وياكم فلان و هاي الصوتيه الثامنه من عراقي بودكاست الموسم الثاني، مر تقريبا ٤٥ يوم على اخر مره نزلت بيها صوتية و الصراحة مردت اسويلكم اي موضوع و خلص و انما جنت احاول اسوي صوتية تكون مهمة و بيها مغزى، كل يوم جنت اكعد اكتب مواضيع مختلفه و بالاخير احسها مو هاي الاريدها و امسحها، طبعا شكرا لكل الي سألوني وين صرت و دزولي على الانستاجرام و الفيسبوك و الصراحه اني مقصر فراح اعوضكم هالمرة، البارحة جنت كاعد بغرفتي و دا احاول اكتب موضوع حصوتيه و دا اعصر بمخي و فجأة دخل عليه اخويه و طب ديسولف مثل العادة، كلتله اكلك شنو اكو موضوع صار تحسه مال بودكاست؟ فر براسه شويه و كعد عالكرسي و كال: ليش متحجي عن علاقتك السابقه، اني هنا كلت اي والله خوش ماده دسمه و بيها احداث هواي بس للاسف اني معظم احداثها ناسيها لان الصراحه مجانت تستحق تنذكر كلش، بس خلينا نبدأ، من قبل كم سنه جنت هسوتني منتقل لمكان جديد و حجيت عنه بالصوتيه الأولى و الثانيه من هذا الموسم و طلعت منه بالصوتيه الثالثه، بس راح ارجعكم عليه شويه حتى نفتهم التسلسل الزمني للقصه، جنت بفترة التدوير على شغل و جنت ممكن اسوي زي شي كشغل لحد ما استقر، و آني معروف عني إني احب التصوير بشكل موطبيعي و اشتغلت باكثر من مكان للتصوير و اتطوعت هواي لتصوير مناسبات فكل الناس الي اتعرفت عليهم بهاي المدينه يعرفون اني أصور، و بيوم من الأيام أكون ناس طلبو مني أصورلهم عرس صور و فيديو بمقابل مادي، و آني طبعا قبلت و حظرت نفسي يومها بكامرتي و بطاريتين و ميموريتين و انطلقت لتصوير العرس و الصراحة جان تصوير موفق شويه و هواي صور طلعت حلوه و الفيديو جان زين همين، بس أثناء العرس لاحظت بنيه تباوعلي معظم مدة العرس و جانت ويه أهل العريس بس ماعرف شتصيرلهم، و صورتها أكثر من صورة و هواي جانت تطلب مني أصورها، كنوع من أنواع الحرشة، و آني الصراحة جنت مركز بالتصوير أكثر لأن جان شغل و مطلوب مني، مو معقوله أغلس عالشغل علمود أضبط ويه بنيه، المهم خلص العرس و كل واحد راح لبيته و بعد كم يوم منتجت الفيديو و ضبطت الصور و دزيتها لأخو العريس و أتذكر جان خوش ولد الصراحه و إنسان جدا محترم مشفت منه أي شي سيء الصراحة، وجنت أحبأكعد اسولف وياه بالالكترونيات و التكنولوجيا و هاي الأمور، المهم بعد اسبوع تقريبا جان وقت الفالنتاين قرب و جان أكو منظمة عراقيه بهاي المدينة مسويه احتفاليه مال فالنتاين و عازمين بيها بس بنات، ماعرف شنو الفكرة الصراحة انو تعزم بس بنات على حفلة مال عيد الحب هههههه،بس نمشيها، و طلبو مني أصور الحفلة بس بدون مقابل و انما خدمة للناس الي هناك، فكلتلهم ماشي أروح، رحت هناك وألكي روحي بمكان بيه تقريبا ٦٠ بنيه و آني الوحيد هناك و الصراحة الموضوع غريب و مربك ههههه، المهم بديت أصورهم و سوو فعاليات و ألعاب و من هالأمور و الصراحه مجنت آظوج من الي يكولون لتصورني بس جنت أنغث من وحدة تكلي لتصورني و تطللعلي بكل زاويه و كل صوره، و اني دا أصور و مركز ويه الناس و ألاحظ نفس البنيه الي جانت بالعرس قبل اسبوع موجودة و مغيره لون شعرها، صورتها كم صوره و بعدين اجت عليه و كالتلي وين الكي هاي الصور و آني كلتلها انطيني رقمج و اني ادزلج الصور، كالت ماشي، طبعا كل المصورين ارتبطو هيج فلحد يحكم عليه هههههه، المهم وره الحفلة دزيتلها الصور و كعدنا نسولف بالمسجات و بعدين اتخابرنا و سولفنا هواي، و اليوم الي وراه سولفنا والي وراه و الي وراه إلى آخره، لحد ما يوم كلتلها تعالي نطلع، و هيه قبلت و كالتلي تعالي نروح على الجامعه مالتي هستوني متخرجة منها و أعرفها كلها، و اني وافقت، رحنا هناك و سولفنا هواي و اتمشينا و مبقينا شي محجينه بيه و أكتشف انو هيه جانت أخت العريس و العريس واحد من أخوتها ال١٦، عدها ١٦ أخ!! أكبر أخ عدها عمره بكد أبويه، متخيلين! و هيه أصغر وحده بالبيت، المهم طلعنا أكثر و اتعرفنا على بعض أكثر و للتذكير بس آني جنت مصارلي هواي طالع من علاقه جانت نهايتها سيئه و غير متوقعه فجنت أبحث عن علاقه جديدة حتى تطلعني من صدمة هذيج العلاقه و الصرحة جانت هاي وحدة من أكبر الغلطات الي وقعت بيها، لان مجنت مستعد نفسيا أو عقليا أو ماديا إلها، تابع الصوتيه للأخير و انت تفهم ليش، بعد فتره ٣ شهور تقريبا من التعارف آني حسيت انو هاي العلاقه مو الي و ما أريد أكمل بيها حتى لا أظلمني آو اظلمها وياي، و بيوم من الآيام كلتلها هذا الحجي و ردة فعلها جانت غريبة، انهارت و بجت و لطمت و مبقت، و هسه شلون راح أكدر اروح على الاماكن الي احبها و وديتك عليها بدون ما اتذكرك بيها و هسه شلون اعيش، و اني ماكدر اعيش بدونك و لحد هسه اتذكر كعدتنا على العشب بملعب مال جولف و هيه منهاره و دتبجي، فللاسف قررت ما اكسر بخاطرها و كسرت بخاطري اني و قررت اكمل وياها،   و جان اكو خبر ثاني بعدني ما كلته الها بهاي اكعده حتى اخفف الصدمه و الخبر جان، إني راح اسافر من هاي المدينه و آروح على مدينه ثانيه كلش بعيده، نفسها الي رحتها بالصوتيه الثالثه بعنوان براغي و أخلاق، روحوا سمعوها كلش قصه مهمه و بيها احداث غير متوقعه، المهم من كلتلها راح اسافر هيه انهارت بالزايد و كامت تبجي و هسه تروح تتفرج عالبنات هناك و تعوفني و من هالحجي، وره تقريبا ساعتين رجعت للبيت مثل ما رحت ماكو شي اتغير، عزمتها مره على البيت و اهلي شافوها و اتعرفوا عليها و اهلي عجبتهم و هيه جان تضحك وياهم و تسولف، و نسيت اكول شغله، اني امي بهذيج الفتره جانت دتزن عليها اتزوج، مثل هسه بالضبط ههههههههه، المهم ظلو يسولفون و بنص الحجي اهلي جانوا ديسئلوها عن اهلها و كالت آهلي اذا يشوفوني جايه عدكم يموتوني، فأبويه كاللها: مو مشكله عود نخطبج اذا صار هيج و ضحكنا، هههههه عده خوش حس فكاهه آبويه مو هههههههه، هسه سؤالي للي ديسمعني، شنو تتوقع صار من اجت لبيتنا مره ثانيه؟؟ احزر شنو صار، 
 اني اكلك، اجت ثاني مره كعدت عدنا ساعه تقريبا و فجأة تلفونها دك و اختها دتكللها اخوج شافج رايحه لبيت فلان و حيموتج من ترجعين ههههههههه، مركز ويايه؟ و كامت ترجف و تبجي و اني اخويه راح يموتني و مراح اكدر ارجع ومن هالسوالف، المشكله انو الحيله جانت كلش رخيصة بس العجيب انها ضبطت! هيه رجعت لسيارتها و راحت و اني و اهلي كعدنا نتناقش موضوع اخطبها او ما اخطبها، و طبعا هذا واحد من القرارات الي اندم عليها للاسف بس مردت اكون الشخص الي يدك الناقصة، فرحت عليها و خطبتها قبل اسبوع من سفرنا تقريبا، مر اسبوع و سافرنا و بدينا جزء جديد بعلاقتنا، الجزء الي العلاقة بي انهارت، و بدت تبين عيوبها و مشاكلها، هيه جانت تعرف عن علاقتي الأخيره قبلها و جانت دائما تكولي انت بعدك تحبها و بعدك ما طلعتها من بالك و للأسف جان أكو جزء من كلامها صحيح، بس آني جنت دا احاول اني ما اخلي هذا الشي يأثر علي علاقتنا بس للاسف هذا الموضوع و غيره خلاها متكون واثقه بيه و متكون متأكده من ولائي، جانت دائما تريد تكون وياي عالتلفون و جانت متتحمل اسد الخط بدون سبب وجيه، لدرجة انها جانت تطلب مني ابقي التلفون مفتوح طول الليل حتى تسمعني واني نايم واتذكر مره امي دخلت غرفتي لكتني نايم و التلفون مفتوح وياها، فامي سدت الخط لان مفتوح على الفاضي و ثنيناتنا نايمين، وره دقيقه دكت عليه مره لخ و كامت تتعارك و ليش تسد الخط و شعندك و منو تعرف و من هالامور، الموضوع صار مزعج، بس كلت مو مشكله هاي لان احنا بمرحلة العلاقة عن بعد الي يسموها long destance  فأكيد تصير تغييرات، مو كلشي يصير بيوم و ليله، لكيت آول شغل الي بشركة مال بريد و توقيت الشغل جان جدا سيء، لان جان يبدأ بال٣ الفجر لحد الظهر، يعني لازم انام كلش من وكت حتى اكد اروح مصحصح للشغل بس طبعا هذا الحجي ميفيد ويه خطيبتي لأن هيه تريد تبقى تسولف بالليل عالتلفون و تنام و هيه دتسمع صوتي و من هالامور، و اتذكر ايام هواي جانت تدك عليه بال١٢ بالليل تكعدني من النوم حتى تسولف وياي واني جنت اتخبل و جنه نكظيهاي الفتره كلها بس نتعارك لان دتخابرني بوقت مو مناسب و ما اكدر انام و اروح للشغل خلصان مابيه حيل و بس اريد انام، و اتذكر مره منهن طلعت للشغل بس جنت كلش نعسان فقررت ما اروح للشغل و ابقى بالسياره و انام، و اتذكر مره صارت مشكله بيني وبينها و جانت دتتشتكي لأهلي مني و كالتلهم اني سويت روحي رايح للشغل و رحت نمت بالسياره، عبالك جاهل و مسوي روحي رايح للمدرسه ههههه، المهم الأيام مرت و اجت خطيبتي زارتني كم مره و اني زرتها كم مره، طبها المسافه بيناتنا ١١ ساعه بالسياره، يعني مو سهله الواحد يروح كل فتره، و اجت مرات اروح بالطياره همين، هيه جانت تكره أختي بشكل غريب! بس جانت تعالملها زين كدامي و جانت تكره أمي و جانت تكره صديقاتي من الجامعه و جانت تكره اي بنيه بحياتي، اذا جان كرايب او معارف او شغل، لدرجة انها جانت تغار من المساعد الصوتي الي بغرفتي مال أمزون لان بي صوت بينه و اسمها ألكسا و جانت دائما تعترض عليها و تكول شنو انت متكدر تعيش بدون البنات حواليك هههههههه، و صدكوني مدا اجذب، اجت فتره اشتغل بالحكومه و جنت اطلع ويه مجموعه مال شغل ميداني، جانت تطلب مني أصورلها الناس الي دا اشتغل وياهم و جنت ما اقبل و هاي جان مشكله جبيره بيناتنا لان مجانت تصدك اني جنت اشتغل ١٢ ساعه باليوم و جانت تشك اني دا اشتغل اقل و اسوي اشياء ثانيه من وراها، الصراحة ماعرف اذا هيه جانت هيج لو هيه صارت هيج بسببي لو الضروف وصلتنا لهيج حالة، بس الي جنت اعرفه اني صبرت هواي و مريت بأيام ما اتمنى لاي احد بيكم يمر بيها، ممكن هيه تكون بنيه زينه ويه غيري و اني اكون زين ويه غيرها بس اني و هيه مجان لازم نبقى سويه، اني كشخص ما أكدر آكون ويه اكثر من شخص بنفس الوقت و ما اريد، و هيه جانت متصدك هذا الشي، و جانت تخاف احد يخفطفني منها، للأسف اكو هواي تفاصيل مراح اشاركها وياكم حتى لا اطول عليكم و لخصوصيه المواقف، بس اكتشفت ان العلاقات البعيده مو الي و ما أكدر اعيش بهيج علاقة، يمكن تنفع لغيري و يمكن غيري يشوفها ناجحه، و ممكن احد يكول و شكو بيها و ماكو علاقه مابيها مشاكل، بس اني انسان آحب السلام و الهدوء و آحب النقاش و التفهم و الضحك، ماحب العركه و النكد و التبريرات و النقاشات العقيمه، أحب اكون ويه شخص فاهمني و آني فاهمه، للأسف اني مجنت فاهمها و هيه مجانت فاهمتني، بس ما أدركت هذا الشي غير لمن رحت عقدت وياها عد السيد، بهيج احنا كتبنا كتابنا، و لحد يسآلني ليش هيج سويت لان اني نفسي ما ادري، مر كم شهر على عقدنا بس ما سووينا عرس و أجلناه لحد ما اني استقر بشغلي و استعد و بعدها هيه تجيني على المدينه الي اني عايش بيها و نعيش بتبات و نبات و نخلف صبيان و بنات ، و بهيج دخلنه مرحلة جديده و صارت العلاقه مضمونه أكثر و كلشي صار تمام و اتفقنا و الأمور جان ماشي مثل الحلاوه، دا آجذب طبعا الأمور صارت اصعب و الضغط زاد و تحولت من انسان هادئ متسمع صوته بالبيت لشخص يتعارك و يصيح و كل يوم مشكله ان وياها و كل يوم عركه و صياح و اتذكر اخويه جان يجيني يكولي، آني ما أدري شلون بعدك بهاي العلاقه، كل يوم جنت اسمع منه هالمقوله، و بلا طولة السالفه بيوم من الأيام اجتني هيه و امها دتزورنا و تكعد ببيتنا كم يوم، و جانت هاي الكم يوم هيه الأيام الفاصله بالنسبه الي الصراحة، جانت جايتني بسالفه جديدة و هي انها اكتشفت انو عدها حاله نفسيه اسمها الوسواس القهري، هاي الحاله النفسيه موجوده عند الكل تقريبا بس نسبتها متفاوته من شخص للثاني و الوسواس القهري انك يصير عندك اضطراب بأفكار و مخاوف غير معقوله تؤدي لسلوكيات غير معقوله أو هواجس و آفكار مفرطة تؤدي الى سلوكيات متكرره، مفتهمت مو ؟ باختصار الناس ال يمتحب تشوف النعال مقلوب و تغسل ايدها عشر مرات قبل و بعد الاكل و من هالامور، و طبعا هاي الحاله متجيك بيوم و ليله وانما يكون الها اثار وراثيه و مكتسبه و تحتاج فتره طويله لحد ما تبين عليك، يعني متكدر بيوم و ليله تصير عندك وسواس قهري، المهم هيه اجتني كم يوم نصيف و نروح للبحر و نخيم و من هالسوالف و جانت عباره عن عركات اكثر من ما هيه طلعات و مشاكل اكثر من كونها ونسه، وجنت عبالي مشاكل الغيره اسوء شي بالعلاقات بس اكتشفت ان مشاكل الوسواس القهري أسوء بمراحل خصوصا لمن كل حره تصير محسوبه عليك، اذا لزمت شغله بالشارع روح اغسل ايدك، اذا لزمت فلوس اغسل ايدك، اذا فتت للحمام تطب وراك تشوف اذا حتغسل ايدك، يعني شخص طول الوقت يحسسك انك معرفت تهتم بنظافتك الشخصيه طول ال26 السنه الي فاتت و هوه جاي يعلمك هسه، الموضوع جان جدا لا يحتمل و اني طفح بيه الكيل و انتهيت الصراحة، حسيت اني ممكن اسوي اي شي بس اخلص من هالوضع الي اني بيه، لان مهما يكون، ما اتصور احد يحب احد يتحكم بيه، مهما جان يحب هذا الشخص، يعني الواحد ميصدك يكبر و يخلص من تحكم الأهل بيه و على الاقل الأهل تحكمهم مبرر، و يرتبط بشخص يتحكم بيه و يسود عيشته، مر 4 ايام و باليوم الخامس و الاخير اني كعدت من النوم مقرر اني اطلع من هاي العلاقه باي شكل من الأشكال، يومها جنه مقررين نطلع نتونس عساس و الصراحه مشفنه ونسه طول الطلعه، بعيدا عن تفاصيل الطلعة المؤلمة الي راح اختصرها بانو طلعنا مرتبطين و رجعنا منفصلين، للأسف سوء فهمك لمفهوم الارتباط و الحب ممكن يسببلك مشاكل ويه شريكك مدا الحياة لازم تفهم انك من تحب شخص و ترتبط بيه هذا ميعني انك تملك هذا الشخص، الارتباط بشخص ما هو عباره عن اتفاق مو خلاف، و عباره عن شراكه مو تحدي، آني شخص اؤمن ان العلاقات موجودة للراحه، للود، للتفهام و اللين بالمعامله، احنا منرتبط حتى ندافع عن نفسنا، ولا حتى نفوز بمعركه بالنقاش و نشوف ويامن الحق، كلمه حلوه كفيله تنهي اي خلاف بين ثنين يحبون بعض، لازم نتعامل ويه الامور بطريقه تخلينا نوثق ببعض اكثر، بطريقه تخلينا نسمع بعض اكثر، و ننتبه على اخطاءنا و نحاول نتفادى نوكع بيها اكثر من مره، و الآهم انو نحترم بعض ونحترم اختيارات و قرارات بعض، لان كل الفات ماكو منه اهميه اذا ماكو احترام، اني بعد هاي القصه الي صارتلي حست روحي صرت انسان ثاني، اتعلمت هواي اشياء خلتني ما ادخل علاقه بدون ما اكون متآكد من الشخص الي اريده، كعدت فتره كلش طويله بعيد عن العلاقات، تكدرون تكولون عليها فتره تعافي، لان من تطلع من هيج فتره تحس روحك تعبان و منهك من كل النواحي، لهاذا ركزت على شغلي و على حياتي اكثر و اكتشفت انك ممكن تفهم شويه عن العلاقات و شلون تتعامل وياها، و نصيحتي الك لازم تسمعها زين و تفهمها، لتسكت على شي مضايقك او متعبك بعلاقتك، احجي و اتناقش بس لتتعارك، و حاول توصل لشريكك احساس انك موجوة بجانبه بنفس الفريق مو بالفريق المنافس، الحياة قصيره و متستاهل نضيعها بآوقات الزعل و العراك، اذا انت ما مرتاحه بعلاقتج و شايفتها مو ناجحة عوفيها، لتضيعين وقت هواي بانتظار اليوم الي تتفقون بيه لان راح يطول كلش و يمكن ميجي، و تكتشفين بوقتها سنين من عمرج ضاعت و انتي دتحاولين ويه الشخص الغلط، لان ممكن تكتشف شخص يكون سهل جدا عليكم تتفقون و تحبون بعض، اني علاقتي الي حجيتها مجانت زينه، بس اني ادري ان المشكله انو احنه ممنفع لبعض، و هذا معناه انو هيه ممكن تلكي شخص يناسبها و تناسبه و اني نفس الشي، فليش نوجع راسنا.