الصوتية ١٢ - أخطر مدينة العاب في بغداد من جنت عايش بدولة عربيه مجاورة للعراق، جنه اني و اصدقائي متعودين نطلع بنهاية الاسبوع نفتر و نحاول نتونس، و مرات نروح بالسيارة لمكانات كلش بعيده و نفتر و نسمع اغاني و نسولف و نتعارك و طبعا اكيد ناكل، ونرجع للبيت تعبانين و نعسانين و ننام نوم عميق، بس مره من المرات رجعت من طلعتنا مصدوم و دا افكر و مكدرت انام، ليش؟ لان بهذاك اليوم، جان اول مره اشوف حادث مرعب يصير مباشرة كدامي، بوقتها ساعدنا الناس يعدلون السيارة الي انكلبت ٥ كلبات، حتى نطلع الناس الي بيها لحد ما يجون الاسعاف، و السيارة جان بيها ٥ اشخاص ببداية العشرينات اتوقع او يمكن اصغر شويه، اني اكلك الحادث جانه على شعرة و نكون جزء منه لان اتذكر شفت السيارة جانت جايه بسرعة كلش من ورانه بالمرايه و مبين عليها مدتكدر توكف و جانت جايه باتجاه سيارتنا و بوقتها البنيه الي دتسوق جانت دتحاول تتفادى السيارات الي كدامها بس مدتكدر توكف السياره لسبب ما، المهم السياره فاتت من يمنا بسرعة جنونيه و فجأة (صوت الحادث) السيارة ضربت بحافة الشارع الكوكريتيه و السياره دارت و طارت بالسما و انكلبت ٥ كلبات تقريبا و جان اكو بنيه كاعده ليكدام طارت من الشباك و من نزلنا و عدلنا السياره جان اكو ولد كاعد بالكرسي الي وره و نص جسمه محصور بين الكرسي و صندوق السياره، المهم بهاي الاثناء سيارة الاسعاف وصلت و اهتمت بالباقي، و نتيجة هذا الحادث ان ٣ اشخاص اتوفوا فورا و البنيه الي طارت من الشباك جانت عايشة بعدين ماتت وره ما نقلوها للمستشفى، و الشخص الوحيد الي عاش بهذا الحادث هي البنيه الي جانت دتسوق، تدرون ليش؟ لان جانت لابسه حزام الامان. وياكم فلان و هاي الصوتية الثانيه بعد العاشرة من عراقي بودكاست الموسم الثالث، أول مرة اخذت بيها رخصة سياقة او اجازة سياقة جانت بدولة عربيه مجاورة للعراق، و اتذكر وقتها الفترة الوحيدة الي لبست بيها حزام الامان جانت بوقت تدريب السياقة و بوقت امتحان الاجازة، و جنت وقتها استحي البس حزام الامان لان الناس تكوم تضحك عليه، الصراحة مادري ليش ديضحكون لحد هسه،مع انو كل واحد بيهم اذا يروح يركب لعبة بمدينة الالعاب حتى لو جانت الدودة، راح يربط حزام الامان بيها، هذا معناه انه يخاف على نفسه من الحوادث و عواقب هاي الامور، فليش الناس ماعدها مشكله تلبس حزام الامان بالونسه و باللعب، بس ميلبسوه بالصدك، و هذا الشي ينطبق على الخوذة والكسارات الي لازم تنلبس بالدراجه همين، هاي بعد اصخم، المهم بالبلد الي اني عايش بي حاليا، معظم الناس تلبس حزام الامان، و بالعكس، يستغربون من يشوفوك ملابس حزام الامان، و مع ذلك، معظم العرب و العراقيين، هم ميلبسوه! يا اخي ليش؟ حبيت اعرف ليش هيج اكو عداوة بين العراقيين و حزام الامان بس معرفت، لان مو بس اكو ناس متلبسه، و انما اكو ناس تحاول تقنعك انك تسوق بدون حزام هو اامن الك؟ و حجتهم انك ممكن تعلق بداخل السيارة في حال صار حادث، وطبعا هذا حجي مو منطقي، لان حالة انك تعلق بداخل السياره بسبب حزام الامان هي حالة وحدة من اللاف الااحتمالات الي ممكن ينتهي بيها الحادث، مثل الشخص الي ممكن يطير من شباك السياره بسبب الحادث او مرات يكون حادث مو قوي كلش و يكون مجرد اصطدام امامي بس لانك ملابس الحزام ممكن يكون رد الفعل عليك قوي و يظرب وجهك بالستيرن او بالزجاج الامامي او ظهرك يتأذى، ماعرف ليش هيج الموضوع جدا مو مهم للناس و يحاربوا؟ غريبه مو؟ اكو دراسه امريكيه سنة ٢٠١١ عن تأثير حزام الامن، ر هاي الدراسه تكول انو حزام الامان يقلل و بشكل جببير خطر الموت او الاصابع البالغة، يعني السايق و الي كاعد يمه اذا لابسن حزام الامان، نسبه وفاتهم تقل ٤٥ بالميه و نسبه اصابتهم اصابات خطيره تقل ٥٠ بالميه، و احتماليه انو الراكب اثناء ما السياره تكلب ينشمر من الشباك ٣٠ مره اكثر اذا الشخص محاط الحزام، هذا غير الناس الي انقذهم حزام الامان من موت محتم و يوصل عددهم ١٤ الف تقريبا سنويا بامريكا بس، طبعا هسه وانت دتسمعني، دتكول لنفسك هسه عساس مندري شيسوي حزام الامان و دتكول عليه اني دا ادعي المثاليه مع انو هذا الشي ماله دخل بالمثاليه و انما هو تصرف بسيط ممكن يحمي حياتك و ينقذك من موت او شلل او تشوه او عاهه تبقى وياك طول عمرك، ادري بيك دتريد تطفي الصوتيه لان الموضوع مهروس بالنسبه الك و للمجتمع وماكو فايده منه، بس لازم تفهم ان حياتك مهمه، تدري بهذا الشي؟ نصيحتي الك، و لان اني اهتم بيك يا مستمعي العزيز، حاب انطيك نصيحة لطيفة خفيفه و سهله، هيه انك تقدر قيمة الحياة، و تهتم بسلامتك و سلمة الناس الي تحبهم او حتى الناس الي متعرفهم، القصة الي حجيتها و هواي قصص ثانيه انحجت و منتحجت تبينلك انو الحادث ممكن يصير بلحظة، لازم تكون على اقل تقدير مجهز نفسك، لتستهين بسلامتك و لتخلي احد يتساهل بيها همين، وتخجل من احد يباوعلك بنظرة استهزاء لانك خايف على سلامتك و تريد ترجع لبيتك سليم، لان هذا الشخص الي ديستهزء بيك مديقدر قيمة حياته او سلامته الا بعد يفوت الاوان و المشكله انه دينشر فكره خطأ و فكره خطرة للناس الي حواليه و يكون قدوة سيئة للناس الي حواليه و انت ممكن تكون قدوة زينه لمن تتبنى سلوك امن، دائما حاول تذكر الناس الي حواليك انهم يلبسون الحزام مهما جانت المسافه و ذكرهم انك تحبهم و انهم مهمين بالنسبه الك، و خليك شجاع و اتحدى السلوك النمطي الي ديتبعه الناس بدون اي سبب او مبرر، حتى شاورعنا تكون امنه الك و لغيرك.