وياكم فلان و هاي الصوتية السابعة من عراقي بودكاست الموسم الثاني، اتذكر مره فتت بنقاش ويه أبويه عن الشرف و عن شنو التصرف الصحيح في حال عرفت بيوم من الأيام ان وحدة من خواتي بعلاقة ويه شخص؟ و الصراحه اكتشفت شكد الموضوع حساس بالنسبه للعائلة العراقية و بالنسبة للرجل العراقي بالتحديد لدرجة انو ابوية عصب عليه كلش لأن جنت ضد القتل أو العقاب بشكل عام، و بوقتها التله اذا انت تشوف هذا الشي مو مناسب آلك و لعائلتك، تكدر تتبرى منها أو تتخلى عنها بمعنى أصح! بس تقتلها؟ ليش؟ يعني تقتل شخص لأن حب شخص؟ السؤال الجوهري هنا؟ أنت عمرك حبيت؟ عمرك حسيت أنو احد يحبك لأن الحب هيه مشاعر جميله، مشاعر نبيلة، واحة من أنقى ، أحلي مشاعر ممكن تحس بيها بحياتك، و هسه أكيد أحد راح يسألني سؤال؟ و منو يكول هوه يحبها صدكـ ؟ منو يكول ان هذا الشخص مايضحك عليها و يلعب بمشاعرها حتى يستغلها أو يوصل لأغراض مو شريفه؟ و أحب أكلك سؤالك منطقي، بس اتخيل ان بنتك تكدر تجي تكلك اني أحب هذا الشخص و انت تتعرف على هذا الشخص و تفهم مقصده و تفهم ليش بنتك حبت هذا الشخص و بنفس الوقت راح تكدر تقييم هذا الشخص من وجهة نظرك و راح تكدر تعرف بشكل ما ان هذا الشخص يستغل بنتك أو صدك يحبها؟ و الأهم من هذا كله ان بنتك لو هذا الشخص اتعرضلها أو اذاها راح تكدر تجي تكلك و تلجئ الك مراح تضطر تتعامل ويه هذا الموقف لوحدها، غير انها ممكن تستفيد من نصيحتك و من خبرتك بالحياه، للآسف اني اعرف ان هذا الشي صعب يتطبق بمجتمعنا، و خصوصا من كل يوم تسمع عن بنت تقتل بحجه غسل العار آو الشرف، اليوم كعدت من النوم و لكيت هاشتاكـ #حق ـ شهد ـ العيساوي بكل مكان على السوشل ميديا و دورت بالموضوع و جان كالآتي: اليوتيوبر العراقي محمد العيساوي يرتكب جريمة شرف بحق بنته شهد العيساوي البالغة من العمر ١٤ سنه! و أكو مواقع كاتبين ١٦ سنة و السبب انها جانت واكفه بباب البيت ويه ولد، أكو ناس كالو هذا الولد اتقدملها قبل فتره وأبوها رفض و أكو ناس تكول ان البنيه فتحت الباب عبالها أخوها و طلع واحد هيه متعرفه و ابوها مثل الزمال راح طلع المسدس و قتلها ب٣ طلقات براسها بكل دم بارد. ————— 

ماعرف منين أبدي الصراحة، الموضوع صار مقرف و صار لا يحتمل، أكو مثل يكول كل فتاة بأبيها معجبة، و كل الصراحة اني اشوفة مثل صادق جدا لان معظم البنات الي شفتهم بحياتي كانوا يحبون أبوهم أكثر شي بالدنيا، بس اتخيلي انتي شخص تحبي و يعتبر حبج الأول و هوه بموقف همجي أرعن ينهي حياتج! بهاي الحاله منو ممكن تحب أبوها أو توثق بيه؟ المن تلجئ من تحتاج آحد يسندها، انك تكون أب هاي مسؤولية جبيره مينفع واحد متخلف رجعي أرعن يتحملها، المجتمع العراقي مجتمع معقد و بيه هواي عقد و مشاكل متخلص، يعني مجتمع يقدس الأم بس يحتقر المراه؟ متدري شلون، مجتمع يشوف انو عادي تقتل بنتك في حاله الغضب أو بحاله العصبيه، عبالك جلب مسعور و محد يكدر يحاسبه، حتى قانون العنف الأسري الي نطالب بيه من سنين حتى نحاسب بيه هاي الكلاب المسعورة البرلمان مايقبل يصادق عليه، لأن همه نفسه الي يصوتون عليه ويريدون يتطبق عليهم، يريدون يسوون الي يريدوه ببناتهم و زوجاتهم بدون ما احذ يحاسبهم و بنفس الوقت يكدرون يستعملون القانون حتى يغطون على جرائمهم باسم الشرف، حتى لو كانت جريمة قتل لأي سبب ثاني يكدرون يلزكوها باسم الشرف، المقرف اكثر بالموضوع همه أصحاب محمد الخرة العيساوي هذا، طالعين يبررون جريمته و يطالبون الناس انها تستر عليه و تسكت لأن خطيه هوه خوش رجال و جانت غلطه و لحظه عصبيه و الموضوع عائلي شدعوه هلك مكبرينه؟ 

تسجيل صوتي لصديق العيساوي 

أول اعتراض من هذا الحثاله ان صوره النبيه الي انتشرت هيه مو بنته، على اساس هذا راح يغير شي، و طبعا واحدكم يمنع كلشي عن بنته و يمنع انها تنزل صوره او تطلع لمكان حتى لحد يعرفها، لأن هيه عار طبعا بالنسبه اله، و أول سؤال يطرحها هوه ليش هذا التأجيج و مستغرب، عبالك هوه مضيع ضربة جزاء مو قاتل و مجرم و هارب، و الحجه ان انو ليش تنشرون عن وضع البلد و الخدمات و الحالات الانسانيه، زين سؤال؟ انت من تقتل انسان، هاي مو حاله انسانيه؟ و المشكله انو هوه يسقط من البيجات الي تسقط بواحد مجرم و تكول عليه من الشرفاء الي بالبصرة حبي اذا الشرفاء هيج يسوون لعد السرسريه شنو شغلهم؟ بس يا اخي انسان طيب بس صارت حاله عصبيه و قتلها، يعني تريدون تحاسبونه لان قتل طفله؟ تره عادي كلنا نقتل اطفالنا و نخلف غيرهم عود مو مشكله؟ و بعدين هاي مشاكل عائليه انتو شنو متدخلين؟ لازم البنيه يكون ابوها نائب او محافظ حتى الناس تطالب بحقها، بس اذا من عامه الشعب لا طبعا ندوس عليها مثل الحشره و نمحيها من الوجود و ما مسموح لاحد يطالب بحقها! و المشكله يطالبون بكل صلافه من الجهات الأمنيه انها تراقب هاؤلاء الي يطالبون بحقوق المظلومين، يعني انت من كل عقلك تحجي؟ لا يعني صدك الي تطالب بيه، هيه صحيح القوات الامنيه تقتل المتظاهرين و الي يطالبون بحقوقهم و تقمع الرأي العام بس مو لهالدرجة، انت تدافع عن شخص مجرم، و هذا الشي يخليك مجرم مثله ولازم انت هم تتحاسب و حبيت انك تطالب الناس انها تشارك هذا المقطع حتى تراوي تخلفك و همجيتك للناس، تره انت هيج تثبت التهمه على صديقك اذا مجنت تدري، و الشرفاء راح يشاركون هذا المقطع مالتك حتى يراوون للناس وين وصل بينا الحال و وين وصلنا مرجعيتنا و تخلفنا مو حتى يشجعوك و يكون وياك حتى نوصل رساله للناس الي تكول ان حقوق المرأة بالعراق محفوظه. 

وره شويه طلعلنا يوتيوبر ثاني من مزبلة اليوتيوب اسمه جاسم العوادي و هو شخص عنده معرفه شخصيه بمحمد العيسوي خلينا نسمع. شنو كال 


طبعا وره ما سمعنا الي كاله هذا الكائن أحب أقولك كم نقطه 
آولا: انك يكون عندك سمعه حلوه آو تساعد ناس بالبصرة هذا مراح يسقط عنك الجريمه الي سويتها بالعكس هذا راح يمحي كلشي زين سويته و راح يخلي سمعتك الحلوه هاي بالزباله، ثانيا انت تحجي عن الستر و انو الله يحب الساترين؟ تره انك تستر على شخص هوه انك تشوف شخص يسوي شي ويه نفسه المجتمع يشوفه غلط فانت متروح تكول للمجتمع الي حوليه انو سواها بس بشرط انه ميكون دياري احد او يتعدى على حقوق احد، بس من يكون الحق جريمه قتل او اعتداء على احد فانه نا لازم نوكف و نحاسب هذا الشخص و نفضحه همين، لان حق هاتي البنيه بركبته و بركبة كل واحد يدافع عنه، مو تروح تنصحه و تكله حبيبي بعد لتقتل بناتك لان ميصير تره عيب الناس شتقول عليك، هيج تريدنا ننصحه؟ و بعدين انت تكول لازم نسكت حتى ليصير شي اكبر شنو ممكن يصير اكثر من انه يقتل طفله؟ يشويها مثلا؟ لو يروح يقتل امها؟ مدا استوعب دفاعك عنه! آني اذا أبويه يسوها اروح ابلغ عنه و افضحه بكل مكان! هذا مجرم و لازم يتحاسب و لازم يتعاقب و لازم مينعدم لأ، لازم يقضي حياته كلها بالسجن حتى يتذكر كل يوم البنيه الي انهى حياتها برعونته و استهتاره و تخلفه، ماعرف شوكت راح نخلص من هاي الافكار الي كل يوم دترجعنا الف خطوه ليوره و ماعرف شوكت الناس تصحى على هيج عادات و تقاليد دمرت مجتمعنا، ماعرف شوكت نخلص من المجتمع الذكوري و شوكت نخلص من قذاره العشاير؟