئ و مهما غلط، و حتى الخيانه مينرد عليها بالضرب، لان الشخص مراح يتعلم شي من الضرب بس راح يتعلم ان هذا الشخص الهمجي ميستحق الولاء. ثالثا الاستهتار: و طبعا هذا من اكثر الصفات الي يحبها الذكور الي تريد تفرض شي اسمه رجولة، يعني انك تسوق بسرعات عاليه و تتزيبك بين السيارات هذا عمر مراح يزيد من رجولتك و عمره ما راح يثبت اي شي غير الااستهتار و عدم المسؤولية، لان احس هواي ناس تسوي هاي الحركات لاثاره الاعجاب للجنس الاخر و حتى يثبت انه عنده عضو ذكري، الي هوه موجود بمعظم ذكور فصائل الحيوانات احسه مث ذكر الطاووس الي نفش ريشة الملون حتى يغري الجنس الاخر للتزاوج، و هذا ميفرق هواي عن الذكر الي يستخدم هاي الطريقه و الانثى الي تنجذب لهاي الطريقة، لانك بهالطريقه دتعرض حياتك و حياة غيرك للخطر و تخالف القانون و تتصنف بانك شخص مستهتر بعيد كل البعد عن المسؤولية، وهاي طبعا وحده من التصرفات الغبية الي كلش هواي يتسعملها الذكور لاثبات رجولتهم، اتأمل بالمجتمع الحولك و راح تشوف هواي من هاي التصرفات، اتمنى تكتبولي بالتعليقات شنو اكو تصرفات مستهتره يسووها الناس لاثبات ذكوريتهم. لان اذا بقيت احجي ساعتين مراح اخلص. 

زين طبعا هنا اكو ناس حتكول لعد شبقيتلنا، شلون نعرف الشخص الي عنده رجولة و شنو المعايير؟ و هنا نروح للصفات الي اشوفها من وجهة نظري تعبر عن الرجولة، من خلال بحثي عن الصفات الي ممكن تمثل الرجولة اصطدمت بتصرفات يعتبرها البضع رجولة بس هيه ما تثبت اي شي، لا رجولة ولا غيرها، منها انك اذا احتركت ايدك او منطقة بجسمك مثل ما صار وياي، كلش طبيعي انك تحس بالالام و تحاول تعالج هاي المنطقة و تتفادى انها تتعرض للاحتكاك ويه اي شي خارجي، لان اذا انت مجروح او محروك و اتعرض هذا المكان للاحتكاك ممكن يسوي عدوى بكتيريه او التهاب و ما اعتقد ان الاتهابات من صفات الرجوله هههههه، انك يكون دمك خفيف او دمك ثكيل، هذا ما اله اي دخل بالرجوله او عدم لا، هاي تختلف من شخص للثاني، انك طويل او كصير او عندك شعر على صدرك او اباطك او وجهك هذه ماله علاقه برجولتك، انك تحس بالزعل او الانكسار او الاكتئاب، هذا ما يخليك مو رجال، انك تبجي او تضحك بصوت عالي او تزعل او تحب او تبين مشاعرك، هاي كلها صفات انسانيه تميزنا عن غيرنا من الكائنات، مو عيب انك تبجي على شي فقدته او من شعور حسيت بيه، هاي كلها كيمياء موجودة بادمغتنا لازم نتعامل وياها بشكل طبيعي، لان انك تحاول انك تكبت هاي المشاعر و الاحاسيس الي عندك هذا راح يكون اله اثر رجعي على نفسيتك و شخصيتك، لتستحي من الحب او من الاشتياق او الحزن او البجي او الضحك او غيرها من ردود الافعال الطبيعيه، هذا مراح يقلل من رجولتك او شخصيتك، خليك صريح ويه نفسك و لتسمع للاشخاص الي ينتقدون مشاعرك و ردود افعالك لان هذا راح يأثر عليك مو عليهم، و حتى انتي الي دتدورين على الشخص الي تلكين بيه الحب و التقدير، لتدورين على شخص مشاعرة جافه و ميبينها، لان صدكيني راح تعيشين محتارة بشنو هذا الشخص يحس من يشوفج او من تتصرفين تصرف معين و راح تفتقدين للحنيه و الاحتواء من هذا الشخص.

 زين السؤال الجوهري هنا بعد ما حجينه عن الصفات الي تبعدك عن الرجوله و وحجينه عن الصفات الانسانيه الي المفروض تكون موجوده داخل كل انسان اذا جان ذكر او انثى، شنيه الصفات الي نكدر نصنفها انها تعبر عن الرجولة؟ 

اني اجاوبك: 

أولا الشعور بالمسؤولية: انك تحس بالمسؤوليه الملقى على ظهرك، انك تكون مسؤول عن قراراتك و عن ردود افعالك، انك تكون مسؤول عن اولادك و بناتك و توكف بظهرهم و تدعمهم، انك تقدر شريكة حياتك او حبيبتك و تعاملها مثل ما تحب انها تعاملك، و تعبرلها عن مشاعرك و شنو الاشياء الي تزعجك و شنو الاشياء الي تفرحك، انك توكف بظهر اختك و اخوك و تدعمهم بقراراتهم و خياراتهم و متفرض عليهم رأيك بس لانك دتشوف انو هذا هو الصح، لان كل واحد و وحده بينا يشوف الامور بطريقته الخاصه و من وجهة نظره او نظرها، لذلك لازم تحترم هذا الشي و تدعمه و تواجه كل شخص يحاول يفرض هذا الشي عليهم، انك تقدر مجهود امك و ابوك الي ربوك و توكف وياهم و تدعمهم لاخر عمرك و متعتدي على اي احد من اهل بيتك لان المفروض انت الشخص الي يحتمون بيه مو يخافون منه، انك تكون مخلص بعملك و تقدم شي للمجتمع و لنفسك تفتخر بيه و يحسسك بوجودك كعنصر مهم و اساسي بحياة الناس الي حولك، انك متكون انسان بخيل بمشاعرك او بفلوسك او بأي شي ثاني، لان ما اتوقع اكو احد يحب يكون ويه شخص بخيل، و طبعا العوز مو بخل، اذا ما عندك هذا الشي هذا ما يعني انك بخيل، كلنا نكره نطلع ويه صديقنا البخيل و كلنا منحب نرتبط بشخص بخيل، بس بخل المشاعر اسوء من بخل المال، لان المشاعر مهمه للتواصل ويه الناس الي يحبوك، حاول تظهر هذا الشي للناس الي حولك و حاول متكون مستهتر بمشاعر غيرك او بحياة غيرك او بحياتك انت، يعني  متكول كلمة احبج بدون متكون تعنيها لان هذا استهتار، يعني انك متسوق بسرعة و تسوي حركات بالسياره بنص العالم لان هذا استهتار بحياة الناس و حياتك، او انك تضرب طلقات بالهوى لان فاز المنتخب او لان عرس صديقك هذا مراح يخليك رجال و انما راح يخليج مجرم، لان تعرف احتمالية ان الطلقه ممكن تنزل و تنهي حياة احد موجودة و صارت هواي، السلاح عمره مجان رمز للرجولة، اي احد يكدر يشيل سلاح ويدوس الزناد، حتى يدافع عن نفسة و هذا للشي من حقه، بس لازم تعرف ان سلاحك هوه عقلك و افكارك، خليك شخص منطقي و شخص يناقش و يسمع، و حط جوة كلمه يسمع الف خط، لان اذا انت متسمع الناس الي حوليك محد راح يسمعك حتى لو صوتك يوصل للقمر.