S03Vol15
وياكم فلان و هاي الصوتية الخامسه بعد العاشرة من عراقي بودكاست الموسم الثالث، أكو شغلات مو كلنا ننتبه عليها و مرات ننتبه عليها بس ننساها و هي القرارات المبنيه على كلام الناس،لان احنه من نبدأ حياتنا نبدأ نسمع كلام الناس الي حوالينا بمعظم القرارات البسيطة مثل اليوم شراح اتغدى او لون اللبس الي راح اشتري او اجيب هاي اللعبه لو هاي اللعبة، بس بعدين الامور تتطور شويه شويه مثل نوع الموبايل او لون حيطان الغرفة أو نوع الاثاث و لونه و كصة شعرك و اذا تتحجبين او لا و ويه مرور السنين و حجم القرارت الي نبدأ نعاني حتى نتخذها يبدأ الموضوع يكبر و يصير كلام الناس يتدخل بقرارات اختيار الاختصاص الدراسي و بعدين الشغل الي لازم نشتغله و يكبر الموضوع اكبر و يدخل بموضوع العلاقات و منو تتزوج و شوكت تتزوج و ليش متتزوج و حتى من تتزوج يبدأ الموضوع يتدخل بقرارك اذا تريد تجيب اطفال او لا و اذا جبت اطفال يدخل الموضوع باسمائهم و عددهم و بأي مدرسة يدخلون، لحد ما تموت و هنا ممكن الناس ممكن تتدخل بمكان القبر الي تندفن بي. 

طبعا انك تسمع كلام الناس هذا شي مو شرط يكون شي سيء، يعني من يكون اكو موضوع معين انت ما عندك خبره بي و يجي شخص عنده تجربه بخصوص هذا الموضوع و يشارك وياك تجربته، هذا الشي ممكن يساعدك في اتخاذ القرارت الخاصه بيك، او ممكن شخص يطيك رايه بشي معين و انت بكيفك تسمع الحجي و تمشي عليه او تسمع الحجي و متاخذ بي،و هذا الي دا اسوي وياك بعراقي بودكاست و هواي محتوى ثاني من ناس ثانيه، نشارك وياك تجاربنا و شنو اتعلمنا منها و انت بكيفك اذا تريد تاخذ منها اي شي او لا، بس المشكله وين؟ لمن تكوم تبني قرارتك على حجي الناس و نصائحهم، و خصوصا ٤ شغلات، الدراسة، الشغل، الارتباط، و الدين ال٤ اشياء هاي دير بالك تمشي على حجي الناس بيهن، هذني لازم تكون قرارك انت و بس، وجهة نظرك انت وبس، زين اشمعنى هذول ال٤ شغلات؟ 


خلينا نبدأ بالدراسة، الدراسة من وجهة نظري المتواضعة لازم يكون بيها شغف و لازم يكون الشخص عاجبه يكون مهندس و مهتم بامور الهندسه حتى يدخل هندسه، مو لان اهلي يكولون الهندسه احسنلك، همه عدهم وجهة نظرهم و تحترم جدا، بس راح تكون في مكانها و هو انها رأي ليس إلا، و نصيحة و ماكو مشكلة ، هذا الشي ممكن يخليك تفكر بالهندسه و تشوف اذا تجذبك بأحد فروعها و تدخلها، ليش مهم هذا الشي؟ حتى تكمل حياتك بشي انت عاجبك تسوي، انت الي راح تقضي ساعات و ساعات من حياتك بهذا الشغل و انت يا اما معاجبك شغلك و بس تريد ترجع للبيت، او متونس و متريد ترجع للبيت لان مندمج بالشغل و دتبدع بي؟ و اني هنا دا احجيلك عن اختصاص انت مهتم بي او عاجبك، بس اتخيل لو تلكي اختصاص انت حابه كلش و دتفكر بي دائما، هنا راح ينطبق عليه المقولة الي تكول، الشخص الي يشتغل بشغله يحبها مراح يشتغل ولا ساعه بحياته، لان انت خلص مستمتع بوقتك بكونك ممرض أو صيدلاني أو مبرمج أو طباخ او او او، مو مهم شنو دتشتغل لان انت دتسوي شي انت تحبه، مو الي اهلك يحبوه و لا الي خالتك او عمتك تحبه ولا الي اولادك يحبوه، ولا الي الجيران يحبوه، بس اكو ناس حتكول زين اني مدا اعرف شنو ادرس، او ماعرف شلون اختار فاسئل الناس، و هنا انت او انتي عدكم العذر، بس الوسيله لازم تكون صحيحه، يعني لازم تعرف انك مراح تحب او تهتم باختصاص من اسمه، يعني لازم اقرأ اكثر عن الاختصاص الي انت تريد تدخله، تشوف ناس داخلينه او ناس متخرجين منه، تتفرج فيديوهات عنه، شوف شكد يجيب فلوس و مدى توفره بمنطقتك، هاي الاشياء الي لازم تهتم بيها وانت تختار الاختصاص اكثر من اهتمامك بابن خالتك شنو دخل و بت عمتج يا اختصاص دخلت او تشوف ان الاهل همه ادرى بشنو لازم تدخل او تدخلين، حاول تشوفها كرحله و ممكن تجرب اذا هذا الشي متاح الك وره اول كم درس تشوف اذا هذا الشي مناسب الك او لا، بس خليك ماشي وره كلامك انت و بس. 

اما بالنسبه للشغل فميختلف هواي عن الدرسه و لنفس السبب، انك تحاول تتجنب انك تكون بمكان انته محابه او انك تخاف تغير اهتمامك او تغير شغلك لان ملكيت نفسك بي او مليت منه او تشوف نفسك بشي ثاني، حاول تدرس الموضوع و تاخذ قرارك و ماكو مشكله تاخذ رأي احد باتجاه الخطوه الي حتسويها، مثل لكيت شغل جديد و تريد تروحله و متدري تروح او لا، انت ممكن تشوف راي الناس القريبين منك و تشوف همه شلون ديشوفون الموضوع، بس متكدر تعتمد على تحليلهم همه لان همه ماعدهم الصوره الكامله، انت الي دتشتغل و انت دتشوف شنو الي عاجبك بشغلك وشنو الي انت تريد تغيره، اذا كان شغل كموضف او عامل أو صاحب مطعم او مكتبه او فاتح بنجرجي او كهربائي او اي شي، كل الناس عدها تفضيلاتها، يعني متشوف شخص يحب يصلح سيارات و شخص ميحب يلزم اي شي بالسياره؟ و اكو هواي امثله بحياتنا توضح تأثير التفضيلات على اختلاف الناس و تنوعهم.

أما بالنسبه للارتباط، فهاي المصيبه اكبر اذا اعتمدت على كلام الناس و مشيت وراه، و هذا السب اكو ناس راح تختلف وياي عليه اكيد لان الي مروج اله بمجتمعنا انك تروح تسأل عن الي دتتزوجها و يكولوك خوش بينه او موخوش بنيه و يكولوك والله عيبها انها متعرف تطبخ و من هاي الامور، انته هنا دتسوي غلطه جبيره، لان دائما رأي الناس مشحون بالعواطف، يعني اذا يحبوها راح يطلعوها هيه و بس و اذا ميحبوها فراح يطلعوها من طيز الجلب، فانت هنا شلون تكدر تعتمد على حجيهم، تريد تعرف اكثر عنها روح احجي وياها و اسألها بنفسك، اعرفها بنفسك، لان انت الشخص الي راح يقضي وياها الوقت كله، مو جيرانهم الي ميعرف شي عنها غير انو سيارتها هوندا او تروح للكليه الصبح، أو تروح للشغل ساعه هلكد، ولا كرايبها لان انت تدري ان كرايبك ميعرفون كلشي عنك، فليش تتوقع انو كرايبها يعرفون كلشي عنها؟ و هذا غير الي يعتمد على احد يلكيله عروسه او تلكيلها عريس و هاي الامور العجيبه الي الناس تسويها، اني اسف يعني لان دا اكول عجيبه بس صدك عجيبه، يعني شخص بالغ و جبير و المفروض يعرف يختار قراراته و بنيه بالغه المفروض تعرف تتخذ قرارتها بنفسها و يجيبون شخص ثالث او اشخاص ثالثين على اعتبار الاهل ممكن يوضفون هذا الشخص حتى يزوجهم؟ اني ماعندي شي ضد الناس الي تتزوج بهاي الطريقة بس مدا اكدر اتخيل انطي صلاحيه لشخص يلكيلي شريك حياتي. 

اما بالنسبه للدين، الدين مثل ما كلت بصوتيه سابقه، شي شخصي، الايمان او عدم الايمان بدين معين او بطائفة معينه هو يعود بالمقام الاول لاحساس الشخص برحلته الدينيه ويه نفسه، يعني ممكن يكون الشخص يحس بالراحه النفسيه ويه كونه شيعي مثلا، و يشوف نفسه مرتاح بهذا الشي و هو ديشوف ان هذا هو الطريق الصحيح، و الشخص السني مثلا ديشوف نفسه بهالطريقة، او الكاثوليكي ديشوف نفسه هو الصح وهو مرتاح بهذا الشي، او الاورثودوكسي او اليهودي او الصابئي او اللاديني او الملحد ديشوف راحته و اقتناعه و وجهه نظرة تكله هذا الاعتقاد هوه الي انت تريده و على فكرة، من حقك تنتقل بين هاي الاعتقادات براحتك او بصعوبه مع تغير طريقة تفكيرك وية الزمن و ملاحظاتك و تجاربك، و لكلمن يتعلك من لشته، لذلك كل هاي الاشياء الي دا احجي بيها لازم تكون قرارك انت و تحليلك انت، حتى لا احد يكون اله فضل عليك ويعايرك لان سمعت او مسمعت كلامه ولا احد تلومه و ينكبك و يدمر حياتك.